ەلىمىزدەگى مۋزەي ءىسىن جاڭعىرتۋ اياسىندا وتاندىق مۋزەيلەر قورىنداعى ەكسپوناتتاردىڭ 3D ۇلگىلەرىنىڭ تسيفرلىق كاتالوگىن قۇرۋ بويىنشا جۇمىستار جۇرگىزىلىپ جاتىر.
2018-2019 جىلدارى قازاقستان رەسپۋبليكاسىنىڭ ورتالىق مەملەكەتتىك مۋزەيىنىڭ قازاقستاننىڭ ارحەولوگيالىق التىندارى جانە ەتنوگرافيالىق كوللەكتسياسىنان 1020 قۇندىلىقتىڭ تسيفرلىق كوشىرمەسى مەن 3D نۇسقاسى جاسالدى.
ءا. قاستەەۆ اتىنداعى مەملەكەتتىك ونەر مۋزەيىندە تسيفرلاندىرۋ نەگىزگى ەكى باعىتتا جۇرگىزىلەدى. كولەمدى جادىگەرلەردىڭ 3D كوشىرمەسىنىڭ تسيفرلىق مۇراعاتىن جاساۋ باعىتىندا 3D زەرتحانا جاساقتالدى, وندا فوتوگراممەتريا ادىسىمەن 3D سكانەرلەۋ تەحنولوگياسى قاراستىرىلعان. وسى تەحنولوگيا بويىنشا 3D تسيفرلىق مۇراعاتى جاسالىپ, وعان 300 بىرلىكتەن استام ءمۇسىن ونەرىنىڭ قورى ەنگىزىلدى. 2019 جىلى 3D سكانەرلەۋ ۇدەرىسىن وڭتايلاندىرۋدىڭ ارقاسىندا بۇدان ەكى ەسە كوپ جادىگەرلەر تسيفرلاندىرىلدى.
2D تسيفرلىق سۋرەتتەر مۇراعاتىن تولىقتىرۋ جۇمىستارى جالعاسۋدا. قازىر تسيفرلاندىرىلعان جادىگەرلەر سانى - 16 100 بىرلىك.
بۇدان باسقا, ۇلتتىق مۋزەي بازاسىندا «مۋزەي قورىنىڭ مەملەكەتتىك كاتالوگى» جانە «قاسيەتتى قازاقستان بويىنشا ۆيرتۋالدى تۋرلار» جوبالارىنىڭ پيلوتتىق نۇسقاسى ىسكە قوسىلدى.
«مۋزەي قورىنىڭ مەملەكەتتىك كاتالوگى» جۇيەسى پايدالانۋشىعا قر مۋزەي قورىنداعى كەز كەلگەن ەكسپوناتتىڭ 3D ۇلگىسىنە شاپشاڭ كىرۋگە مۇمكىندىك بەرەدى.
«قاسيەتتى قازاقستان بويىنشا ۆيرتۋالدى تۋرلار» تىزىمىنە ەنگەن نىساندار ونلاين رەجيمىندە تاماشالاۋ ءۇشىن قولجەتىمدى. پيلوتتىق جوبالاردىڭ ناتيجەسى بويىنشا قاجەتتى وزگەرىستەردى ەنگىزە وتىرىپ, ولاردى رەسپۋبليكا مۋزەيلەرىنە دە تاراتۋ جوسپارلانۋدا. سونداي-اق بيىل قازاقستاننىڭ 29 كيەلى ورنى 3D فورماتقا ءتۇسىرىلدى. وسى ىسپەتتەس جوبالار كىتاپحانالاردا دا ىسكە اسىرىلۋدا. بۇل جۇمىس كىتاپحانا قورىنداعى الەۋمەتتىك-ماڭىزدى قۇجاتتاردى تسيفرلاندىرۋعا, وڭىرلەردىڭ تسيفرلىق كوللەكتسيالارىن قۇرىپ, ماڭىزدى قۇجاتتاردىڭ ەلەكتروندىق كوللەكتسيالارىن جاساۋعا مۇمكىندىك بەرەدى.
«قازاقستاننىڭ ۇلتتىق ەلەكتروندىق كىتاپحاناسى» اقپاراتتىق كىتاپحانالىق جۇيەسىندە ساندىق جۇيەگە تۇسىرىلگەن كىتاپحانا رەسۋرستارى جيناقتالعان. جوبا وپەراتورى - قر ۇلتتىق اكادەميالىق كىتاپحاناسى.
سوڭعى ەكى جىلدا «قازاقستاننىڭ ۇلتتىق ەلەكتروندىق كىتاپحاناسى» قورىنداعى قۇجاتتاردىڭ ەلەكتروندىق كوشىرمەلەرىنىڭ سانى ەكى ەسەگە ارتىپ, بيىل 58 مىڭنان استام دانانى (2015 جىلى – 22 047 دانا) قۇرادى. 2019 جىلى پورتال كونتەنتى 11 021 قۇجاتپەن تولىقتى. جالپى, كوشىرىلگەن قۇجاتتار سانى 707 955 بىرلىكتى قۇراپ وتىر. سونداي-اق ەلەكتروندى كىتاپحانا قىزمەتىن پايدالانۋشىلار سانى 200 مىڭ ادامدى قۇرادى, ونىڭ ىشىندە شەت ەلدەن 99 سەانس تىركەلگەن.
كينەماتوگرافيا سالاسىندا «ەر تارعىن» وپەراسى, «قوش بول, مەدەۋ» ءفيلمىنىڭ پرەمەراسى, «شاكەن ايمانوۆ» دەرەكتى ءفيلمى جانە ت.ب. 3 000-نان استام كينوقۇجاتتاردىڭ تسيفرلىق كوشىرمەلەرى HD فورماتىنا كوشىرىلدى. سونىمەن قاتار 500 دانادان استام كينوقۇجاتتاردىڭ 4D فورماتىنداعى تسيفرلىق كوشىرمەلەرى جاسالدى.
