رۋحانيات • 29 قاڭتار، 2020

قۇرمانعازى وركەسترى مەن «ميلوسەرديە» قورى ماڭىزدى قۇجاتقا قول قويدى

56 رەتكورسەتىلدى

قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى مەن «ميلوسەرديە» قوعامدىق قورى اراسىندا قايىرىمدىلىق كونتسەرتتەرىن وتكىزۋ تۋرالى مەموراندۋم جاسالدى. اتالمىش قۇجاتقا دوم ديرەكتورى ارۋجان ساين مەن قۇرمانعازى وركەسترىنىڭ ديرەكتورى قۋانىشبەك مۇحانعاليەۆ قول قويدى.

85 جىلدىق تاريحى بار قۇرمانعازى وركەسترى وسى ۋاقىتقا دەيىن ءتۇرلى قايىرىمدىلىق شارالارىنا بەلسەنە اتسالىسىپ كەلەدى. قارتتار ۇيىندە، بالالار ۇيىندە جانە مۇگەدەك جاندارعا ارنالعان ۇيىمداردا تالاي مارتە ءوز ونەرىن كورسەتىپ جۇرگەن ۇلى وركەستر ەلىمىزدەگى وزگە مادەني ۇجىمداردىڭ اراسىندا العاشقىلاردىڭ ءبىرى بولىپ وسىنداي يگى ءىستى باستادى. قازاقتىڭ ءتول ونەرىن دارىپتەپ جۇرگەن ونەر ورداسى وسى جولى دا مۇقتاج جاندارعا قول ۇشىن سوزۋدى ماقسات تۇتىپ، قازاقستانداعى بالا قۇقىقتارى جونىندەگى ۋاكىل ارۋجان ساينمەن بىرلەسە جۇمىس ىستەمەكشى.

ال «ميلوسەرديە» قوعامدىق قورى (دوم - رەد.) 2006 جىلدىڭ ءساۋىر ايىندا ءوز جۇمىسىن باستاپ، بۇگىنگە دەيىن ايىقپاس دەرتكە شالدىققان بۇلدىرشىندەردىڭ ءومىرى ءۇشىن كۇرەسىپ كەلەدى.

دوم نەگىزگى ءۇش باعىت بويىنشا ءتۇرلى قايىرىمدىلىق شارالارىن ۇيىمداستىرادى. سولاردىڭ ىشىندە «بالالارعا ءومىر سىيلا» تۇراقتى اكتسياسى اۋىر سىرقاتقا شالدىققان قازاقستاندىق بالالاردىڭ ەمىنە قاراجات جيناۋمەن اينالىسادى. وسى ورايدا قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى مەن ارۋجان ساين باستاعان قوعامدىق قور ورتاق كەلىسىمگە كەلىپ، اتالمىش اكتسيا بويىنشا ءتۇرلى قايىرىمدىلىق شارالارىن جاساۋ تۋرالى شەشىم شىعاردى. قوس تاراپ قول قويعان مەموراندۋم اياسىندا وتكىزىلەتىن العاشقى كونتسەرت 23 اقپانعا جوسپارلانعان.

قايىرىمدىلىق كەشى الماتى قالاسىنداعى قۇرمانعازى وركەسترىنىڭ كونتسەرت زالىندا وتەدى دەپ كۇتىلۋدە.

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار