سەناتورلار كەزدەسۋ بارىسىندا ەۋروپا كەڭەسىمەن ارىپتەستىك قارىم-قاتىناستاردى دامىتۋ مەن ەلىمىزدىڭ وسى ىنتىماقتاستىق ساپاسىن ارتتىرۋ جونىندەگى نيەتىنىڭ ماڭىزىن اتاپ ءوتتى.
ەۋروپالىق پارلامەنتشىلەر ەۋروپالىق بىرقاتار كونۆەنتسيالارعا قوسىلۋ جونىندەگى قازاقستاندا قولعا الانعان جۇمىستارىمەن جانە ەۋروپا كەڭەسىنىڭ قازاقستانداعى كەڭسەسىن اشۋ جونىندەگى جوسپارلارىمەن تانىستى. قازاقستاندىق دەپۋتاتتاردىڭ ەلىمىزدە جۇرگىزىلىپ جاتقان ساياسي رەفورمالار تۋرالى, ونىڭ ىشىندە مەملەكەتتىك باسقارۋ جۇيەسىن دەموكراتيالاندىرۋ, كوپپارتيالىق جانە ازاماتتىق قوعامدى دامىتۋ جونىندەگى اقپاراتى جۇزدەسۋشىلەردىڭ نازارىن اۋداردى.
ەكپا-داعى لاتىش دەلەگاتسياسىنىڭ جەتەكشىسى, پارلامەنتتىك اسسامبلەيانىڭ ۆيتسە-پرەزيدەنتى ي.ليبينيا-ەگنەرە ەكى ەل اراسىندا سەنىمدى ساياسي ديالوگ قالىپتاسقانىن, ونىڭ اياسىندا ساياسي, ەكونوميكالىق جانە مادەني تىعىز بايلانىستار دامىپ كەلە جاتقانىن اتاپ ءوتتى. لاتۆيا سەيمىنىڭ ۆيتسە-سپيكەرى پارلامەنتارالىق ۇنقاتىسۋ, ونىڭ ىشىندە پارلامەنتتىك اسسامبلەيا اياسىنداعى تىعىز ىنتىماقتاستىقتى دامىتۋ تۋرالى ايتا كەلىپ, قازاقستاندىق دەپۋتاتتاردى لاتۆياعا كەلۋگە شاقىردى.
رۋمىن دەپۋتاتتارى يۋ.بۋلاي, ا.نيكولاە جانە ۆ.بادەا ساۋدا-ەكونوميكالىق كووپەراتسيانى ءارتاراپتاندىرۋ, ەكى ەلدىڭ ترانزيتتىك-كولىكتىك الەۋەتىن دامىتۋ جانە ستۋدەنتتەر الماسۋمەن بىرگە مادەني-گۋمانيتارلىق بايلانىستاردى ورىستەتۋگە قارقىن بەرۋ تۋرالى ايتا كەلىپ, قازاقستان مەن رۋمىنيا اراسىنداعى ەكىجاقتى ىنتىماقتاستىق دەڭگەيىن جوعارى باعالادى. رۋمىن پارلامەنتىنىڭ جوعارعى پالاتاسىندا شەتەلدەگى رۋمىن دياسپوراسىمەن بايلانىس ماسەلەلەرىنە جاۋاپ بەرەتىن ۆ.بادەا قازاقستاندا تۇراتىن ەتنيكالىق رۋمىندار ەكى مەملەكەت اراسىنداعى كوپىر ەكەنىن اتاپ ءوتتى. بۇل رەتتە ەتنوسارالىق كەلىسىمنىڭ قازاقستاندىق ۇلگىسىنىڭ ەرەكشەلىگى مەن قازاقستان حالقى اسسامبلەياسى سەكىلدى ينستيتۋتتىڭ ماڭىزى اتاپ ءوتىلدى. تاراپتار كەزدەسۋ سوڭىندا ەكى ەلدىڭ پارلامەنتتەرىندە جۇمىس ىستەيتىن دوستىق توپتارىنىڭ بايلانىسى بويىنشا پارلامەنتارالىق ىنتىماقتاستىقتى تەرەڭدەتۋدى جاقتايتىنىن ايتتى.
