دوسقاراەۆ تەننيس فەدەراتسياسىنداعى مانساپ جولىن 2011 جىلى «Team Kazakhstan» اكادەمياسىنىڭ باسقارۋشىسى رەتىندە باستاعان. كەيىننەن اتقارۋشى ديرەكتور بولىپ جالعاستىردى, ال 2016 جىلدان بەرى فەدەراتسيا ۆيتسە-پرەزيدەنتى قىزمەتىن اتقاردى.
ەل ىشىلىك جانە بىرقاتار حالىقارالىق ءىرى ءتۋرنيردىڭ بىرنەشە دۇركىن چەمپيونى اتانعان تانىمال قازاقستاندىق تەننيسشى كاسىبي باپكەر رەتىندە دە ايتارلىقتاي ۇلكەن جەتىستىكتەرگە قول جەتكىزدى. التى جىل بويى دەۆيس كۋبوگى مەن فەدەراتسيا كۋبوگىندا ۇلتتىق قۇرامانىڭ كاپيتانى بولدى.
«فەدەراتسيادا قىزمەت اتقارعان جىلدار مەنىڭ ءارى تۇلعا, ءارى كاسىبي باسقارۋشى رەتىندە قالىپتاسۋىما ۇلكەن اسەرىن تيگىزدى. ءدال وسى جەردە مەنىڭ مانسابىم قارقىندى ىلگەرى ءجۇرىپ, باسقارۋشى رەتىندە ءوستىم. قتف پرەزيدەنتى بولات وتەمۇراتوۆقا العىسىم شەكسىز. 2011 جىلى قاراپايىم باپكەر بولعان كەزىمدە ماعان سەنىم ارتىپ, دارىندى جاستاردى دامىتۋعا باعىتتالعان فەدەراتسيانىڭ ەڭ ماڭىزدى جوباسى – «Team Kazakhstan» اكادەمياسىن باسقارۋدى تاپسىردى. كەيىننەن بولات ءجامىت ۇلى بۇكىل قىزمەتىم بارىسىندا كەڭەس بەرىپ, باعىتتاپ تۇردى, ءتيىمدى باسقارۋعا جانە بيىك ناتيجەلەرگە قول جەتكىزۋگە داعدىلادى. ول مەنىڭ ناعىز ۇستازىم بولدى, ونىڭ مول تاجىريبەسى مەن جوعارى بەدەلى ءاردايىم دۇرىس باسقارۋشىلىق شەشىمدەردى قابىلداۋعا كومەكتەستى. مەن ۇلتتىق تەننيستىڭ قارقىندى دامۋىنا اتسالىسقانىمدى ماقتان تۇتامىن جانە جاقىن بولاشاقتا الەم تەننيسىندە جاڭا جۇلدىز تۋىپ, قازاقستاننىڭ ۇلكەن دۋلىعا تۋرنيرىندە ءوز چەمپيونى بولاتىنىنا سەنىمدىمىن», دەيدى د.دوسقاراەۆ.
سونىمەن قاتار بولات وتەمۇراتوۆ دياس دوسقاراەۆقا اتقارعان قىزمەتى ءۇشىن العىسىن ءبىلدىرىپ, ونىڭ جۇمىسقا دەگەن قۇشتارلىعى مەن بەرىلگەندىگىن, سونداي-اق, قازاقستاندا تەننيس سالاسىنىڭ اۋقىمدى دامۋىنا, حالىقارالىق دەڭگەيدە قالىپتاسۋىنا زور ۇلەس قوسقاندىعىنا ءوز ريزاشىلىعىن ءبىلدىردى.
