وسى سەلونىڭ ءۇش تۇرعىنى كەشكى توعىز كەزىندە سىنىپ قالعان «ۆاز 2106» اۆتوكولىگىن «زيل» جۇك ماشيناسىنا تىركەپ, قالىڭ قاردان شىعارىپ الماق بولىپ, اۋرەلەنىپ جاتادى. كەشكى توعىزدا كوز بايلانعان شاق قوي.
وسى كەزدە جولدا قاتتى كەلە جاتقان «ۋاز» ءاۆتوموبيلى «ۆاز» ماشيناسىن سوعادى. سونىڭ كەسىرىنەن رولدە وتىرىپ, قاتتى سوققى العان «ۆازدىڭ» يەسى ءتىل تارتپاي, دۇنيەدەن وتكەن. ءسويتىپ, 1986 جىلى تۋعان ازامات اياق استىنان قازا بولىپ, جاقىندارى زار يلەپ قالدى.
سويتسە, ونى سوققان «ۋاز» كولىگىنىڭ جۇرگىزۋشىسى ۋداي ماس ەكەندىگى انىقتالدى. سونىمەن بىرگە ونىڭ كولىك جۇرگىزۋ كۋالىگى دە جوق ەكەندىگى بەلگىلى بولىپ وتىر. ونىڭ ءاۆتوموبيلدى كۋالىكسىز جۇرگىزۋى بۇگىن عانا بەلگىلى بولماعان. وسىعان دەيىن ول كۋالىكسىز كولىك جۇرگىزگەنى ءۇشىن ۇستالىپ, بىلتىر ءبىر رەت اكىمشىلىك جاۋاپكەرشىلىككە تارتىلعان ەكەن. بىراق وعان مىسە تۇتپاعان ەسەرسوق كولىكتى ءىشىپ الىپ, كۋالىكسىز جۇرگىزۋىن قويماعان.
ەندى 35 جاسقا جاڭا كەلگەن ول ۇزاق جىل ءومىرىن تۇرمەدە وتكىزەتىن بولدى. قازىر ماس بولىپ كولىك ايداعاننىڭ ءوزى قىلمىس دەپ سانالىپ, جەتى جىلعا دەيىن باس بوستاندىعىنان ايرىلادى. ال مىناۋ ماس بولعان عانا ەمەس, كىسى ولتىرگەن ادام رەتىندە اۋىر جازا الارى ءسوزسىز. سونىمەن بىرگە ول كولىك جۇرگىزۋ قۇقىنان ءومىر باقيعا ايرىلۋى مۇمكىن. ونى ەندى سوت شەشەدى.
