ايماقتار • 28 قاڭتار، 2020

قىس قىسىمىن ادام كۇشى جەڭۋدە

48 رەتكورسەتىلدى

بيىل «كارى قۇداڭ» سولتۇستىكتە دە الەك سالىپ تۇر. وبلىس اۋداندارىنان الىنىپ جاتقان حابارلارعا قاراعاندا قاردىڭ جولداردى جاۋىپ، بوراننىڭ كوز اشىرماي تۇرعان كەزدەرى كوپ.

ءبىر قىزىعى وبلىس ورتالىعىنىڭ ءوز باسىندا كوز كورمەگەن، قۇلاق ەستىمەگەن بوران جوق. استانالىق بالالار ۇيدەن شىعا الماي جاتسا قىزىلجارلىق بالاپاندار تومپاڭداپ، ساباقتارىنان قالماي ءجۇر. بىراق كۇرت جاۋماسا دا قار كۇندە 7-8 سم جاۋادى. وسىنىڭ ءوزى اۋانىڭ دا، قالانىڭ دا تازا بولىپ، ۇيگە كىرگىڭ كەلمەيدى. سۋىق تا شەكتەن شىققان ەمەس، كوپ بولعاندا 15-16 گرادۋستان اسپاي تۇر. بىراق الىس اۋدانداردان كەلىپ جاتقان حابارلار ءماز ەمەس.  

كەشە عانا وبلىستىڭ توتەنشە جاعدايلار قىزمەتىنىڭ باستىعى، ازاماتتىق قورعاۋ پولكوۆنيگى راميل كامالوۆ جۋرناليستەرگە بريفينگ بەرىپ، وبلىس جولدارىنداعى جاعدايمەن جانە قۇتقارۋ جۇمىستارىنىڭ قادامدارىمەن تانىستىردى.  قاڭتاردىڭ 23 مەن 26 ارالىعىندا وبلىس جولدارىندا 25 جەردە قار ءۇيىلۋدىڭ سالدارىنان قاتىناس بولماي قالعان. توتەنشە جاعدايلار جونىندەگى قىزمەتكە تۇسكەن دابىلدىڭ ارقاسىندا 149 ادام قۇتقارىلىپتى. سونىڭ ىشىندە 61 ادامعا مەديتسينالىق كومەك كورسەتىلگەن. بوراننىڭ ۇيىتقۋى اسىرەسە 26 قاڭتار كۇنى قاتتى بولىپ، وسى كۇنى 27 ادام قۇتقارىلىپ، 14 جەڭىل ماشينە قار قۇرساۋىنان شىعارىلعان. «قۇتقارۋ وپەراتسيالارىنا بارلىعى 123 ادام مەن 59 تەحنيكا قاتىستىرىلدى. تەحنيكالار جالعىز تج قىزمەتىنىڭ ەمەس، پولتسيا دەپارتامەنتىنەن، جول قىزمەتتەرىنەن جانە تۇرعىنداردىڭ جەكە كولىكتەرى اراسىنان دا تارتىلدى. جەرگىلىكتى بيلىك ورگاندارى دا قۇتقارۋ وپەراتسيالارىنا بەلسەندى قاتىسۋدا»، دەدى پولكوۆنيك.   

بۇگىنگە دەيىن وبلىستىڭ ايىرتاۋ، ع.مۇسىرەپوۆ، شال اقىن جانە تيميريازەۆ اۋداندارىنداعى جاعدايلار قيىندىق تۋعىزۋدا. بۇلار اۋماعى جاعىنان وبلىستىڭ وڭتۇستىك اۋداندارىنا جاتادى. قازىر وسى اۋدانداردىڭ بارىندە قار قۇرساۋىنا تۇسكەندەردى جىلىتىپ، تاماق بەرۋ پۋنكتتەرى اشىلعان ەكەن.

بارلىق وبلىس تۇرعىندارىنىڭ سمارتفوندارىنداعى «دارمەن» قوسىمشاسىنا توتەنشە جاعداي تۋرالى اقپارات ءۇزىلىسسىز ءتۇسىپ تۇرادى. الايدا كەيبىر ادامدار ولاردىڭ ەسكەرتپەسىنە قۇلاق اسپاي، جولعا شىعىپ كەتەدى.

