سپورت • 21 قاڭتار، 2020

قاراعاندىدا ۇستەل تەننيسىنەن ەل چەمپيوناتى ءوتتى

52 رەتكورسەتىلدى

ارقا توسىندە التى كۇن بويى ۇستەل تەننيسىنەن الامان جارىس – قازاقستاننىڭ چەمپيوناتى ءوتتى. ەلىمىزدىڭ بارلىق وبلىستارىنان جانە رەسپۋبليكالىق ماڭىزداعى قالالارىنان كەلگەن 160 تەننيسشى جارىس جۇلدەلەرىن ساراپقا سالدى.

كىشى راكەتكانى قولعا العاندار تۋرنير باعدارلاماسىنىڭ جەتى ءتۇرى بويىنشا كۇش سىناسقان بولاتىن. اتاپ ايتقاندا، ەرلەر جانە ايەلدەر كوماندالارى ءوز تاراپتارى بويىنشا مىقتىنى انىقتاسا، جىگىتتەر مەن قىزدار جەكەلەي سىندا ءوزارا سايىستى. سونان سوڭ، تەننيسشىلەر جۇپتار جانە ارالاس جۇپتار اراسىندا چەمپيونات جۇلدەلەرى ءۇشىن تالاستى.

جارىستىڭ باس تورەشىسى تاتيانا كيم ءاربىر ويىننىڭ اسا تارتىستى وتكەنىن اتاپ ءوتتى. «چەمپيونات بارىسىندا ەل قۇراماسىنىڭ ساپىندا جۇرگەن شەبەرلەر وزدەرىنىڭ مىقتىلىعىن دالەلدەپ شىقتى»، دەيدى مامان. اتاپ ايتقاندا، قازاقستاننىڭ جەتى دۇركىن چەمپيونى كيريلل گەراسيمەنكو بۇل جولى دا جولىنداعىسىن قوعاداي جاپىرىپ، جەڭىس تۇعىرىنىڭ ەڭ بيىك ساتىسىنا كوەرىلدى. الماتىلىق تەننيسشى فينالدىق سىندا باتىس قازاقستان وبلىسىنىڭ مىقتىسى ايدوس كەنجەعۇلوۆتان باسىم ءتۇستى.

بۇدان بولەك، كيريلل گەراسيمەنكو جۇپتاسىپ ونەر كورسەتۋ سايىسىندا ەلوردالىق تەننيسشى الەكساندر گەراسيمەنكومەن تىزە بىرىكتىرىپ، جارىس جەڭىمپازى اتاندى.

ال ايەلدەر اراسىنداعى تارتىستى سىندا قاراعاندىلىق قىز زاۋرەش اقاشەۆانىڭ ايى وڭىنان تۋىپ، توپ جاردى. چەمپيوناتتىڭ التىنىنا تالاسقان شەشۋشى سايىستا ول ەلوردالىق تەننيسشى اناستاسيا لاۆروۆانى تىزە بۇكتىردى. سونداي-اق، بولاشاعى زور زاۋرەش تەننيسشى شىمكەنتتىك سارۆينوز ميركاديروۆامەن جۇپتاسىپ ونەر كورسەتىپ، چەمپيوناتتىڭ تاعى ءبىر التىن مەدالىن مويىنىنا ءىلدى. ول ول ما، قاراعاندىلىق دارىندى جاس ارالاس جۇپتاسىپ ونەر كورسەتۋ سايىسىندا دا تاماشا تابىسقا قول جەتكىزىپ، جەرلەسى ۆلاديسلاۆ زاحاروۆپەن بىرگە ەل چەمپيونى اتاندى.

سونىمەن، چەمپيوناتتىڭ ءابسوليۋتتى جەڭىمپازى اتانعان زاۋرەش اقاشەۆا الداعى ۋاقىتتا ۇستەل تەننيسىنەن وتەتىن ازيا كۋبوگى جولىنداعى سايىستا  باق سىناۋعا مۇمكىندىك بەرەتىن جولدامانى جەڭىپ الدى. ءبىزدىڭ تەننيسشى قىزىمىز قاتىسقالى وتىرعان بۇل ءدۇبىرلى دودادا قۇرىلىقتىڭ ەڭ ۇزدىك دەگەن 16 تەننيسشىسى ونەر كورسەتەتىن بولادى. زاۋرەشپەن بىرگە اتالعان جارىستا كيريلل گەراسيمەنكو دا كۇش سىنايدى.

