قازىرگى تاڭدا قۇرامىندا 29 اسكەري قىزمەتشىسى بار قازاقستاندىق بىتىمگەرشىلىك پولكىنىڭ ءتورتىنشى بىتىمگەرشىلىك روتاسى ۇندىستانداعى نيۋ-دەلي قالاسىندا.
ءبىر اي بويى ولارمەن دايىندىق بويىنشا ساباقتار وتكىزىلەدى. ماسەلەن, بەكەتتەر بلوگىندا جانە باقىلاۋ پۋنكتتەرىندە قىزمەت اتقارۋ, بازانى كۇزەتۋ جانە جاياۋ تارتىپتە جانە اۆتوموبيل تەحنيكاسىندا پاترۋلدەۋ بويىنشا ساباقتار.
وقۋ بارىسىندا بۇۇ-نىڭ ۇيىمداستىرىلۋى مەن قۇرىلىمى, ليۆان رەسپۋبليكاسىنىڭ گەوگرافيالىق ورنالاسۋى جانە ميسسيانى ورىنداۋ كەزىندە بىتىمگەرشىلىك كۇشتەرىنىڭ كونتينگەنتىن باسشىلىققا الاتىن نەگىزگى نورماتيۆتىك-قۇقىقتىق اكتىلەر قارالىپ, تۇسىندىرىلەتىن بولادى.
2020 جىلى مامىر ايىندا ليۆانعا «ليۆانداعى بۇۇ ۋاقىتشا كۇشتەرى» بىتىمگەرشىلىك ميسسياسىن ورىنداۋ ءۇشىن 4-ءشى بىتىمگەرشىلىك روتاسى اتتانادى. قازاقستاندىق روتا بىتىمگەرشىلىك ميسسياسىن ءۇندى باتالونى قۇرامىندا ورىندايتىن بولادى.
