ايماقتار • 29 قاڭتار، 2020

جامبىل وبلىسىندا ءبىر تۇندە 206 باس قويدى قاسقىر قىرىپ كەتتى

180 رەتكورسەتىلدى

جامبىل وبلىسىندا قىس كەلىپ، كۇن سۋىتقالى بەرى اسىرەسە اۋىلدى جەرلەرگە ءتۇز تاعىلارى تىنىم بەرمەي تۇر. وسى ۋاقىتقا دەيىن وڭىردەگى بىرقاتار شارۋاشىلىقتىڭ مالى قاسقىرلارعا جەم بولعان ەدى.

ەندى تالاس اۋدانىنا قاراستى قىزىلاۋىت اۋىلىنداعى اقتورە ابدەبايدىڭ يەلىگىندەگى شارۋاشىلىقتىڭ 206 باس قويىن ءبىر تۇندە قاسقىر قىرىپ كەتتى. ال، مالىنان ايىرىلعان شارۋا قاسقىرلارمەن كۇرەسۋ مۇلدە مۇمكىن ەمەس ەكەنىن ايتادى. ويتكەنى ءتۇز تاعىلارىن اتۋعا تىيىم سالىنعان. قاسقىرلارعا قارسى قولداناتىن مىلتىعىنىڭ ءوزىن جەرگىلىكتى پوليتسيا وكىلدەرى الىپ كەتىپتى. ەندى شارۋا ءبىر-اق كۇندە 20 جىل بويى ەتكەن ەڭبەگىنىڭ ەش كەتكەنىنە كۇيىنىپ وتىر. جۋىق ارادا مال باسىن ەسەلەۋ تاعى مۇمكىن ەمەس.

قاسقىر جارالاعان قويلارىن شارۋا اۋىلداستارىنا سويىپ تاراتىپ جاتىر. شارۋاعا كومەكتەسپەك نيەتپەن اۋىلداستارى جارالانعان قويلاردى ءبولىپ الىپ، كوكتەمدە مال باسىن قايتارىپ بەرمەكشى ەكەن. بۇل دا بولسا شارۋاعا ۇلكەن كومەك. بۇدان باسقا امال دا جوق. ءتۇز تاعىلارىنىڭ بۇل شابۋىلى قىزىلاۋىت تۇرعىندارىن الاڭداتىپ وتىر.

ال، يت-قۇستىڭ شابۋىلىنان ولگەن 100-دەن استام قويدىڭ ولەكسەسى بيوتەرميالىق شۇڭقىرعا تاستالىپتى. ۆەتەرينار ماماندار مال تۇرعان قورانى زالالسىزداندىرىپ، مال ولىكتەرىن جويۋعا جىبەرىپتى. شارۋاشىلىعىن دوڭگەلەتىپ وتىرعان كاسىپكەر مال سانىن ارتتىرعانى ءۇشىن مەملەكەتتەن سۋبسيديا الىپ كەلىپتى. ەندى مال سانى ازايعان سوڭ ودان دا قاعىلۋى مۇمكىن. بىراق شارۋاعا وتەماقى بەرىلە مە، جوق پا، ول جاعى دا بەيمالىم. تەك بۇگىندە شارۋاعا 10 ميلليون تەڭگەدەن استام كولەمدە شىعىن كەلگەن.

سوڭعى جاڭالىقتار

ۇقساس جاڭالىقتار