پرەزيدەنت اباي مۇراسىن قايتا زەردەلەپ, حالقىمىزدىڭ رۋحاني دامۋىنا پايدالانۋ كەرەكتىگى جونىندە قۇندى پىكىرلەر ايتتى. اباي الەمى ۇلتىمىزدىڭ ساپاسىن, وي-ءورىسىن, دۇنيەتانىمىن دامىتۋعا قىزمەت ەتەدى. مەملەكەت الدىنداعى باستى مىندەت ءبىلىمدى, كەمەل, مادەنيەتتى, زيالى, ادامگەرشىلىگى جوعارى ادام قالىپتاستىرۋ بولىپ تابىلادى. وسىنداي قاسيەتتەردىڭ ءبارى اباي ەڭبەكتەرىنەن تابىلادى. سوندىقتان ونىڭ ءىلىمىن قايتا زەردەلەپ, ونى جاس ۇرپاقتى تاربيەلەۋ ىسىنە ءتيىمدى پايدالانۋ كەرەك دەگەن ويى اسا قۇپتارلىق.
«جۇرەگىمنىڭ تۇبىنە تەرەڭ بويلا, مەن ءبىر جۇمباق اداممىن, ونى دا ويلا», دەيدى اباي. نەگە ولاي دەپ ايتتى ەكەن؟ اباي – جۇمباعى كوپ ادام.سوندىقتان بولاشاقتا ونىڭ جۇمباعىن, قۇپياسىن شەشىپ, جۇرتشىلىققا ۇسىنۋ كەرەك. ق.توقاەۆ ابايدىڭ دانالىق وي-تۇجىرىمدارىن قالىڭ بۇقارا اراسىندا جۇيەلى ءتۇسىندىرۋ قاجەتتىگىن ايتتى. «بۇل ءۇشىن ەڭ الدىمەن ابايدى دۇرىس ءتۇسىنىپ الۋ كەرەك» دەدى. ىرگەلى, وركەنيەتتى ەل بولۋىمىز ءۇشىن اباي ءىلىمىنىڭ ماڭىزى زور ەكەنىن, ونىڭ ەڭبەكتەرى ۇلتىمىزدى جاڭعىرتىپ, جاڭا بەلەستەرگە كوتەرىلۋدە ماڭىزدى ءرول اتقاراتىنىن ەسكە سالدى.
وسى كەزگە دەيىن اباي شىعارمالارى تۋرالى ۇلى جازۋشى م.اۋەزوۆتەن باستاپ كوپتەگەن ادەبي شىعارمالار, عىلىمي ەڭبەكتەر, ماقالالار جازىلدى. عالىمدار عۇلاما ەڭبەكتەرىنىڭ يدەيالىق, تاربيەلىك, فيلوسوفيالىق مازمۇنىن اشۋعا تىرىستى. الايدا كوپ ەڭبەك كەڭەستىك يدەولوگيا سارىنىندا جازىلدى. سوندىقتان قازىرگى زامان تالابى اباي مۇراسىنا جاڭاشا كوزقاراسپەن قاراۋدى قاجەت ەتەدى.
اباي – ۇلتىمىزدىڭ باس يدەولوگى. ول ادام بولىپ قالىپتاسۋ ءۇشىن جاس ۇرپاقتىڭ زەردەسىنە قانداي اسىل قاسيەتتەردى ءسىڭىرۋ, قاي باعىتتا تاربيەلەۋ, بولاشاقتا قاي باعىتپەن ءجۇرۋ كەرەكتىگىن ايتىپ كەتكەن عۇلاما ادام. ۇلتىنىڭ بويىنداعى ءمىندى, كەمشىلىكتى اياۋسىز سىناپ, ودان ارىلۋ جولدارىن كورسەتىپ بەردى. بولاشاقتا ءار ادام ءوز بويىنداعى جاعىمسىز ادەتتەردى جويۋعا ۇمتىلىپ, قوعامدا ورىن العان كەلەڭسىزدىكتەرمەن كۇرەسە ءبىلۋى كەرەك.
اباي – ۇلى اعارتۋشى. تۋعان حالقىن وقۋ-بىلىمگە, عىلىمدى ۇيرەنۋگە, ونەردى, كاسىپكەرلىكتى يگەرۋگە شاقىردى. ەڭبەكتى دارىپتەدى. عىلىم-ءبىلىمى وزىق ەلدەردىڭ ءتىلىن بىلۋگە ۇندەدى. ونى بىلسەڭ, كوكىرەك كوزىڭ اشىلادى, دۇنيەگە كوزقاراسىڭ كەڭەيەدى, ءبىلىمىن, عىلىمىن بىلۋگە جول اشىلادى دەدى. بولاشاق جاستاردان ءۇمىت كۇتىپ, ولاردى قانداي باعىتتا تاربيەلەۋ كەرەكتىگىن وسيەت ەتىپ كەتتى.
اعارتۋشى اباي «تولىق ادام» يدەياسىن ۇسىندى. قوعام الدىنا جان-جاقتى جەتىلگەن, كەمەل, ءبىلىمدى, زيالى, مادەنيەتتى, ادامگەرشىلىگى جوعارى, حالقىنا ادال قىزمەت ەتەتىن ازامات تاربيەلەۋ ماسەلەسىن كوتەردى. پرەزيدەنت بولاشاقتا اباي ۋاعىزداعان «تولىق ادام» تۇجىرىمداماسىن زەردەلەپ, جۇرتشىلىققا ۇسىنۋدى ۇكىمەتكە مىندەتتەدى.
ۇلى ويشىل, عۇلاما اباي ءبىر ۇلت دەڭگەيىندە قالىپ قويماي: «ادامزاتتىڭ ءبارىن ءسۇي, باۋىرىم دەپ» دەگەن گۋمانيستىك ويى ونى الەم اقىل-ويىنىڭ ۇشار بيىگىنە كوتەردى. بارلىق ۇلتتىڭ ادامدارىن ءسۇيۋدى, ولارمەن تاتۋ-ءتاتتى ءومىر ءسۇرۋدى ناسيحاتتادى. پرەزيدەنت اباي الەمىن جاھان حالىقتارىنا جەتكىزۋدى ۇسىندى. ول ءۇشىن ونىڭ شىعارمالارىن 10 تىلگە اۋدارۋ كەرەكتىگىن, وعان بىلىكتى اۋدارماشىلاردى, عالىمداردى تارتۋدى ۇسىندى. سوندا اباي شىعارمالارى ارقىلى الەم حالىقتارى قازاقتى تاني الادى دەدى.
«ەڭ الدىمەن, ابايدى ۇلتىمىزدىڭ مادەني كاپيتالى رەتىندە ناسيحاتتاۋىمىز كەرەك» دەگەن مەملەكەت باسشىسىنىڭ ويلارى قۇپتارلىق. وسىنداي شارالاردىڭ ءبارى حالقىمىزدىڭ وي-ءورىسىن كەڭەيتىپ, ءوسىپ-وركەندەۋىمىزگە نەگىز قالايدى.
كوشكىنباي ەلىكباەۆ,
ءبىلىم سالاسىنىڭ ارداگەرى, تولەبي اۋدانىنىڭ قۇرمەتتى ازاماتى
تۇركىستان وبلىسى,
تولەبي اۋدانى,
قاراتوبە اۋىلى
