سىندارلى ديالوگ قۇرۋ جانە كەڭەيتىلگەن اقپاراتتىق ءىس-شارالار ارقىلى پاراساتتىلىق قاعيداتتارىن دامىتۋدى جانە سىبايلاس جەمقورلىقتىڭ الدىن الۋدى ماقسات ەتكەن شتاب مۇشەلەرى العاشقى كەزدەسۋىن قالا اكتيۆىمەن وتكىزدى.
جيىنعا قالا اكىمى م.ايتەنوۆ, رەسپۋبليكالىق ۇگىت-ناسيحات شتابىنىڭ باسشىسى ى.تۇرسىنزادا, سىبايلاس جەمقورلىققا قارسى ءىس-قيمىل اگەنتتىگىنىڭ وكىلى ا.بەردالين, اگەنتتىكتىڭ شىمكەنت قالاسى بويىنشا دەپارتامەنتىنىڭ باسشىسى ا.جۇماعالي, سونداي-اق, جەرگىلىكتى اتقارۋشى ورگانداردىڭ باسشىلارى مەن ارنايى مونيتورينگتىك توپتىڭ مۇشەلەرى قاتىستى.
اگەنتتىك وكىلى ارمان بەردالين شتاب قۇرۋدىڭ قوعام الدىنداعى ماڭىزىن ءتۇسىندىرىپ, سىبايلاستىقتىڭ الدىن الۋدا قوعامدىق ساناعا سەرپىلىس جاساۋ قاجەتتىگىن اتاپ ءوتتى.
«سىبايلاس جەمقورلىققا قارسى مادەنيەتتى قالىپتاستىرۋ كەرەك. شتابتىڭ قۇرامىندا ءبىر دە ءبىر مەملەكەتتىك قىزمەتشى جوق. مەملەكەت جانە قوعام قايراتكەرلەرى, ۇرپاقتى تاربيەلەۋ جولىندا ەسەلى ەڭبەك ەتىپ جۇرگەن ازاماتتار. شتابقا مۇشە بولامىن, جەمقورلىققا بەيجاي قارامايمىن, ادالدىق پرينتسيپىنە ۇلەس قوسسام دەگەن ازاماتتار بولسا, بارىنە ەسىگىمىز اشىق» دەدى اگەنتتىكتىڭ رەسمي وكىلى ا.بەردالين.
شتاب جەتەكشىسى ىرزا تۇرسىنزادا ۇرپاق تاربيەسى جونىندە سالماقتى ويلارىن ايتىپ, شتاب جۇمىسىن قوعام بولىپ جانداندىرۋ قاجەتتىگىن جەتكىزدى.
اگەنتتىكتىڭ شىمكەنت قالاسى بويىنشا دەپارتامەنتى جانىنان قۇرىلعان اقپاراتتىق-اعارتۋ شتابى جۇمىسىن وتكەن جىلدىڭ سوڭىندا باستاپ, قازىرگى تاڭدا بىرقاتار ۇجىممەن, جاستارمەن كەزدەسىپ, ءتۇسىندىرۋ جۇمىستارىن جۇرگىزۋدە.