ۇستەل تەننيسىنەن سپورت شەبەرى، ۇلتتىق قۇراما كوماندانىڭ مۇشەسى زاۋرەش اقاشەۆانىڭ اتالعان سپورت تۇرىمەن اينالىسقانىنا 12 جىل بولىپتى. كەيىنگى جەتى جىلدا تالانتتى تەننيسشى قاراعاندى وبلىسىنىڭ اعا باپكەرى ەلميرا اليەۆانىڭ قاراماعىندا جاتتىعىپ ءجۇر ەكەن.

«مەنىڭ تابىسقا جەتۋىمە پسيحولوگيادىق ازىرلىك كوپ كومەگىن تيگىزەدى. كوبىنە مەن جالعىز قالىپ، ويعا شومعاندى ۇناتامىن. جۇيكەنى ابدەن تىنىقتىرىپ العان سوڭ، الداعى ويىنداردىڭ تاكتيكالىق تاسىلدەرىن  ويشا قۇراستىرعاندى ۇناتامىن»، دەيدى قازاقستاننىڭ سۋ جاڭا چەمپيونى.

ايتپاقشى، زاۋرەش ءۇشىن بۇل چەمپيونات ەرەسەكتەر اراسىنداعى تۇڭعىش تۋرنير بولدى. بۇدان بۇرىن جاسوسپىرىمدەر اراسىندا قازاقستاننىڭ ەكى دۇركىن چەمپيونى اتانعان دارىندى سپورتشى ۇلكەندەر اراسىنداعى دوداعا تايسالماي ءتۇسىپ، ەلىمىزدىڭ ەڭ مىقتى جانە تاجىريبەلى تەننيسشىلەرىن دالادا قالدىردى.

چەمپيونات قورىتىندىسى بويىنشا قىزدار اراسىنداعى كوماندالىق سىندا باتىس قازاقستان وبلىسىنىڭ تەننيسشىلەرى بارىنەن باسىم ءتۇستى. الماتىلىق شەبەرلەر كۇمىس جۇلدەگەر اتانسا، ەلوردا مەن قاراعاندى وبلىسىنىڭ ۇجىمدارى قولا جۇلدەنى قاناعات ەتتى.

ال ەرلەر  اراسىنداعى كوماندالىق سايىستا نۇر-سۇلتان قالاسىنىڭ ۇجىمى ۇزدىك شىقتى. شىمكەنتتىڭ شەبەرلەرى جۇلدەلى ەكىنشى ورىننان كورىنسە، الماتى قالاسى مەن قاراعاندى وبلىسىنىڭ تەننيسشىلەرى ءۇشىنشى ورىنعا تابان تىرەدى.

جالپى، قاراعاندىدا وتكەن قازاقستان چەمپيوناتى ءتۋرنيرىنىڭ جوعارى دەڭگەيدە ۇيىمداستىرىلعانىن ايتا كەتكەن ءلازىم. جارىستىڭ اشىلۋ سالتاناتىنا وبلىس اكىمى جەڭىس قاسىمبەكتىڭ ارنايى قاتىسىپ، سپورتشىلارعا قۇتتىقتاۋ ءسوز ارناعانىنىڭ ءوزى بۇل سپورت ءتۇرىنىڭ ارقا وڭىرىندە قۇرمەتتىڭ تورىندە ەكەنىن اڭعارتسا كەرەك.

چەمپيوناتتىڭ ماراپاتتاۋ راسىمىندە جەڭىمپاز جانە جۇلدەگەر تەننيسشىلەرگە وبلىس اكىمى اتىنان اقشالاي سەرتيفيكاتتار تابىس ەتىلدى.

 

 

قاراعاندى وبلىسى

سوڭعى جاڭالىقتار

الىپ ءتيىن تورگە وزدى

ايماقتار • كەشە

18،6 ميلليونعا جەتتىك

قازاقستان • كەشە

كحل: «بارىس» جەڭىسكە جەتتى

حوككەي • 15 اقپان، 2020

جول قۇرىلىسىنان تابىلعان اقاۋ كوپ

ايماقتار • 15 اقپان، 2020

اقتوبەدە اۆتوبۋس اۋدارىلدى

ايماقتار • 15 اقپان، 2020

بيىل بقو-دا 1710 پاتەر بەرىلەدى

ايماقتار • 15 اقپان، 2020

جەر سىلكىندى

قازاقستان • 15 اقپان، 2020

ۇقساس جاڭالىقتار