ءبىرىنشى كەزەڭدە كورەرمەندەر قاقپاعا سوعىلعان ءۇش شايبانىڭ كۋاسى بولدى. 5 مينۋتتا داستين بويد ەسەپ اشسا, 9 مينۋتتا ۆلاديسلاۆ كاراتاەۆ تارازى باسىن تەڭەستىردى. ارادا بەس مينۋتتان اسا ۋاقىت وتكەننەن سوڭ ءدال سول كانادالىق لەگيونەر «بارىستى» قايتا العا شىعاردى.
ۇزىلىستەن كەيىن اركادي شەستاكوۆ ءۇشىنشى گولدى قاقپاعا توعىتسا, الەكساندر كادەيكين ەسەپ ايىرماشىلىعىن قىسقارتتى.
ءۇشىنشى كەزەڭ باستالعان بەتتە قورعاۋشىلارىمىزدىڭ قاتەلىگىن ۇتىمدى پايدالانعان قوناقتار ەسەپتى تەڭەستىرىپ كەتتى. دەسەك تە بۇل جاعداي ءبىزدىڭ جىگىتتەردىڭ جىگەرىن جاسىتا العان جوق. كەزدەسۋدىڭ سوڭىنا تامان باس-اياعى ءبىر مينۋت ارالىعىندا ايدىن يەلەرى قاتارىنان ەكى مارتە نىسانانى ءدال كوزدەدى. بۇل گولدىڭ اۆتورلارى – اركادي شەستاكوۆ پەن اتتە وحتاماا.
وسىلايشا, اسا شيەلەنىستى وتكەن باسەكەدە «بارىس» 5:3 ەسەبىمەن جەڭىسكە جەتتى.
وسى كۇنگە دەيىن 48 ويىن وتكىزىپ, 63 ۇپاي جيعان «بارىس» قازىرگى كەزدە تۇراقتى بىرىنشىلىكتىڭ جارىس كەستەسىندە جەتىنشى ورىندى يەلەنۋدە. شىعىس كونفەرەنتسياسىندا جەرلەستەرىمىز ءۇشىنشى ورىندا تۇر. ەندى ءوزىنىڭ كەلەسى كەزدەسۋىن ولار نۇر-سۇلتاندا ماگنيتوگورسكىنىڭ «مەتاللۋرگ» كلۋبىنا قارسى وتكىزەدى.
