وبلىس اكىمىنىڭ ءباسپاسوز قىزمەتى تاراتقان دەرەككە سايكەس, قازىر اۋماقتاعى باقىلاۋ شارالارى كۇشەيتىلگەن. مەملەكەتتىك شەكارا جابىق. ال قىتايمەن ساۋدا-ساتتىق بايلانىس جاسايتىن «قورعاس» حالىقارالىق شەكارا ماڭى ىنتىماقتاستىعى ورتالىعىنىڭ جۇمىسى 15 اقپانعا دەيىن توقتاتىلعان. بۇل ورتالىققا قوس تاراپتان كۇن سايىن 3 مىڭنان 5 مىڭعا دەيىن ادام كىرىپ-شىعىپ, ساۋدا ءتۋريزمىنىڭ قىزمەتىن پايدالاناتىن ەدى. قاۋىپ سەيىلمەسە, شەكتەۋ مەرزىمى ۇزارتىلادى.
سونداي-اق, كورشى ەل شەكاراسىنا جاقىن ماڭداعى ايماق تۇرعىندارىن جۇقپالى ىندەتتىڭ بەلگىلەرى بويىنشا تەكسەرۋ جۇمىستارى باستى نازاردا تۇر.
سوڭعى كۇندەرى الماتى وبلىسىنىڭ پانفيلوۆ اۋدانىندا ورنالاسقان «نۇر جولى» كەدەن بەكەتىنەن 20 جولاۋشى قازاقستان جاعىنا وتكەن. ولار نەگىزىنەن قىتايدىڭ قۇلجا مەن گۋانچجوۋ ايماعىنان ورالعاندار ەكەن. تەكسەرۋ كەزىندە 2 ازاماتتىڭ دەنە قىزۋى جوعارى ەكەنى انىقتالعان. ارنايى قۇرىلعى ادام تەمپۋراتۋراسىنىڭ 37,5 ەكەنىن كورسەتكەسىن, ەكى جولاۋشى دا وقشاۋلانعان. قازىر ەكەۋى دە پانفيلوۆ اۋداندىق اۋرۋحاناسىنىڭ ينفەكتسيالىق بولىمىنە جاتقىزىلعان. دارىگەرلەر قاجەتتى لابوراتوريالىق زەرتتەۋلەر العان. قان قۇرامىنىڭ سىناماسى 3 كۇن ىشىندە دايىن بولادى ەكەن. ال ولارمەن ءبىر اۆتوبۋستا بولعان 19 ادام دا دارىگەرلەردىڭ باقىلاۋىنا الىنعان.
– ءوڭىر تۇرعىندارىنا كوروناۆيرۋستان قاۋىپ تونگەن جوق. كۇدىك تۋعانى راس. ماماندار جەدەل تەكسەرىپ, ناۋقاستىڭ دياگنوزىن انىقتاۋدا. ال شەكارا ماڭىنداعى ءار بەكەتتە وقشاۋلاۋ بولمەلەرى اشىلدى. ارنايى ورىن توسەك, جابدىق جانە باسقا دا قاجەت زاتتارمەن جابدىقتالدى. اۋماقتاعى بارلىق مەديتسينالىق مەكەمەلەرى قالىپتى جۇمىس ىستەپ تۇر. ماماندار وباعا قارسى ارنايى كوستيۋم, قورعانىسقا قاجەت كەرەك-جاراقپەن قامتاماسىز ەتىلگەن, – دەدى بىزگە الماتى وبلىسى اكىمىنىڭ ءباسپاسوز حاتشىسى عالىمۇرات جۇكەل.
الماتى وبلىسى
