الماتى قالاسى كاسىپكەرلەر پالاتاسىنىڭ كەڭسەسىندە وتكەن ماراپاتتاۋ شاراسىندا الماتى قالاسىنىڭ كاسىپكەرلەر پالاتاسى ديرەكتورىنىڭ ورىنباسارى ايتۋار قوشمامبەتوۆ ۇلتتىق ديزاينەرلىك جوبالاردى قولداۋعا, جاڭا ەسىمدەردى تانۋ, قولداۋ كورسەتۋ, كاسىپورىنداردى دامىتۋدى باعىتتالعان بايقاۋعا ەلىمىزدىڭ 14 وڭىرىنەن ءۇش جۇزگە جۋىق ءوتىنىش ءتۇسىپ, مىڭ جارىمنان استام ديزاينەرلەر مەن قىرىققا جۋىق وندىرىستىك كاسىپورىندار قاتىسقاندىعىن جەتكىزدى. «ايەلدەر كاسىپكەرلىگىن قولداۋ جانە تۇراقتى دامىتۋ قورى» قق ديرەكتورى دينارا اللابەرگەن جەڭىمپازدارعا سەرتيفيكاتتار پەن اقشالاي سىيلىقتاردى تابىستاپ, بۇگىندە ايەلدەر كاسىپكەرلىگىن دامىتۋ, كيىم ءوندىرىسى, ونىڭ ىشىندە بالالار كيىمى كاسىپورىندارىن دامىتۋ ماسەلەسىنە توقتالدى.
قازىلار القاسىنىڭ مۇشەسى, قازاقستان قولونەرشىلەر وداعىنىڭ ءتورايىمى ايجان بەكقۇلوۆا وتاندىق ديزاينەرلەردى قولداۋعا باعىتتالعان بايقاۋ جاستاردىڭ كوپتەپ قاتىسۋىمەن ەرەكشەلەنگەندىگىنە توقتالدى. ايجان بەكقۇلوۆا اتاپ وتكەنىندەي, بۇگىندە تالانتتى ديزاينەرلەر كوپ, وسى قىزىقتى جوباعا قاتىسا وتىرىپ, وتاندىق ءونىمدى شىعارۋ, دامىتۋ ماسەلەسى ابدەن ءپىسىپ-جەتىلدى, سوندىقتان دا بۇل بايقاۋ جاس ديزاينەرلەرگە ۇلكەن قولداۋ, سەرپىن بەرەدى.
اتالمىش شاراعا بايقاۋ كوميسسياسىنىڭ مۇشەسى, قازاق ويۋلارى تۋرالى كىتاپتىڭ اۆتورى, كاسىبي سۋرەتشى جانە ديزاينەر ەرلان قوجاباەۆ قاتىستى.
ءۇش كەزەڭمەن وتكەن بايقاۋ قورىتىندىسى بويىنشا كوميسسيا مۇشەلەرى 12 ۇمىتكەردى انىقتادى, وندا ءار نوميناتسيا بويىنشا ەكى ۇمىتكەردەن انىقتالدى. بايقاۋدىڭ قورىتىندىسىنا سايكەس باس جۇلدە الماتىلىق الينا دانيلوۆاعا «ۇلتتىق ويۋ-ورنەكپەن كومكەرىلگەن سپورت كيىمنىڭ ۇزدىك ديزاينى» نوميناتسياسى بويىنشا بەرىلسە, الماتىلىق ديزاينەر ەلميرا بيتورەەۆا بايقاۋدىڭ لاۋرەاتى بولىپ, «ۇلتتىق ويۋ-ورنەكپەن كومكەرىلگەن ىسكەرلىك كيىمنىڭ ۇزدىك ديزاينى» نوميناتسياسىندا اتالدى.
