ايماقتار • 22 قاڭتار، 2020

باياناۋىلعا بارعان تۇيە باتىستىكى مە؟!

3078 رەتكورسەتىلدى

الەۋمەتتىك جەلى ارقىلى تاراعان: «پاۆلودار جاقتان يەسىز تۇيەلەر تابىلىپتى»، «بۋرا باستاعان ءبىر توپ تۇيە باياناۋىلعا كەلىپ توقتاپتى. يەلەرى جوق ەكەن!» دەگەن حابار تۇيەسى جوق ادامداردىڭ ءوزىن ەلەڭ ەتكىزدى.

«مىنا تۇيەلەر باياناۋىلدا، ءبىزدىڭ جايلاۋىمىزدىڭ جانىندا ءبىر ايدان بەرى ءجۇر. مال قازاقستاننىڭ باتىسى جاعىنان كەلگەن دەگەن سوزدەر شىعىپ جاتىر. راسىمەن سولاي بولار. سەبەبى، ءبىزدىڭ وڭىردە تۇيە مالى اتىمەن جوق. جىگىتتەر «وبال عوي» دەپ ءشوبىن بەرىپ جاتىر. تۇيەلەردىڭ «و» دەگەن تاڭباسى بار. جوعالتقان بىرەۋ بار عوي، نە بولسا دا» دەيدى ەر ادام داۋىسى Whats App ارقىلى كەلگەن دىبىستىق حابارلامادا.

2014 جىلدىڭ قاراشاسىندا باتىس قازاقستان وبلىسى سىرىم اۋدانىنا قاراستى قوسوبا اۋىلىنىڭ تۇرعىنى قاتىرەن باينيازوۆتىڭ جايىلىمدا جۇرگەن تۇيەلەرى جوعالعان ەدى. اتپەن، موتوتسيكلمەن، كولىكپەن ىزدەدى. قوسوبا مەن تايپاقتىڭ اراسىن بىلاي قويعاندا، اقتوبەنىڭ قوبداسىن، ءتىپتى اتىراۋ مەن اقتاۋعا دەيىن باردى. اياعى جەتپەگەن جەرگە حابار سالدى. ءىزىم-عايىم جوق. پاۆلودارداعى تۇيەلەر جايلى ەستىگەندە «مەنىڭ تۇيەلەرىم بولىپ جۇرمەسىن!» دەپ ويلاعانى دا جاسىرىن ەمەس.

- جەتى اتامىزدان بەرى تۇيە باعامىز. ول جانۋاردىڭ ءبىر قاسيەتى – ءوزىنىڭ جايىلىمىنان كوپ ۇزامايدى. مەنىڭ تۇيەلەرىم دە جەتىكولگە، سايقۇدىققا دەيىن بارىپ جايىلىپ، ءۇش كۇن، ءارى كەتسە ون كۇننەن كەيىن قوسوبانىڭ دالاسىنا قايتىپ كەلىپ ءجۇردى. جوعالعانىنان-اق قولدى بولدى-اۋ دەپ ويلادىم، - دەيدى قاتىرەن اعاي.

جوعارىداعى حاباردى ەستي سالىسىمەن، جوقشى باياناۋىلداعى جىگىتتەرگە حابارلاسىپتى. ول جاققا بارعان تۇيە 14 باس ەكەن. قوسوبا مەن پاۆلوداردىڭ اراسى 2300 شاقىرىمداي.

- شاماسى، تۇيەلەر ۇرلانىپ، كەيىن وزدەرى سولتۇستىك اسىپ كەتىپ تۇر. مەنىڭ مالىمدا «و» دەگەن تاڭبا بولاتىن. جىگىتتەر ونداي جازۋدىڭ بارىن راستادى. ءوزىم سالعان ەن بولاتىن، ول دا ءدال كەلىپ تۇر. جاقىنىراق بارىپ سۋرەتكە ءتۇسىرۋ قيىن ەكەن، بۋرا جولاتپايتىن كورىنەدى. باعۋ كورمەي بەتىمەن جۇرگەسىن، جابايى بولىپ تا كەتكەن شىعار. ارينە، بارلىق تۇيە مەنىكى دەۋدەن اۋلاقپىن. اكەم «بىرەۋدىڭ الا ءجىبىن اتتاما!» دەپ ۇيرەتكەن. ارتىق ولجادان دامەتپەيمىن، ماعان ءوزىمنىڭ مالىم بۇيىرسا بولدى. ەكى تۇيەمنىڭ مىنەزىن بىلەمىن. سول ارقىلى انىقتاپ الار ەدىم، - دەيدى قاتىرەن اعاي.

