سولاردىڭ ءبىرى كوكشەتاۋداعى تاماق ونەركاسىبى سالاسىنداعى سەرىكتەستىك قولعا العان ەستۋ-سويلەۋ قابىلەتى ناشار جاندارعا ارنالعان يگىلىكتى جوبا. قۋانىشبەك الپامىسوۆتىڭ اسپاز بولىپ ىستەگەنىنە 8 جىل. ول بۇل ماماندىقتى كوكشەتاۋلىق كاسىپكەردىڭ قولعا العان جوباسى اياسىندا مەڭگەردى. قازىر ءدامى ءتىل ۇيىرەر تاماقتىڭ ءتۇر-ءتۇرىن ازىرلەيدى.
– ارينە, باسىندا قيىن بولدى. ارىپتەستەرمەن جازۋ ارقىلى سويلەسەتىنبىز. بارلىعى قولداۋ كورسەتتى. تۇسىنىستىكپەن قارادى. قازىر ۇيرەنىپ كەتتىك. ءبارىمىز بىردەيمىز. جۇكتەمە دە تەڭ. ۇجىم جاقسى. ماعان ۇنايدى. جالاقىم دا كوڭىلىمنەن شىعادى, دەيدى اسپازشى قۋانىشبەك الپامىسوۆ.
جوبا بويىنشا ەستۋ-سويلەۋ قابىلەتى ناشار جاندار سەرىكتەستىكتە اسپازدىقتىڭ قىر-سىرىن ۇيرەنەدى. كەيىن وزدەرى قالاپ جاتسا, ءالى قاراي جۇمىس ىستەي بەرەدى. سونداي-اق, كوكشەتاۋداعى كوللەدجدە تەگىن ءبىلىم الۋ مۇمكىندىگى بار.
– بۇل جوبا ماعان سەنىمدىلىك بەردى. قوعامدا ەركىن بەيىمدەلۋىمە سەپتىگىن تيگىزدى. قازىر اسپازشى ەمەسپىن. دەگەنمەن بۇل جوبا مەنىڭ ءومىرىمدى وزگەرتتى. ءارى قاراي وقۋعا قۇلشىنىس پايدا بولدى. ومىرلىك سەرىگىممەن دە وسى جوبا اياسىندا تابىستىق, دەيدى جوباعا قاتىسۋشى دميتري سالنيكوۆ.
سەرىكتەستىك جۇزەگە اسىرىپ وتىرعان جوبا بويىنشا وسى ۋاقىتقا دەيىن 45 ادام وقۋ كۋرسىنان وتكەن. ونىڭ 12-ءسى وسى ۇجىمدا جۇمىس ىستەۋدە. قالعاندارى باسقا قالالاردا, وزگە ۇيىمداردا ەڭبەك ەتىپ ءجۇر. ىزگىلىكتى جوبانىڭ اۆتورى ەلەنا ماششينسكايا وقيمىن, ۇيرەنەمىن دەگەندەردىڭ بىردە-ءبىرىنىڭ بەتىن قايتارعان ەمەس.
– الەۋمەتتىك كاسىپكەرلىك قايىرىمدىلىق ەمەس. بۇل ۇلكەن جاۋاپكەرشىلىك. مۇمكىندىگى شەكتەۋلى جانداردى جۇمىسقا بار ىنتاڭمەن الۋ قاجەت. كەيىن ولاردىڭ جەتىستىكتەرىن, جۇزدەرىندەگى قۋانىشتى, جۇمىستىڭ ناتيجەسىن كورۋ سوزبەن ايتىپ جەتكىزە المايتىن باقىت. قورىقپاۋ كەرەك. سەبىبى الەۋمەتتىك كاسىپكەرلىك قازىرگى قوعامعا قاجەت, دەيدى جەكە كاسىپكەر ەلەنا ماششينسكايا.
بۇل جوبامەن شەتەلدىكتەر دە تانىس. بىرنەشە ەلدىڭ اسپازشىلار قاۋىمداستىعى وزدەرىندە وسىنداي يگى ءىستى قولعا الماق نيەتتە. ال كوكشەتاۋداعى جوبا جالعاسا بەرمەك.
كوكشەتاۋ قالاسى
