ايماقتار • 20 اقپان، 2020

سوڭعى كۇندەردىڭ بورانى سۇراپىل

102 رەتكورسەتىلدى

سولتۇستىك قازاقستان وبلىسىندا جەلدىڭ قاتتى كۇشەيۋىمەن بىرگە جولدىڭ كوكتايعاققا اينالۋى قاۋپى زور بولىپ تۇر.

قاي كۇندە قاتتى بولاتىن اقپاننىڭ بورانى بيىل تىپتەن اشۋلى. اۋا رايى كۇرت وزگەرگەن ۋاقىتتا وقىس جاعدايلاردى بولدىرماۋ ءۇشىن ءتارتىپ ساقشىلارى جانە توتەنشە جاعداي قىزمەتكەرلەرى جول قىزمەتتەرىنىڭ، جەرگىلىكتى اتقارۋشى ورگانداردىڭ وكىلدەرىمەن بىرگە تىعىز بايلانىستا جۇمىس ىستەۋدە.

بوران قاۋپى بولۋى سەبەپتى الىس جولعا شىعۋدان باس تارتۋ تۋرالى ەسكەرتۋلەر مەن ۇسىنىمدار SMS-حابارلامالار مەن الەۋمەتتىك جەلىلەر ارقىلى جاپپاي جىبەرىلىلىپ جاتىر. بىراق وبلىس تۇرعىندارىنىڭ كەيبىرى بۇعان قاراماي جولعا شىعىپ، قار قۇرساۋىندا قالىپ قويۋدا. سونىڭ ءبىرى عابيت مۇسىرەپوۆ اۋدانىنىڭ 55 جاستاعى تۇرعىنى سەرگەي تاراسوۆ. ول  كەشكىسىن تاحتابرود اۋىلىنان نوۆويشيمسكوە سەلوسىنا بارا جاتقان. «ەكاتەرينبۋرگ-الماتى» تاس جولىنداعى رۋزاەۆكا اۋىلىنىڭ ماڭىندا بوراننىڭ قۇرساۋىنا ءتۇسىپ، العا جۇرۋگە مۇمكىندىگى بولماي، تۇرىپ قالادى. وسى جەردە سەرگەي تاراسوۆ باسقا ازاماتتاردىڭ قاۋىپسىزدىگىن ويلاپ، سمارتفونىنا بەينەۇندەۋ جازىپ الىپ، ءوز تاراپىنان جەرلەستەرىنە وزىنە تونگەن قاۋىپتى كورسەتە وتىرىپ، جولعا شىعۋدىڭ قاۋىپتى ەكەنىن ەسكەرتكەن. اينالاسى ءبىر ساعاتتىڭ ىشىندە ونىڭ ۇندەۋى سولتۇستىكقازاقستاندىق جانە اقمولا وبلىسىنىڭ چاتتارىندا تاراپ كەتتى.

وسى اۋداننىڭ پوليتسيا ءبولىمىنىڭ باستىعى، پوليتسيا پودپولكوۆنيگى ايدوس ءىدىرىسوۆتىڭ ايتۋىنا قاراعاندا 18 اقپان كۇنى قار قۇرساۋىنان 6 فۋرا، 6 «كاماز»، 10 جەڭىل كولىك پەن 2 «گازەل» اۆتوكولىگى شىعارىلعان. جۇرگىزۋشىلەر مەن جولاۋشىلاردىڭ ءبىرشاماسى رۋزاەۆكا سەلوسىنداعى قوناقۇيگە، قالعاندارى ليتسەي جاتاقحاناسىنا ورنالاستىرىلدى. بارلىعى ىستىق تاماقپەن قامتاماسىز ەتىلەدى.

ال جامبىل اۋدانىندا پاترۋلدىك پوليتسەيلەر مەن توتەنشە جاعداي قىزمەتكەرلەرى قىتاي حالىق رەسپۋبليكاسىنىڭ ازاماتىنا دا كومەك كورسەتكەن. بوراننىڭ بولاتىنىن ايتقان ەسكەرتۋلەرگە قاراماي جولعا شىققان 32 جاستاعى دجان سياوبو «Renault Duster» اۆتوكولىگىمەن نۇر-سۇلتان قالاسىنان قايرانكول اۋىلىنا شىعىپ كەتكەن. جولداعى «ۋكراينسكوە» سەلوسىنا 5 كيلومەتر قالعان جەردە ونىڭ كولىگى قالىڭ قارعا كەپتەلىپ، وتە الماي قالعان. ساقشىلار مەن قۇتقارۋشىلاردىڭ، جەرگىلىكتى اتقارۋشى ورگانداردىڭ كۇشىمەن ارنايى تەحنيكا جۇمىلدىرىلىپ، قىتايلىقتىڭ كولىگى قاردان شىعارىلدى. دجان سياوبو دا بەينەجازبا ءتۇسىرىپ، وزىنە كومەك كورسەتكەندەرگە شىن جۇرەكتەن العىسىن ايتتى.

وڭىردە اقپان اقىرىپ، بوران ءالى دە تىنشىماي تۇر. وبلىستىڭ پد باستىعى، پوليتسيا پولكوۆنيگى مارات تولەباەۆ اۋا رايىنىڭ قولايسىزدىعىنا بايلانىستى جەكە قۇرامعا قالا سىرتىنداعى جولداردى تاۋلىك بويى باقىلاۋدى جانە كومەككە مۇقتاج ازاماتتارعا جەدەل تۇردە قول ۇشىن بەرۋدى تاپسىردى. باستى ماقسات – بوران سالدارىنان ەشكىمنىڭ زارداپ شەكپەۋىن قامتاماسىز ەتۋ.

سولتۇستىك قازاقستان وبلىسى

سوڭعى جاڭالىقتار

عاسىر زۇلماتى

قوعام • كەشە

ۇقساس جاڭالىقتار