ونىڭ ىشىندە اۋىل شارۋاشىلىعىن نەسيەلەۋگە جانە اۋىلشارۋاشىلىق تەحنيكاسىنىڭ ليزينگىنە 448 ملرد-تان استام تەڭگە جانە بيداي ساتىپ الۋعا 29 ملرد تەڭگەگە جۋىق قاراجات باعىتتالدى. ايتا كەتەلىك, 2018 جىلى بۇل باعىتتاعى قارجىلاندىرۋ كولەمى 400 ملرد تەڭگەنى قۇراپ, سونىڭ ىشىندە 385 ملرد تەڭگە نەسيە مەن ليزينگكە, 15 ملرد تەڭگە بيداي ساتىپ الۋعا باعىتتالعان بولاتىن.
«قازاگرو» حولدينگىنىڭ نەسيەلىك پورتفەلى 886 ملرد تەڭگە كورسەتكىشكە جەتىپ, قارىز الۋشىلار سانى 77 مىڭعا دەيىن ءوستى. ونىڭ 97 پايىزدان استام ۇلەسى شاعىن جانە ورتا بيزنەس وكىلدەرىنە تيەسىلى. ۇلتتىق حولدينگتىڭ قارجىلىق قولداۋى ارقىلى وتكەن جىلى 37 مىڭ اۋىل تۇرعىنى جۇمىسپەن قامتىلىپ, جاڭا جۇمىس ورىندارىنا يە بولدى.
«قازاگرو» حولدينگى ءباسپاسوز قىزمەتىنىڭ حابارلاۋىنشا, 2019 جىلى جالپى قۇنى 84 ملرد تەڭگەنى قۇرايتىن 56 ينۆەستيتسيالىق جوبا قارجىلاندىرىلدى, سونىڭ ىشىندە 21 ملرد تەڭگە سوماسىنا 24 جوبا ىسكە قوسىلدى, 770 جۇمىس ورنى قۇرىلدى. 2020 جىلى 56 ملرد تەڭگە سوماسىنا 31 ينۆەستيتسيالىق جوبانى ىسكە قوسۋ جوسپارلانىپ, ونىڭ ەسەسىنە 3 مىڭ جۇمىس ورنىن قۇرۋ كوزدەلىپ وتىر. قازىر قارجىلاندىرۋعا وتىنىمدەردى قابىلداۋ جالعاسۋدا.
بىلتىرعى مەملەكەت باسشىسىنىڭ سىنىنان سوڭ «قازاگرو» حولدينگى ءوز قىزمەتىن رەفورمالاۋ مەن تيىمدىلىگىن ارتتىرۋعا باعىتتالعان شارالاردى جۇزەگە اسىرۋدا. حولدينگ كورپوراتيۆتىك باسقارۋ ساپاسىن ارتتىرۋ ماقساتىندا ەنشىلەس كومپانيالار سانىن قىسقارتۋ شەڭبەرىندە «قازاگروكەپىل» اق كاسىپورنىن «اۋىل شارۋاشىلىعىن قارجىلاي قولداۋ قورى» اق-قا قوسۋ, «قازاگروونىم» اق كاسىپورنىن «اگرارلىق نەسيە كورپوراتسياسى» اق-قا قوسۋ جانە «قازاگروماركەتينگ» اق ۇيىمىن تاراتۋ جۇمىستارىن جۇرگىزدى. سونىمەن قاتار 2020 جىلى «ازىق-ت ۇلىك كەلىسىمشارت كورپوراتسياسى» ۇك» اق ءوز قىزمەتىن اۋىل شارۋاشىلىعى مينيسترلىگىنىڭ قۇرامىندا جالعاستىراتىنى تۋرالى شەشىم قابىلداندى. وسىلايشا حولدينگتىڭ قۇرىلىمىندا 3 ارنايى قارجىلاندىرۋشى كومپانيا قالاتىن بولادى. بۇل رەتتە «اگرارلىق نەسيە كورپوراتسياسى» اق اوك سۋبەكتىلەرىن نەسيەلەندىرۋ, نەسيە سەرىكتەستەرىن, ميكروقارجى ۇيىمدارىن, ەكىنشى دەڭگەيلى بانكتەر مەن ليزينگتىك كومپانيالاردى قورلاندىرۋمەن اينالىسادى.
ال «اۋىل شارۋاشىلىعىن قارجىلاي قولداۋ قورى» اق شاعىن بيزنەستى ميكروقارجىلاندىرۋ, قارىزداردى كەپىلدەندىرۋ, اوك ساقتاندىرۋ جۇيەسىنە قاتىسۋدى جۇزەگە اسىرسا, «قازاگروقارجى» اق اۋىل شارۋاشىلىعى تەحنيكاسى مەن جابدىقتارىنىڭ ليزينگىن بەرەدى.
ايتا كەتەلىك, بىلتىر «قازاگرو» حولدينگى سىرتقى ۆاليۋتالىق بورىشتارىن تولىعىمەن وتەپ, 2020 جىلدىڭ قورىتىندىسى بويىنشا پايداعا شىعۋ ماقساتىندا ترانسفورماتسيا باعدارلاماسىن قابىلداعان بولاتىن.
