تارتىنعان جوقپىز. ايتقان ۋاقىتىندا تابالدىرىعىن اتتادىق. ەتتى ەندى ءتۇسىرىپ جاتىر ەكەن. ۇياتتى كىسىلەر بولعان سوڭ با, قازان-وشاقتىڭ قاسىندا تاباق جاساماقشى بولىپ, جيەن اعامنىڭ ءوزى ءجۇر. قوناق كۇتكەندەي ەمەس, ءوڭى قاراۋىتا قابارىپ كەتكەن. قايتا-قايتا «قاپ!» دەپ باسىن شايقاپ قويادى. سويتسەك, كەلىنى قازىنىڭ ورنىنا قارا قابىرعانى سالىپ جىبەرىپتى. اسا ءبىر سەمىز جىلقىدا بولماسا, قارا قابىرعانىڭ ەتەگىنە ماي بايلانبايدى ءارى قوناققا سالاتىن قادىرلى مۇشە دە ەمەس. مۇشە تانىمايتىن كەلىن جازا باسقان.
– ءوزىڭ نەگە ۋاقىتىندا قاداعالامادىڭ؟ – دەيمىز ونسىز دا بۋلىعىپ تۇرعان جيەن اعامىزدىڭ جانىن جەپ, – ەندى قايتادان اس قامدايتىن بولدىڭ. ايىپ-اجىناسىمەن بىرگە. ايىبىنا قۇداڭا شاپان كيگىز, ال, ماعان ات مىنگىزەسىڭ. اۋىز باستىرىق ەسەبىنەن. ايتپەسە بىلەسىڭ عوي, ەلگە جايىپ جىبەرەمىن.
– قويشى-اي, – دەيدى ونسىز دا جەتىسىپ تۇرماعان جيەن اعام, – قازىنى ايتاسىڭ, ومىرتقا دا سالىنباپتى. ساقالدى باسىممەن قازان-وشاققا ارالاسقانىم ۇيات قوي دەپ ەدىم. وسى سەندەر كىسىگە ءمان ۇيرەتكەندە سوندايسىڭدار, كەلىن-كەپشەك ۇيرەنۋ ءۇشىن قازاقتىڭ اس ءمازىرى دەگەن ءبىر پلاكاتتى شىعارىپ, ونىڭ ىشىنە مۇشەلەردىڭ سۋرەتىن سالىپ, اتاۋىن جازىپ قويساڭدار عوي. ءبىز اس ۇيگە ءىلىپ قويار ەدىك. قازان قايناتاتىن كەلىندەر تاباق جاساۋدى دا سودان ۇيرەنەر ەدى. قازىرگى كۇنى بۇرىنعى اتا ءداستۇر ۇمىتىلىپ كەلەدى. قاي قوناققا قانداي مۇشە تارتاتىنىن دا جاستار بىلە بەرمەيدى.
وسى ارادا ءبىر وي كەلگەن. ەرتەرەكتە كوكشەتاۋ قالاسىندا «سىباعا» دەيتىن دۇكەن بولدى. الگى دۇكەندە جاساۋلى تاباق رەت-رەتىمەن سامساپ تۇراتىن. قۇداڭا ما, ناعاشىڭا ما, كۇيەۋ بالاعا ما, كىمگە قالاي تاباق تارتۋ كەرەك, سونىڭ بارلىعى ءجون-جوسىعىمەن, جول-كادەسىمەن دايىندالاتىن. ساتۋشىلارى دا اتا ءداستۇردى جاقسى بىلەتىن. ۇلت ءداستۇرىن بىلە بەرمەيتىن قالا كەلىنشەكتەرىن مايلى ىشەكتەي اينالدىرىپ, سانالارىنىڭ ساڭىلاۋىنا سالتتىڭ سيپاتىن ءسال دە بولسا سەبەزگىلەپ ءسىڭىرىپ جىبەرۋشى ەدى. ەت ساتقان وزدەرىنە دە جاقسى, الارمان جۇرتتىڭ سان عاسىر بويى ۇزىلمەي كەلە جاتقان اتا سالتىنان باستاۋىش ءبىلىم العانى كادىمگىدەي پايدا.
قازىرگى كۇنى قالاداعى جاس وتاۋلار تۇتاس جىلقى سويا المايدى-اۋ. جارتى ەتتىڭ ءوزى جۇك. بالكىم سول جاستار ءۇشىن تاپتىرمايتىن دۇنيە. جاڭادان جاڭالىق ويلاپ تاپقانشا, بۇرىنعى باردى جاڭعىرتسا, سوعىم الۋعا قالتاسى كوتەرە بەرمەيتىن اعايىن ءۇشىن دەمەۋ. قوناق كەلگەندە كەبەجەسىنىڭ ءتۇبىن قاعىپ جاتپاي, كەرەگىن وسىنداي دۇكەننەن الار ەدى. بۇل ەندى كاسىپكەرلەرگە ايتىلعان قۇلاققاعىس. وبلىس ورتالىعىندا وسىنداي ءبىر دۇكەن اشىپ قويسا, ەلدەگى مالساق قاۋىم دا جىلقىسىن بۇلداپ وتكىزەتىن جەر بولادى عوي. ەڭ باستىسى, اعايىننىڭ بىرلىگىن, تۋىستىڭ تۇتاستىعىن نىعىزداي تۇسەتىن ءدام – سىباعا سالتى قايتا جالعاسار ەدى. ايتقاندايىن, سىباعاڭىزدان ءدام تاتىپ ءجۇرسىز بە؟..