باياناۋىلداعى تۇيەلەر تۋرالى حاباردىڭ راستىعىن ءوز قۇلاعىمىزبەن ەستىمەك بولىپ، ءنومىرىن تاۋىپ، جوعارىداعى حاباردى تاراتقان ادامنىڭ وزىمەن بايلانىسقا شىقتىق. يەسىز مالدى كورىپ، ەلدى قۇلاقتاندىرعان مۇسىلمان – ايمۇحامەد مولشين دەگەن ازامات ەكەن.

- تۇيەلەر شارۋاشىلىعىمىزدىڭ ماڭىندا جۇرگەنىنە ءبىر ايداي بولدى. يەسىز مال بولمايدى عوي. بۇل تۇيەلەردىڭ يەسى بار، ىزدەپ جاتقان شىعار دەپ ويلادىق. ءوزىمىز دە مال ءوسىرىپ وتىرعان شارۋامىز، جوعالتقاننىڭ زاردابىن بىلەمىز. بىرەۋلەر يەمدەنىپ كەتەر دەپ، قاسىمىزداعى جىگىتتەردىڭ قوجالىعىنا تۇراقتاتتىق. پوليتسياعا حابار بەردىك، ءوز كۇشىمىزبەن الەۋمەتتىك جەلى ارقىلى دا جاريا سالۋدامىز. تۇيەلەر قازىر پاۆلودار وبلىسى باياناۋىل اۋدانى سۇلتانماحمۇت تورايعىروۆ اۋىلىنا قاراستى مايقايىڭ ەلدى مەكەنىنىڭ ماڭىندا تۇر، - دەدى بىزگە «سارىجايلاۋ CAPITAL» شارۋا قوجالىعىنىڭ باسشىسى ايمۇحامەد مولشين.

جاڭالىقتى ەستىگەن بەلگىلى اقىن، جۋرناليست، قوسوبالىق باۋىرجان حاليوللا «جاياۋ مۇسانىڭ ەلىنە «جاياۋ بارعان» تۇيەلەر شىنىمەن دە مەنىڭ «اۋىلداستارىم» بولسا، قىزىقتىڭ كوكەسى وسى ەمەس پە؟» دەپ تاڭدانىس ءبىلدىردى ءوزىنىڭ Facebok-تەگى پاراقشاسىندا. ال قاتىرەن اعامىز اللانىڭ قالاۋىمەن بەس جىل دەگەندە تۇيەلەرىم تابىلدى دەپ بولجاپ وتىر. قىس بىتپەي، اياقتاي بارىپ، كورىپ، تانىپ كەلۋ دە ويىندا بار. ءيا، تۇيەلەر قاتىرەن اعايدىڭ مالى بولىپ شىعا ما، جوق پا، اڭگىمە وندا ەمەس. وسى وقيعا بىزگە قازاقتىڭ ادالدىعىن، يماندىلىعىن تاعى ءبىر دالەلدەگەندەي. ايمۇحامەد سياقتى اڭقىلداعان باياناۋىلدىق جىگىتتەردىڭ ءىسى كوپ قازاققا ۇلگى بولسا ەكەن!

باۋىرجان شيرمەدين ۇلى،

باتىس قازاقستان

سوڭعى جاڭالىقتار

الىپ ءتيىن تورگە وزدى

ايماقتار • كەشە

18،6 ميلليونعا جەتتىك

قازاقستان • كەشە

كحل: «بارىس» جەڭىسكە جەتتى

حوككەي • 15 اقپان، 2020

جول قۇرىلىسىنان تابىلعان اقاۋ كوپ

ايماقتار • 15 اقپان، 2020

اقتوبەدە اۆتوبۋس اۋدارىلدى

ايماقتار • 15 اقپان، 2020

بيىل بقو-دا 1710 پاتەر بەرىلەدى

ايماقتار • 15 اقپان، 2020

جەر سىلكىندى

قازاقستان • 15 اقپان، 2020

ۇقساس جاڭالىقتار