بۇل – جەرگىلىكتى كاسىپكەر ۆلاديمير جۋرجانىڭ باستاماسىمەن ساباننان جاسالعان جاڭاجىلدىق تۋىندى. يدەيا اۆتورى كادىمگى ورامدالعان شوپتەردەن شىرشا, جىل سيمۆولى – تىشقاننان باستاپ, ونىڭ وتباسى, اياز اتا مەن اقشاقار, وتاربا, ەرتەگىلەر كەيىپكەرلەرى, بوشكەلەر ورناتىپ, اۋىل-ايماقتى تاڭداي قاقتىرىپ وتىر. تابيعي ماتەريالدان ىستەلگەن ولار سايكەسىنشە بەزەندىرىلگەن.
ءىرى اگروونەركاسىپ جەتەكشىسى ۆ.جۋرجا مۇنداي سيرەك كەزدەسەتىن لەند-ارت تۋىندىلاردى ۋكراينا مەن بەلارۋس ەلدەرىندە ساياحاتتاپ جۇرگەن جەرىنەن كورىپتى.
– اۋىلىمىزدىڭ ەرەكشە كەيىپكە ەنىپ, ءتۇرلى ەرتەگى كەيىپكەرلەرىنىڭ بولعانىن قالادىم. نەگىزى سابان قالاشىعىن «لاندشتافتستروي» سەرىكتەستىگىنە كۇزدە جاساتقىم كەلگەن. بىراق بۇل جاڭا جىل قارساڭىندا تۇرعىندار ءۇشىن تاماشا تارتۋ بولىپ وتىر. جالعىزحاننىڭ ورتالىق كۇرە كوشەلەرىنە تۇنگى شامدار تارتتىق. ال مۇسىندەردىڭ ماڭايىنا ديودتى, ءديۋرالدى جارىقتار ورناتىلدى. شام ىلىنگەن باعانداردى ءتۇرلى تۇستەرمەن بوياپ, اينالمالى وتشاشۋلار, جالاۋشالار ىلدىك. قاراپايىم شوپتەن جاسالعان مۇنداي مۇسىندەر قاراڭعىدا جارقىراپ, قۇلپىرىپ تۇرادى, – دەيدى يدەيا اۆتورى.
مەتسەناتتىڭ اۋىلداستارىنا جاساعان بۇل بازارلىعىنا باس-اياعى 1 ميلليون تەڭگە قاراجات جۇمسالعان. الايدا, كاسىپكەر بۇل قارجى حالىقتىڭ مەرەكەلىك كوڭىل كۇيىن كوتەرۋگە جاراپ جاتسا, بۇدان اسقان باقىت جوق ەكەنىن جەتكىزدى.
قازىر تاڭعاجايىپقا تولى سابان قالاشىق جەرگىلىكتى تۇرعىندار مەن قوناقتار قىزىقتاپ, سۋرەتكە تۇسەتىن ورىنعا اينالدى. ءتىپتى بۇل كورىنىس ۇلىستىڭ ۇلى كۇنى – ءاز-ناۋرىزعا دەيىن ساقتالىپ, سابان شىرشا – كيىز ۇيگە, اياز اتا مەن اقشاقار – قىدىر اتا مەن قوجاناسىرعا اينالىپ جاتسا ارتىق ەمەس.
قىدىربەك قيىسحان ۇلى
قوستاناي وبلىسى
