قازاقستان • 21 قاڭتار، 2020

ەسىرتكىنى ناسيحاتتاعاندار 6 جىلعا دەيىن باس بوستاندىعىنان ايىرىلادى

44 رەتكورسەتىلدى

سقو تەرگەۋ باسقارماسىنىڭ باستىعى، پوليتسيا پولكوۆنيگى قايرات قاسىمبەكوۆ باستاعان ءبىر توپ ماماندار 11 قاڭتاردان باستاپ كۇشىنە كىرگەن قك ەنگىزىلگەن وزگەرىستەر مەن قوسىمشالار تۋرالى جۋرناليستەرگە تۇسىنىك بەردى.

سونىڭ ىشىندە «ەسىرتكىنى ناسيحاتتاعانى نەمەسە زاڭسىز جارنامالاعانى ءۇشىن قىلمىستىق جاۋاپكەرشىلىكتى بەلگىلەيتىن جاڭا 299-1 باب ەنگىزىلگەنى تۋرالى ايتىلدى. «باپتىڭ ءبىرىنشى بولىمىمەن اتالمىش قىلمىس ءۇشىن ءۇش جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن. ەگەر بۇل قىلمىس ادامدار توبىمەن، بىرنەشە رەت، بۇقارالىق اقپارات قۇرالدارىن نەمەسە ەلەكتروندىق اقپاراتتىق رەسۋرستاردى پايدالانا وتىرىپ ءبىلىم بەرۋ ۇيىمدارىندا، سونداي-اق ادامدار كوپ جينالاتىن وبەكتىلەردە جاسالسا  3 جىلدان 6 جىلعا دەيىنگى مەرزىمگە باس بوستاندىعىنان ايىرۋعا جازالانادى»، - دەدى ق.قاسىمبەكوۆ.

ەسىرتكىنى قولدانۋ ەمەس، كوپشىلىك ورىنداردا جارنامالاعانى ءۇشىن عانا وسىنشالىق قاتاڭ جازا قولدانىلاتىنى ونىڭ قاسىرەتىنىڭ حالىق اراسىندا ارتىپ كەتكەندىگىن كورسەتەدى. وتكەن جىلى پەتروپاۆلدا كوپقاباتتى ۇيلەر مەن وزگە دە ءۇي-جايلاردىڭ قابىرعالارىنا ەسىرتكى گراففيتيلەرىن جازعان ءتورت ادام ۇستالعان ەكەن. بىراق ولارعا تەك ۇساق بۇزاقىلىق جاساعاندارى ءۇشىن دەگەن جازا بەرىلگەن، ءسويتىپ اكىمشىلىك جاۋاپكەرشىلىككە تارتىلىپتى. ەندى سوندايلار باس بوستاندىعىنان ايىرىلاتىن بولعان.

سونىمەن قاتار تەرگەۋشىلەر قك مال ۇرلىعى ءۇشىن بەرىلەتىن جازانىڭ كۇشەيتىلگەنىن جەتكىزدى. الەۋمەتتىك ماڭىزى زور بۇل قىلمىستىڭ قاسىرەتى ادامدار ءۇشىن ءتىپتى اسەرلى. اۋىل تۇرعىندارى تۇرمىستىق جاعدايىن جاقسارتۋ ءۇشىن ازاپتانىپ، كوزىنىڭ قاراشىعىنداي باعىپ، ساقتاپ وتىرعان الدارىنداعى ناپاقاسىن قولدى قىلعانعا قاتتى قاپالانادى. بىلتىر وبلىستا 92 رەت مال ۇرلىعى تىركەلگەن ەكەن. جازانىڭ جەڭىلدىگىنەن ماسايراپ كەتكەن ۇرىلارعا ء«اي دەر اجا، قوي دەر قوجا» تابىلمايتىن حالگە جەتكەن. ۇستالىپ قالعان كۇننىڭ وزىندە ولار اقىسىن تولەپ، قۇتىلا سالعان. مالدى ورنىنا كەلتىرۋ دە ويعا كەلمەيدى. ەندى مال ۇرلايتىندار ءۇشىن قك 10 جىلعا دەيىنگى مەرزىمگە باس بوستاندىعىنان ايىرۋدى كوزدەيتىن جازا قارالعان. ال وسى ۇرلىقتى ابدەن كاسىپ ەتىپ، بىرنەشە رەت ۇستالعان قاسكويلەر ءۇشىن 188-1-باب بويىنشا 12 جىلعا دەيىنگى مەرزىمگە باس بوستاندىعىنان ايىرۋ جازاسى بەلگىلەنگەن.

ءوزىنىڭ سوزىندە قايرات قاسىمبەكوۆ وزگە دە قىلمىستار ءۇشىن جازالاۋ شارالارىنىڭ كۇشەيتىلگەنى تۋرالى ايتتى. ماسەلەن، ايەل زورلاعانى جانە سەكسۋالدىق سيپاتتاعى باسقا دا زورلىق-زومبىلىق ارەكەتتەرى ءۇشىن قىلمىسكەرلەر ەندى 5 جىلدان 8 جىلعا دەيىنگى مەرزىمگە باس بوستاندىعىنان ايىرۋعا جازالانادى. بۇرىن مۇنداي قىلمىستاردىڭ جازاسى ءۇشىن تەك 5 جىلعا دەيىنگى مەرزىمگە باس بوستاندىعىنان ايىرۋ جازاسىمەن شەكتەلەتىن.  ەندى ءتىپتى زورلاۋشىعا جابىرلەنۋشىمەن تاتۋلاسۋعا مۇمكىندىك بەرىلمەيدى. ەگەر زورلاۋ ارەكەتى جاس بالاعا قاتىستى جاسالسا، وندا قىلمىسكەرلەر 20 جىل مەرزىمگە باس بوستاندىعىنان ايىرۋعا نە ءومىر بويىنا باس بوستاندىعىنان ايىرۋعا جازالانادى.

 

سولتۇستىك قازاقستان وبلىسى

 

سوڭعى جاڭالىقتار

الىپ ءتيىن تورگە وزدى

ايماقتار • كەشە

18،6 ميلليونعا جەتتىك

قازاقستان • كەشە

كحل: «بارىس» جەڭىسكە جەتتى

حوككەي • 15 اقپان، 2020

جول قۇرىلىسىنان تابىلعان اقاۋ كوپ

ايماقتار • 15 اقپان، 2020

اقتوبەدە اۆتوبۋس اۋدارىلدى

ايماقتار • 15 اقپان، 2020

بيىل بقو-دا 1710 پاتەر بەرىلەدى

ايماقتار • 15 اقپان، 2020

جەر سىلكىندى

قازاقستان • 15 اقپان، 2020

ۇقساس جاڭالىقتار