پولكوۆنيك ر.كامالوۆ بيىلعى قىس تۇسكەننەن بەرى وبلىس جولدارىندا بارلىعى 53 توتەنشە جاعداي بولعانىن جەتكىزدى.  سونىڭ ىشىندە 36 جاعدايدا قارعا كومىلىپ قالعان اۆتوموبيلدەر قازىلىپ الىنعان. 10 رەت بيىك جولدان ءتۇسىپ كەتكەن كولىكتەر سۇيرەپ شىعارىلعان. بارلىق قۇتقارىلعان ادامدار سانى 411، سونىڭ ىشىندە 43 بالا. قۇدايعا شۇكىر، ادام شىعىنى بولعان ەمەس.

«قازاۆتوجول» ۇك سولتۇستىك قازاقستان وبلىستىق فيليالى دا ءوز جۇمىستارىن تىڭعىلىقتى اتقارۋدا. ارينە، قار قالىڭ جاۋىپ، بوران كوزسىز بوراعان جەرلەرگە ولاردىڭ قولى تولىق جەتپەي جاتقان كەزدەرى بولادى. بىراق ادامدار تۇرىپ قالۋى مۇمكىن دەگەن تۇستار ۇنەمى باقىلاۋدا ۇستالادى ەكەن. بۇل تۋرالى اتالمىش كاسىپورىننىڭ وكىلى بايانداپ بەردى.

جەكسەنبى كۇنى عابيت مۇسىرەپوۆ اۋدانىندا قار قۇرساۋىندا 11 ادام قالىپ، ولاردىڭ ءبارى امان-ەسەن اۋدان ورتالىعى «نوۆويشيمسكي» سەلوسىنا جەتكىزىلگەن. سونىڭ ىشىندە «نوۆوسەلوۆكا – شۇقىركول» باعىتىندا «ميتسۋبيسي پادجەرو» جانە «ۆاز 2106» اۆتوموبيلدەرى باراتىن جەرلەرىنە 10 شاقىرىم قالعاندا قار تۇتقىنىنا قاتار تۇسكەن. جولاۋشىلار سمارتفوندارىمەن دابىل قاعىپ، وزدەرى قاۋىپسىزدىك نۇسقاۋلىعىنا سايكەس پەشى جىلى ء«ميتسۋبيسيدىڭ» ىشىنە كىرىپ وتىرعان. دابىل تۇسكەن بويىندا ولاردى قۇتقارۋعا تج-نىڭ «ترەكول» اتتى باتپايتىن ۇلكەن ماشيناسى جىبەرىلگەن. «جول وتە اۋىر بولدى. كوز اشىرماعان بوراننان كورىنىس ءبىر مەتردەن اسپايدى. ءبىزدىڭ بار ارمانىمىز قار كومىپ تاستاماي تۇرعاندا ماشانالاردى تابۋ بولدى. سوعىپ كەتپەس ءۇشىن ولارعا قاتتى ءجۇرىپ بارۋعا دا بولمايدى، ءسويتىپ كوپ ازاپپەن، اقىرىن ءجۇرىپ بارىپ تاپتىق-اۋ. الدىمەن ادامداردى جىلى كابينامىزعا مىنگىزىپ، جىلىتۋ پۋنكتىنە جەتكىزدىك»، دەيدى تج اۋداندىق ءبولىمىنىڭ ينجەنەرى، مايور مەيرام عابدۋسالام.

مۇنداي وقيعالار بۇگىندەرى تج قىزمەتكەرلەرىنىڭ كۇنبە-كۇنگى ارەكەتتەرىنە اينالعان.   

1

ال مىنا ريزاشىلىق حات راميل كامالوۆتىڭ اتىنا قۇتقارىلعان ماقسات شوپانوۆتان كەلگەن ەكەن. ء«سىزدىڭ م.جۇماباەۆ اۋدانى توتەنشە جاعدايلار ءبولىمىنىڭ قىزمەتكەرلەرى باس مامان د. م. شۋرمانباەۆقا، اعا ينجەنەر ك. ج. كاشەنوۆكە جانە سقو تجد «112» جەدەل كەزەكشىسى جانات سابيتكە ۇلكەن ريزاشىلىعىمدى بىلدىرەمىن، ولار مەنى  جانە مەنىڭ وتباسىمدا قيىندىقتا جاپادان جالعىز قالدىرمادى»، دەلىنگەن وندا. ىلايىم وسىنداي العىستار كوپ بولعاي.  

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار