28 قاڭتار، 2020

قازاقستاندا كوروناۆيرۋستىق ينفەكتسيانىڭ الدىن الۋ بويىنشا شارالار كەشەنىن قابىلدادىق - مينيستر

19 رەتكورسەتىلدى

بۇگىن ۇكىمەتتە وتكەن ءباسپاسوز كونفەرەنتسياسىندا دەنساۋلىق ساقتاۋ ءمينيسترى ەلجان ءبىرتانوۆ قازاقستاندا كوروناۆيرۋس ينفەكتسياسىنىڭ تاسىمالدانۋىنىڭ جانە تارالۋىنىڭ الدىن الۋ بويىنشا قابىلدانىپ جاتقان شارالار كەشەنى تۋرالى ايتىپ بەردى، سونداي-اق جۋىردا قحر-دان كەلگەن قازاقستاندىقتارعا قاتىستى بىرقاتار ۇسىنىستار ايتتى.  بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

بۇگىنگى تاڭدا قحر-دا 30 پروۆينتسيادا 4515 جاڭا كوروناۆيرۋستى پنەۆمونيامەن سىرقاتتانۋ وقيعاسى تىركەلىپ، ناقتىلاندى، ونىڭ ىشىندە 106 جاعداي ادام ولىمىمەن اياقتالدى. 

حۋبەي پروۆينتسياسىنىڭ 15 قالاسىندا كارانتين ەنگىزىلدى، تۇرعىندارعا قالادان كەتۋگە تىيىم سالىندى، اۆيارەيستەردىڭ، اۆتوبۋستار مەن پويىزداردىڭ كەلۋى مەن كەتۋى توقتاتىلدى.

الەمدە 15 ەلدە كوروناۆيرۋستىڭ جاڭا تۇرىمەن اۋرۋدىڭ 60 راستالعان جاعدايى تىركەلگەن.

دەنساۋلىق ساقتاۋ ءمينيسترىنىڭ ايتۋىنشا، 6 قاڭتاردا باس مەملەكەتتىك سانيتاريالىق دارىگەردىڭ قازاقستاندا ينفەكتسيانىڭ تارالۋىن بولدىرماۋ ماقساتىندا سانيتارلىق باقىلاۋدى كۇشەيتۋ تۋرالى قاۋلىسى قابىلداندى.

ءبىرىنشى كەزەكتە، اۋەجايلار مەن ۆوكزالداردا سانيتارلىق باقىلاۋ شارالارى كۇشەيتىلدى، كوروناۆيرۋستىڭ ەل اۋماعىنا ەنۋىنە جانە تاراۋىنا قارسى ءىس-قيمىل شارالارى قابىلدانۋدا.

«6 قاڭتاردان باستاپ قىتايدان كەلگەن بارلىق ازاماتتاردى تەكسەرۋ جۇرگىزىلۋدە، ونىڭ ىشىندە تەكسەرۋ جىلۋ ولشەگىشى ارقىلى جۇرگىزىلۋدە. تەمپەراتۋراسى بار بارلىق ادامدارعا ساۋالناما تولتىرىلىپ، ولار تۇرعىلىقتى جەرى بويىنشا ەسەپكە قويىلادى»، - دەدى مينيستر.

بۇگىنگى تاڭدا قحر-دان 25858 ادام كەلدى، بۇل قازاقستان ازاماتتارى مەن شەتەل ازاماتتارى. بارلىق دەرەكتەر دەنساۋلىق ساقتاۋ مينيسترلىگىنە جانە ودان ءارى باقىلاۋ كوميتەتى (قر دسم تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى) ارقىلى تۇرعىلىقتى جەرى بويىنشا تەكسەرۋلەر، ازاماتتارمەن بايلانىستار جۇرگىزىلەدى.

«كەلۋشىلەردىڭ اراسىندا جرۆي بەلگىلەرى بار ادامدار بولدى. قازىرگى تاڭدا تەمپەراتۋراسى جوعارى 23 جولاۋشى كەلدى، ونىڭ ىشىندە تورتەۋى جرۆي-ينفەكتسياسىنا كۇدىكپەن اۋرۋحاناعا جاتقىزىلدى. ۆيرۋستى ينفەكتسيالار اراسىندا ايقىن ايىرماشىلىق جوق بولعاندىقتان، ءبىز جرۆي-عا كۇدىكتەنۋمەن ەمدەۋگە جاتقىزامىز. اۋرۋحاناعا جاتقىزىلعانداردان بارلىق قاجەتتى قان اناليزدەرى الىندى. ءۇش تاۋلىك ىشىندە ەگجەي-تەگجەيلى دياگنوستيكا جۇرگىزىلەدى. ءتيىستى ەم باستالدى»، — دەپ ءتۇسىندىردى ە. ءبىرتانوۆ.

ۆەدومستۆو باسشىسىنىڭ ايتۋىنشا، ەگەر جاپپاي تاراۋ ورىن الاتىن جاعداي بولسا، بۇرىننان بار توسەك ورىندارىنا قوسىمشا 4،5 مىڭنان استام توسەك ورنى بار.

«بارلىق وڭىرلەر بويىنشا وقۋ-جاتتىعۋ جۇمىستارى وتكىزىلدى، مەديتسينالىق قىزمەتكەرلەر اراسىندا قوسىمشا وقىتۋ جۇرگىزىلىپ جاتىر. ۇكىمەت رەزەرۆىنەن پاتسيەنتتەردىڭ نەمەسە ينفەكتسياعا كۇدىكتى ادامداردىڭ سانى ارتقان جاعدايدا قوسىمشا قارجىلاندىرۋعا تاپسىرىس بەرەمىز. مۇنداي جاعدايلاردا قابىلداناتىن جەكە قورعانۋ قۇرالدارى، دەزينفەكتسيالىق قۇرالدار مەن مەديتسينالىق قۇرالدار قوسىمشا ساتىپ الىناتىن بولادى. مەديتسينالىق كومەك كورسەتۋ ءۇشىن بارلىق قاجەتتى رەسۋرستار بار، ءدارى-دارمەكتەردىڭ، مەديتسينالىق ماقساتتاعى بۇيىمداردىڭ قوسىمشا قورى بار»، — دەپ ءتۇسىندىردى مينيستر.

سونىمەن قاتار، ە. ءبىرتانوۆ قىتايدان كەلۋشى قازاقستان ازاماتتارىنا كەڭەس بەردى.

«سوڭعى 14 كۇن ىشىندە قحر-دان، سونداي-اق شەكتەس ەلدەردەن كەلگەن بارلىق ازاماتتار تۇرعىلىقتى مەكەنجايى بويىنشا ەمحاناعا كەلىپ نەمەسە قوڭىراۋ شالىپ، دارىگەرلەرگە تىركەلىپ، دەنساۋلىعىندا قانداي دا ءبىر پروبلەمالار بار بولسا حابارلاي الادى. بۇل ازاماتتاردىڭ جەكە قاۋىپسىزدىگى ءۇشىن قاجەت، ءبىزدىڭ مەديتسينا سالاسىنىڭ ماماندارى دەنساۋلىق ناشارلاعان جاعداي بولىپ جاتسا، ءسىزدى جانە ءسىزدىڭ وتباسىڭىزدىڭ مۇشەلەرىن قاۋىپسىزدەندىرە الىپ، شارالار قابىلداۋى ءۇشىن باقىلاۋ جۇرگىزۋى ءتيىس»، — دەپ تۇيىندەدى ە. ءبىرتانوۆ.

ايتا كەتۋ كەرەك، قازىرگى ۋاقىتتا قازاقستان رەسپۋبليكاسىندا اۋىرۋ جاعدايلارى تىركەلمەگەن. قحر-مەن مەملەكەتتىك شەكارا ارقىلى وتكىزۋ پۋنكتتەرىندە 19 990 ادام قارالدى.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار