بۇعان دەيىن «جارقىن سك» جشس مەملەكەتتىك قارجى ينستيتۋتتارىنىڭ بىرىنەن ۇلەسكەرلەردىڭ جەر ۇلەسىن كەپىلگە قويىپ, 500 ملن تەڭگەدەن استام سوماعا العان نەسيەسىن قايتارا الماعاندىقتان 42 مىڭ گەكتارداي جەر ۇلەسىن اۋكتسيون ارقىلى ساتۋعا قويعانى تۋرالى حابار ەلىمىزگە تاراعان. بۇل سول اۋدانداعى ءبىر-بىرىمەن كورشى ورنالاسقان بەس قازاق اۋىلى تۇرعىندارىنىڭ جەر ۇلەسى ەكەن. ءبىزدىڭ ەلىمىزدە جەر ساتىلمايتىندىعىن ەسكەرسەك قارجى ينستيتۋتىنىڭ وسىنشا كولەمدەگى جەر ۇلەسىن اۋكتسيونمەن ساتپاق بولعاندىعى بەس اۋىلدىڭ تۇرعىندارىن عانا ەمەس بارشا قازاقستاندىقتى شوشىندىرعان. اۋىل تۇرعىندارى بولسا جينالىپ, نارازىلىقتارىن ءبىلدىرىپ اۋدان اكىمدىگىنە بارعانى تۋرالى اقپاراتتى باق ەلگە جاپپاي تاراتقان.
جەر ۇلەستەرىنىڭ يەلەرى «جارقىن سك» جشس-ءنىڭ قاراماعىنا ءوز ۇلەستەرىن باسقارۋعا بەرگەندە ونى كەپىلگە قويىپ, نەسيە الۋعا كەلىسىم بەرمەگەن. ايتۋلارىنا قاراعاندا, مۇنداي كەلىسىم جاسالماعان. زاڭ بويىنشا مۇندايدا 883 ۇلەسكەردىڭ ارقايسىسى جەكە-جەكە ءوتىنىش بەرىپ, ۇلەستەرىن كەپىلگە قويۋعا كەلىسىم بەرۋلەرى كەرەك ەكەن. الايدا ونداي كەلىسىم جاسالماعان. تەك ۇلەسكەرلەردىڭ جالپى جينالىسىندا «كەلىسىم بەرىلەدى» دەگەن حاتتاما عانا جازىلعان ەكەن. وسى قۇجاتتىڭ نەگىزىندە «جارقىن سك» بۇل جەردى كەپىلگە قويۋعا دا قۇقى جوق كورىنەدى. سونىمەن قاتار قارجى ينستيتۋتى دا وسىنداي كەلىسىمدى كەزىندە نەگە تالاپ ەتپەگەنى تۇسىنىكسىز. سوندىقتان ءبارى دە سول باياعى «بارماق باستى, كوز قىستىعا» ساياتىن سياقتى.
وسىنداي جاعدايعا جول بەرىلگەندىكتەن ايىرتاۋ اۋدانىنىڭ پروكۋراتۋراسى جەر ۇلەسىن اۋكتسيون ارقىلى ساتۋ پروتسەسىن توقتاتقان. سونىمەن قاتار اۋىلدىقتاردىڭ بەرگەن ارىزىنىڭ نەگىزىندە باسقارۋعا بەرگەن جەر ۇلەستەرىن كەلىسىم جاساماي, كەپىلگە قويعانى ءۇشىن «جارقىن سك» جشس ۇستىنەن الاياقتىق بابى بويىنشا قىلمىستىق ءىس قوزعاعان. ەكىنشىدەن, ايىرتاۋ اۋدانىنىڭ پروكۋراتۋراسى ۇلەسكەرلەردىڭ مۇددەسىن قورعاپ, جەر ۇلەستەرىن كەپىلگە قويۋ كەلىسىمشارتى مەن جالپى جينالىس حاتتاماسىن سوت ارقىلى بۇزدىرۋ ءۇشىن بەرىلەتىن تالاپ-ارىزدىڭ ماتەريالدارىن جيناۋدا.
بۇل – اۋىل تۇرعىندارىنىڭ جەر ۇلەستەرىن جيناپ, بىرلەسكەن سەرىكتەستىك قۇرعان اۋىل شارۋاشىلىعى كاسىپورىندارىنىڭ تالايىنىڭ باسىندا جۇرگەن بەلگىلى جايت. مۇنداعى ماسەلەنىڭ وعاشتىعى تەك بەس اۋىلدىڭ جەر ۇلەستەرىن اۋكتسيوننان ساتۋعا جاسالعان قادام. زاڭىمىزدا جەر ساتىلمايدى دەلىنسە دە العان نەسيەسىن قايتارماسا كەپىلگە قويىلعان جەر ۇلەسىن ساتۋعا بولادى ەكەن. دەمەك نەگىزگى زاڭىمىزدىڭ وزىندە شالاعايلىق بار سياقتى. بۇل جەردە ايىرتاۋلىق ۇلەسكەرلەردىڭ جەرلەرىن تەك جشس-مەن ەكىجاقتى جاسالماعان كەلىسىم عانا قۇتقارۋى مۇمكىن. ونى ەندى ادىلەتتى سوت قانا انىقتايدى.
سونىمەن بىرگە «جارقىن سك» جشس ءوزىنىڭ 78 قىزمەتكەرىنە 33,6 ملن تەڭگە ەڭبەكاقى بەرەشەك ەكەندىگى دە بەلگىلى بولىپ وتىر. بۇل بويىنشا ايىرتاۋ اۋدانىنىڭ ءىىب ەڭبەكاقىنى كەشىكتىرگەنى ءۇشىن ەڭبەك زاڭناماسى بۇزىلعان دەگەن باپپەن ءىس قوزعاعان.
سولتۇستىك قازاقستان وبلىسى
