ايماقتار • 18 اقپان، 2020

مەملەكەتتىك قىزمەتتى ەلەكتروندى تۇردە كورسەتۋ ارتىپ كەلەدى

46 رەتكورسەتىلدى

مەملەكەتتىك قىزمەت ىستەرى اگەنتتىگىنىڭ سولتۇستىك قازاقستان دەپارتامەنتى باسشىسىنىڭ ورىنباسارى جانات جۇماباەۆ جۋىردا 2019 جىلى اتقارعان جۇمىستارىن قورىتىندىلاپ جانە جاڭا جىلداعى جوسپارلاردىڭ ورىندالۋ بارىسى تۋرالى جۋرناليستەرگە بريفينگ بەردى.

ج.جۇماباەۆتىڭ ايتۋىنا قاراعاندا مەملەكەتتىك قىزمەتكەرگە لايىق ەمەس تەرىس قىلىق بويىنشا قىزمەتتەن كەتكەندەر 2018 جىلمەن سالىستىرعاندا بىلتىر 45% -عا ازايعان. وسىنىڭ ارقاسىندا كادرلىق تۇراقتىلىقتى ساقتاۋ كورسەتكىشى جاقسارىپ كەلەدى. ونىڭ 2019 جىلعى ورتاشا ءوتىلى 4 جىلدان 4 جىل 6 ايعا وسكەن. وڭىردە مەملەكەتتىك قىزمەتتەگى ايەل ادامداردىڭ سانى باسىم ەكەنى بايقالىپ وتىر. بارلىق 4 مىڭنان استام مەملەكەتتىك قىزمەتشىنىڭ 63،6% نازىك جاندىلار.

ەسەپتىك جىلى مەملەكەتتىك قىزمەتكە ورنالاسۋعا جاريالانعان 1078  كونكۋرستىڭ 813-ءى، ياعني 75% تومەنگى لاۋازىمدارعا قىزمەتكەرلەر قابىلداۋ ءۇشىن جاريالانعان. بارلىعى 1816 ازامات تەستىلەۋدەن ءوتىپ، ۇمىتكەرلەردىڭ 80% قاجەتتى ءبىلىم دەڭگەيىن كورسەتە العانى قۋانتادى. سونىمەن بىرگە بىلتىر 1794 مەملەكەتتىك قىزمەتشى قايتا دايارلاۋ جانە بىلىكتىلىكتى ارتتىرۋ كۋرستارىنان وتكەن، بۇل 2018 جىلعى كورسەتكىشتەن 117 ادامعا كوپ.

وتكەن جىلعى مەملەكەتتىك قىزمەتتەگى ايرىقشا جاڭالىقتاردىڭ ءبىرى - پرەزيدەنتتىك جاستار كادرلارى رەزەرۆىن جاساقتاۋ بولدى. ەلىمىزدىڭ بارلىق وڭىرىنەن 13 مىڭ جاس بۇل دوداعا قاتىسىپ، 300-ءى ىرىكتەلىپ الىنسا سونىڭ ىشىندە 9 سولتۇستىك قازاقستاندىق بار. بۇل ارينە ازداۋ، بىراق بولاشاقتا جاستار اراسىنداعى بەلسەندىلىكتى ارتتىرۋ باعىتىندا جۇمىس ىستەلەتىن بولادى. قازىر كونكۋرستان وتكەن ءبىر سولتۇستىك قازاقستاندىق جاس ازامات وبلىس اكىمدىگىندە باسقارما باسشىسىنىڭ ورىنباسارى لاۋازىمىندا قىزمەتىن باستاپ كەتتى.

مەملەكەتتىك قىزمەت تۋرالى زاڭنامالار جانە ادەپ كودەكسى تالاپتارىنىڭ ساقتالۋى ءجىتى باقىلاۋعا الىنعان. بۇل ماسەلەمەن وڭىرلىك ادەپ جونىندەگى كەڭەس بەلسەندى جۇمىس جۇرگىزەدى. وتكەن جىلى 2018 جىلمەن سالىستىرعاندا زاڭناما جانە ادەپ تالاپتارىن بۇزعان مەملەكەتتىك قىزمەتشىلەر سانى 3 ەسەگە ازايعان.

زاڭ بۇزۋشىلىقتارىنىڭ الدىن الۋ جانە ازاماتتاردىڭ وتىنىشتەرىن قاراستىرعان 43 تەكسەرىس جۇرگىزىلىپ، 16 ۇسىنىم جاسالدى. وتىنىشپەن كەلگەن ازاماتتاردىڭ 58%-نىڭ بۇزىلعان قۇقى قورعالدى.

دەپارتامەنت قىزمەتىنىڭ ءبىر باعىتى - كورسەتىلەتىن مەملەكەتتىك قىزمەتتەردىڭ ساپاسىن قاداعالاۋ. 2019 جىلى جالپى سانى 4،4 ملن. مەملەكەتتىك قىزمەت كورسەتىلگەن، بۇل 2018 جىلعىدان 200 مىڭعا ارتىق. سونىڭ 82،9% ەلەكتروندىق تۇردە جاسالعان.

قازىرگى تاڭدا تىزىمگە سايكەس 694 مەملەكەتتىك قىزمەت كورسەتۋدىڭ 608-ءى ەلەكتروندىق نىساندا قولجەتىمدى، بۇل 87،6%. ەلەكتروندىق ۇكىمەت پورتالىن قولدانۋ داعدىلارىنا ۇيرەتۋ ءۇشىن جۇيەلىك كەستە جاسالىپ،  825 ساباق وتكىزىلىپتى. «سونىڭ ارقاسىندا ەلەكتروندى قىزمەتتى قولدانا المايتىندار سانى  2018 جىلمەن سالىستىرعاندا بىلتىر ەكى ەسەگە ازايعان. دەپارتامەنت وسى باعىتتاعى جۇمىستاردى بيىل دا جانداندىرا ءتۇسۋدى كوزدەپ وتىر»، دەدى جانات جۇماباەۆ ءوزىنىڭ سوزىندە. كىرىسپە ءسوزىن اياقتاعان سوڭ ول جۋرناليستەردىڭ كوپتەگەن سۇراقتارىنا جاۋاپ بەردى.

 

سولتۇستىك قازاقستان وبلىسى

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار