ۇكىمەت • 29 قاڭتار، 2020

مۇحتار تىلەۋبەردى حايكو مااسپەن كەزدەستى

40 رەتكورسەتىلدى

بەرلينگە جۇمىس ساپارى بارىسىندا قازاقستان رەسپۋبليكاسىنىڭ سىرتقى ىستەر ءمينيسترى مۇحتار تىلەۋبەردى گفر فەدەرالدىق سىرتقى ىستەر ءمينيسترى حايكو مااسپەن وتكەن جىلعى جەلتوقساندا پرەزيدەنت قاسىم-جومارت توقاەۆتىڭ گەرمانياعا العاشقى رەسمي ساپارى بارىسىندا قول جەتكىزىلگەن ەكىجاقتى ۋاعدالاستىقتاردى جۇزەگە اسىرۋ بويىنشا «ساعاتتاردى تەڭىستەرۋ» ءۇشىن كەزدەستى. تاراپتار، سونداي-اق الداعى كەزدەسۋلەر مەن جوعارى دەڭگەيدەگى ساپارلاردىڭ كۇنتىزبەلىك جوسپارىن تالقىلادى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.

گەرمانيا ءسىم باسشىسى ح. مااس پرەزيدەنتتىڭ بەيبىت جينالىستار بوستاندىعى، ساياسي پارتيالاردى قالىپتاستىرۋ، ءولىم جازاسىن جويۋ جانە ت.ب. سالالاردا جۇرگىزىپ جاتقان رەفورمالارىن جوعارى باعالادى.

سونىمەن قاتار م. تىلەۋبەردى گفر ءىرى كومپانيالارىنىڭ باسشىلارىمەن بىرقاتار ەكىجاقتى كەزدەسۋ وتكىزىپ، قالدىقتاردى قايتا وڭدەۋ جانە كادەگە جاراتۋ، كولىك-لوگيستيكالىق بيزنەستى دامىتۋ، تسيفرلاندىرۋ جانە اقپاراتتىق تەحنولوگيالار سالاسىنداعى ىنتىماقتاستىقتى ارتتىرۋ مۇمكىندىكتەرى مەن ناقتى جوبالاردى تالقىلادى.

نەمىس بيزنەسمەندەرى پرەزيدەنت ق. توقاەۆتىڭ گفر-عا جەلتوقسان ايىندا جاساعان ساپارىنىڭ قورىتىندىسىن، ولارعا ۇسىنىلعان نەمىس كومپانيالارى ءۇشىن قولداۋدىڭ بىرەگەي شارتتارىن جانە پرەمەر-ءمينيستردىڭ ورىنباسارى توراعالىعىمەن گەرمان ينۆەستورلارىمەن ءوزارا ءىس-قيمىل جاساۋ ءۇشىن ارنايى جۇمىس توبىن قۇرۋىن جاعىمدى باعالادى. سول كۇنى قازاقستان ءسىم باسشىسى گەرمان تاراپىنىڭ شاقىرۋىمەن قۇرمەتتى قوناق رەتىندە گەرمان ەكونوميكاسى شىعىس كوميتەتىنىڭ (گەشك) جاڭاجىلدىق قابىلداۋىندا ءسوز سويلەدى. ءىس-شاراعا گفر، شىعىس ەۋروپا جانە ورتالىق ازيا ەلدەرىنىڭ مەملەكەتتىك ورگاندارىنىڭ باسشىلارى، جەتەكشى گەرمان كومپانيالارى مەن بيزنەس-قاۋىمداستىقتاردىڭ باسشىلارى قاتىستى.

مينيستر م. تىلەۋبەردى ءوز سوزىندە ەكى ەلدىڭ بيزنەس قوعامداستىقتارى اراسىنداعى ىسكەرلىك بايلانىستاردى نىعايتۋعا قوسقان قوماقتى ۇلەسى ءۇشىن شكگە-گە العىسىن ءبىلدىردى. ء«بىز ءۇشىن گفر - ەۋرووداقتاعى نەگىزگى سەرىكتەس. ءبىز گەرمانيا قازاقستانمەن ىنتىماقتاستىققا اسا ماڭىزدى ءمان بەرەتىنىنە قۋانىشتىمىز. ءبىزدىڭ ەلىمىزگە گەرمانيانىڭ ورتالىق ازيامەن تاۋار اينالىمىنىڭ 86% كەلەدى. قازاقستاندا جۇمىس ىستەيتىن 900-گە جۋىق نەمىس كومپانياسى ءبىزدىڭ ەكونوميكانى جاڭعىرتۋ مەن دامىتۋعا ەلەۋلى ۇلەس قوسۋدا» دەپ تۇيىندەدى سىرتقى ساياسي ۆەدومستۆو باسشىسى.

مينيستر نەمىس بيزنەسمەندەرىن قازاقستانعا ينۆەستيتسيا سالۋعا شاقىرىپ، قازاقستاندىق نارىقتىڭ ينۆەستيتسيالىق تارتىمدىلىعىن ارتتىراتىن جانە ءوزارا ءتيىمدى قىزمەت ءۇشىن مۇمكىندىكتەردى ايتارلىقتاي كەڭەيتەتىن بىرقاتار پرەفەرەنتسيا مەن جەڭىلدىكتى شارتتاردى اتاپ ءوتتى. ىسكەرلىك توپتار قر-داعى ينۆەستيتسيالىق جوبالارىن جانە قاتىسۋىن ارتتىرۋعا مۇددەلى ەكەندىكتەرىن ءبىلدىرىپ، سونداي-اق، نەمىس جوبالارىنا قازاقستان رەسپۋبليكاسىنىڭ باسشىلىعىنا ەرەكشە كوڭىل بولگەنى ءۇشىن العىس ءبىلدىردى.

ءىس-شارا اياسىندا م. تىلەۋبەردى گفر ەكونوميكا جانە ەنەرگەتيكا فەدەرالدىق ءمينيسترى پەتەر التمايەرمەن كەزدەسىپ، ول قازاقستان باسشىلىعىنا نەمىس بيزنەسىنە ەرەكشە نازار اۋدارعانى ءۇشىن، گەرمانيانىڭ قازاقستاندىق نارىققا قاتىسۋىن كەڭەيتۋگە جانە ءبىزدىڭ ەلىمىزگە جانە جالپى وڭىرگە ينۆەستيتسيالاردى ارتتىرۋعا ءازىر ەكەندىگى ءۇشىن العىسىن ءبىلدىردى. ول اعىمداعى جىلدىڭ ماۋسىم ايىندا دسۇ-نىڭ 12-ءشى مينيسترلىك كونفەرەنتسياسىنا قاتىسۋ ءۇشىن نۇر-سۇلتان قالاسىنا ساپار جاساۋعا دايىندىعىن راستادى.

قازاقستان ءسىم باسشىسىنىڭ بەرلينگە ساپارى مەملەكەت باسشىسىنىڭ 2019 جىلعى جەلتوقسانداعى رەسمي ساپارى بارىسىندا بەرىلگەن ەكىجاقتى ءوزارا ءىس-قيمىلدىڭ جوعارى قارقىنىن راستادى. 

گەرمان ەكونوميكاسىنىڭ شىعىس كوميتەتى 1952 جىلى قۇرىلعان. ۇيىمنىڭ نەگىزگى ماقساتى - شەتەلدەگى گەرمان بيزنەسىن قولداۋ، قۇقىقتىق قاۋىپسىزدىك پەن نورماتيۆتىك تالاپتاردى قامتاماسىز ەتۋ، ساۋدا جانە ۆيزالىق كەدەرگىلەردى جويۋ، جالپىەۋروپالىق ەكونوميكالىق كەڭىستىك قۇرۋ. ستارتاپ پەن وتباسىلىق كومپانيالاردان باستاپ DAX يندەكسىنە كىرەتىن ءىرى اكتسيونەرلىك قوعامدار مەن تنك-عا دەيىن 200-گە جۋىق ءتۇرلى كاسىپورىندى بىرىكتىرەدى.

ۇيىم، ساراپشىلاردىڭ پىكىرىنشە، اقش پەن قحر-دان وزىپ، نەمىس سىرتقى ساۋدا كولەمى بويىنشا ءبىرىنشى ورىندى الاتىن ايماق - شىعىس ەۋروپا مەن ورتالىق ازيانىڭ 28 ەلىندە نەمىس بيزنەسىنىڭ مۇددەلەرىن بىلدىرەدى.

سوڭعى جاڭالىقتار

ۇقساس جاڭالىقتار