اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە وتكەن باسقوسۋعا بولاشاق پەداگوگ ماماندار قاتىستى.
اتاپ ايتقاندا, مينيستر ءال-فارابي اتىنداعى قازاق ۇلتتىق ۋنيۆەرسيتەتى, قازاق ۇلتتىق قىزدار پەداگوگيكالىق ۋنيۆەرسيتەتى, اباي اتىنداعى قازاق ۇلتتىق پەداگوگيكالىق ۋنيۆەرسيتەتى مەن ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتتەرىمەن سالاداعى تۇيتكىلدى تاقىرىپتار توڭىرەگىندە اڭگىمە ءوربىتتى.
– جاقىندا ءبىلىم بەرۋ سالاسى بويىنشا ەكى ماڭىزدى قۇجات قابىلداندى. اتاپ ايتقاندا, 2020-2025 جىلدارعا ارنالعان ءبىلىم مەن عىلىمدى دامىتۋدىڭ جاڭا مەملەكەتتىك باعدارلاماسى مەن «پەداگوگ مارتەبەسى تۋرالى» زاڭ. بۇل قۇجاتتار پەداگوگيكالىق قىزمەتكەرلەردىڭ جۇمىس جاعدايىن جاقسارتۋ مەن ءبىلىم ساپاسىن ارتتىرۋعا باعىتتالعان. سونىمەن قاتار اتتەستاتتاۋدىڭ جاڭا فورماتىنىڭ قورىتىندىسى بويىنشا 156 مىڭنان استام پەداگوگكە بىلىكتىلىك ساناتى بەرىلدى. بۇل ءوز كەزەگىندە مۇعالىمدەرگە 30-دان 50 پايىزعا دەيىن قوسىمشا اقى تولەۋگە مۇمكىندىك بەردى, - دەپ اتاپ ءوتتى مينيستر.
سونداي-اق ەلىمىزدىڭ باس پەداگوگى بالالاردى ماڭىزدى اقپاراتتى دۇرىس تاڭداۋعا جانە ءبىلىمدى تاجىريبەدە قولدانۋعا ۇيرەتەتىن جاڭارتىلعان مازمۇنداعى وقۋ باعدارلامالارىنىڭ ارتىقشىلىقتارىن ءتۇسىندىردى.
كەزدەسۋدە «جاڭا زاڭ وسكەلەڭ ۇراق تاربيەسىنە ارالاساتىن پەداگوگ ماماندار ءۇشىن قانداي مۇمكىندىكتەر بەرەدى؟», «الداعى ۋاقىتتا ەلىمىزدەگى ءبىلىمنىڭ ساپاسى ارتا ما, جەرگىلىكتى جەرلەردە مەكتەپتەر جەتىسپەۋشىلىگى شەشىلىپ, ماتەريالدىق بازاسى جاڭارا ما, الىس ايماقتارعا پەداگوگ ماماندار بارا الا ما؟» سىندى سۇراقتار قاۋزالدى.
سونىمەن قاتار ۆەدومستۆو باسشىسى ءبىلىم سالاسىن جاقسارتۋعا باعىتتالعان كەشەندى جۇمىستار جايىندا دا اتاپ ءوتتى.
ەركىن ديالوگقا قۇرىلعان جيىن بارىسىندا ستۋدەنتتەر وزدەرىن تولعاندىرعان سۇراقتارعا جاۋاپ الىپ, ۇسىنىستارىن ءبىلدىردى.
ساۋالداردىڭ باسىم بولىگى جوعارى وقۋ ورىندارى مەن مەكتەپتەردەگى زەرتحانالاردىڭ زاماناۋي تالاپتارعا ساي كەلمەۋىمەن, جەكەلەگەن پاندەردى وقىتۋدا كەزدەسەتىن قيىندىقتار مەن وقۋلىقتار ساپاسى, ءداستۇرلى ءبىلىم بەرۋ مەن دۋالدى وقىتۋ جۇيەسىندەگى ماسەلەلەردى قامتيدى.
