ولار قاردا جۇرگىش «Yamaha» جىلدام كولىگىمەن تابيعاتتىڭ كوركى - سۇلۋ ەلىكتەردى قۋىپ ءجۇرىپ اتقانى بەلگىلى بولدى. براكونەرلەردىڭ جۇك سالعىشتارىنان ءبىر جانە اعاشقا ءىلىپ, مۇشەلەي باستاعان ەكىنشى ەلىكتىڭ ەتى تابىلدى. ء«سىبىر ەلىگى» دەپ اتالاتىن بۇل جانۋارلاردى بارلىق اشا تۇياقتىلارمەن بىرگە ءبىرىنشى قاڭتاردان باستاپ اتۋعا زاڭمەن قاتاڭ تىيىم سالىنعان ەدى. ويتكەنى بۇل كەزەڭنەن جانۋارلاردىڭ تولدەۋگە دايىندالاتىن كەزەڭى باستالادى.
بىراق اشكوز براكونەرلەر زاڭدى دا, تابيعاتتىڭ كوركىن دە اياققا باسىپ, سۇلۋ ەلىكتەردى قىزىل قانعا بوياعان. وركەنيەتى جوعارى دامىعان ەۋروپالىق ەلدەردە مۇندايعا اسا اۋىر جازالار بەلگىلەنگەن. ال بىزدە زاڭسىز اڭ اۋلاۋدى جازالاۋ جونىندەگى زاڭناماعا ۇستىمىزدەگى جىلدىڭ 11 قاڭتارىنان باستاپ ەنگىزىلگەن قاتاڭداتۋ وزگەرىستەرى مەن تولىقتىرۋلارعا سايكەس ءۇش مىڭ اەك كولەمىندە ايىپپۇل سالىنادى. بۇرىن بۇل جازا بار بولعانى 160 اەك كولەمىندەگى ايىپپۇلمەن نەمەسە 40 تاۋلىككە دەيىنگى باس ەركىنەن ايىرۋ جازاسىمەن شەكتەلگەن ەدى. ەندى باس ەركىنەن ايىرۋ جازاسى 3 جىلعا دەيىن ۇزارتىلدى.
قازىر اڭ اۋلاۋ زاڭناماسىن بۇزعان پەتروپاۆل قالاسىنىڭ وتىز بەس جاسار تۇرعىنىنا قارسى سوتقا دەيىنگى تەرگەپ-تەكسەرۋ شارالارى جۇرگىزىلىپ جاتىر. ودان قىلمىس ورنىنان الىنعان ەكى ەلىكتىڭ ەتى, ەسەپكە قويىلماعان قاردا جۇرەتىن كولىگى, 12 كاليبرلى تەگىس ۇڭعىلى «يج» مىلتىعى, اڭشى پىشاعى, سونداي-اق, وق-دارىلەر الىنعان. سونىمەن بىرگە ونىڭ جانىنداعى ادامنىڭ قىلمىسقا قاتىستىلىعى تەكسەرىلۋدە دەيدى وبلىستىق پوليتسيا دەپارتامەنتىنىڭ ءباسپاسوز قىزمەتى. اڭدا بىرگە جۇرگەن ادامنىڭ «اڭ اۋلاۋعا قاتىستىلىعى انىقتالۋدا» دەگەننىڭ ءوزى كۇماندى ويلار تۋدىراتىنى ءسوزسىز...
«بۇل - جىل باسىنان بەرى انىقتالعان زاڭسىز اڭ اۋلاۋدىڭ 5-ءشى, ال «براكونەر» جەدەل-پروفيلاكتيكالىق ءىس-شاراسى كەزىندە انىقتالعان 4 فاكتى بولىپ وتىر, - دەيدى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى تابيعاتتى قورعاۋ پوليتسياسى توبىنىڭ اعا ينسپەكتورى, پوليتسيا كاپيتانى اسحات قوجاباەۆ. – ۇرعاشى ەلىكتىڭ بۋاز ەكەندىگىن انىقتاۋ ءۇشىن مۇشەلەنگەن ەت ساراپتاماعا جىبەرىلدى, بۇل سالىناتىن ايىپپۇل كولەمىن انىقتايتىن فاكتورلاردىڭ ءبىرى».
سولتۇستىك قازاقستان وبلىسى
