مۇنداي جاعدايدا قارۋ يەلەرى «جەكەلەگەن قارۋ تۇرلەرىنىڭ اينالىمىنا مەملەكەتتىك باقىلاۋ جاساۋ تۋرالى» زاڭعا سايكەس قارۋ ۇستاۋ قۇقىعىنان ءۇش جىل مەرزىمىندە ايىرىلادى.
قارۋىنان ايرىلعاندار اراسىندا پەتروپاۆل قالاسىنىڭ 36 جاسار تۇرعىنى بولدى. ءوز تاراپىنان ول ەكى بىردەي بۇزۋشىلىققا جول بەرگەن. بىرىنشىدەن, وزىنە تيەسىلى ءۇش اڭشى مىلتىعىنىڭ قايتا تىركەۋ مەرزىمىن وتكىزىپ العان. ەكىنشىدەن قارۋدىڭ ساقتالۋىن تەكسەرۋ كەزىندە سەيف دابىلىنىڭ ىستەمەيتىنى انىقتالعان. ءسويتىپ ول تەگىس ۇڭعىلى 12 كاليبرلى يج-54 جانە «Ata Arms», سونداي-اق 7,62 مم كاليبرلى «ۆەپر 308» ويىقتى اڭشى كارابينىنەن ايرىلدى.
«قايتا تىركەۋ مەرزىمىن وتكىزىپ الۋ – اڭشىلاردىڭ تاراپىنان ءجيى جىبەرىلەتىن بۇزۋشىلىقتاردىڭ ءبىرى», - دەدى سقو پوليتسيا دەپارتامەنتى اكىمشىلىك پوليتسيا باسقارماسى ازاماتتىق جانە قىزمەتتىك قارۋ اينالىمىن باقىلاۋ توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا مايورى قۇرمان مۋسين.
– «ازاماتتىق قارۋدى ساقتاۋعا جانە الىپ جۇرۋگە رۇقسات بەس جىلعا بەرىلەدى. بۇل مەرزىم ءوتىپ كەتپەي تۇرىپ, جاڭا رۇقسات راسىمدەۋ قاجەت. ادامدارعا ىڭعايلى بولۋ ءۇشىن جانە سىبايلاس جەمقورلىق تۋدىراتىن فاكتورلاردى جويۋ ماقساتىندا اتالعان مەملەكەتتىك قىزمەت «ەلەكتروندىق ۇكىمەت» پورتالى ارقىلى ەلەكتروندى تۇردە كورسەتىلەدى. الايدا, ادامداردىڭ كوبى ءتۇرلى سەبەپتەرمەن بۇل قىزمەتكە ۋاقتىلى جۇگىنۋدى ۇمىتىپ جاتادى», - دەدى ول.
قارۋ يەلەرىنىڭ تۇرعىلىقتى مەكەن-جايىن اۋىستىرعانى جايىندا پوليتسيانى حاباردار ەتپەيتىن جاعدايلار دا كەزدەسىپ تۇرادى ەكەن. ال بۇل مىندەتتى تالاپ. سونىمەن قاتار قارۋدى ساقتاۋ مەن تىركەۋ رەجىمى قارۋ يەسىنىڭ قايتىس بولعانىندا ءجيى بۇزىلادى ەكەن. مۇنداي جاعدايدا مۇراگەرلەرى ءبىر اي مەرزىم ىشىندە قارۋدى اۋماقتىق پوليتسيا بولىمىنە تاپسىرۋى نەمەسە ونى قايتا تىركەتىپ, كوميسسيالىق ساتۋ تۋرالى شەشىم قابىلداۋى قاجەت. بۇل تالاپ ورىندالماسا قارۋ تاركىلەنەتىن كورىنەدى.
سونداي-اق تىركەلگەن قارۋدى ساقتاۋ ەرەجەلەرىنىڭ بۇزۋشىلىقتارى دا جوق ەمەس. قاڭتار ايىندا عانا وسىنداي 49 فاكتىگە جول بەرىلگەن. سەيفتى قارۋىمەن قوسا ۇرلاۋدى بولدىرماس ءۇشىن پوليتسەيلەر قارۋ سالىنعان سەيفتى ەدەنگە نەمەسە قابىرعاعا بەكىتۋ قاجەتتىگىن, سونىمەن قاتار سەيف قابىرعاسىنىڭ قالىڭدىعى 3 مم كەم بولماۋى ءتيىس ەكەندىگىن, قالا تۇرعىندارى ءۇشىن سەيفتە, نە پاتەردە دابىل ورناتىلۋى قاجەتتىگىن ەسكەرتىپ وتىرادى. قارۋ ۇستاۋدىڭ وسىنداي ماشاقاتتارى بارىن ۇمىتپاعان ءجون. وبلىستا ءبىر اي ىشىندە پوليتسەيلەر 624 قارۋ يەسىن تەكسەرىپ, ناتيجەسىندە 92 بۇزۋشىلىقتى انىقتادى.
سولتۇستىك قازاقستان وبلىسى
