سەناتور ەلىمىزدىڭ ىشكى ىستەر مينيسترلىگىنىڭ قۇقىق ماگيسترلەرىن, سونداي-اق «قۇقىق قورعاۋ قىزمەتى» ماماندىعى بويىنشا PhD دوكتورلارىن دايارلاۋ باعدارلاماسى بويىنشا ءبىلىم بەرەتىن ماقان ەسبولاتوۆ اتىنداعى اكادەمياسىنىڭ جۇمىسىمەن تانىستى. اكادەميا كۋرسانتتارى سونىمەن قاتار «اقپاراتتىق جۇيەلەر» جانە «راديوتەحنيكا, ەلەكترونيكا جانە تەلەكوممۋنيكاتسيا» ماماندىقتارى بويىنشا ءبىلىم الادى.
دەپۋتات كەزدەسۋ بارىسىندا قۇقىق قورعاۋ ورگاندارىنىڭ جوعارى وقۋ ورىندارى اراسىندا جەتەكشى عىلىمي ءارى وقۋ-ادىستەمەلىك ورتالىق بولىپ تابىلاتىن اكادەميادا ىشكى ىستەر ورگاندارىنا ماماندار دايارلاۋ ءۇشىن بارلىق جاعداي جاسالعانىن اتاپ ءوتتى. پروفەسسورلىق-وقىتۋشىلىق قۇرام ىشكى ىستەر ورگاندارىنىڭ جەدەل-قىزمەتى مەن وقۋ پروتسەسىنە ەنگىزىلگەن 500-دەن استام مونوگرافيالار, وقۋلىقتار مەن وقۋ قۇرالدارىن, پراكتيكالىق جانە ادىستەمەلىك ۇسىنىمدار دايىنداعان بولاتىن.
م.قۇل-مۇحاممەد ءوز سوزىندە ەلىمىزدىڭ تۇڭعىش پرەزيدەنتى – ەلباسى ن.ءا.نازارباەۆتىڭ تاپسىرماسى بويىنشا 2019 جىلى ازىرلەنگەن قازاقستان رەسپۋبليكاسىنىڭ ىشكى ىستەر ورگاندارىن جاڭعىرتۋ جونىندەگى 2019-2021 جىلدارعا ارنالعان جول كارتاسىن ىسكە اسىرۋ ماسەلەلەرىنە توقتالدى. دەپۋتات سونداي-اق قىلمىستىق جانە اكىمشىلىك جاۋاپكەرشىلىكتى قاتايتۋ ماسەلەلەرى بويىنشا پارلامەنت قابىلداعان كەيىنگى زاڭنامالىق اكتىلەر تۋرالى دا ايتتى.
سەنات دەپۋتاتى مۇحتار قۇل-مۇحاممەد قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ الماتىداعى اكادەمياسى كۋرسانتتارىمەن جانە پروفەسسورلىق-وقىتۋشىلىق قۇرامىمەن كەزدەسۋ بارىسىندا مەملەكەت باسشىسى ق.توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋى اياسىندا اسكەري قىزمەتشىلەردى كاسىبي دايارلاۋ ماسەلەلەرىن تالقىلادى.
حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مەملەكەت ەگەمەندىگىن نىعايتۋ, ۇلتتىق قاۋىپسىزدىك پەن اۋماقتىق تۇتاستىقتى قامتاماسىز ەتۋ قازاقستان رەسپۋبليكاسىنىڭ قارۋلى كۇشتەرىن, باسقا دا اسكەرلەرى مەن اسكەري قۇرالىمدارىن قالىپتاستىرۋ مەن دامىتۋدىڭ جاڭا تۇجىرىمداماسى باسىمدىقتارىنىڭ قاتارىندا ەكەنىن اتاپ ءوتتى.
سەناتور ءوز سوزىندە مەملەكەت باسشىسىنىڭ جولداۋدا العا قويعان باستى مىندەتتەردىڭ ءبىرى جاڭا تۇجىرىمداما نەگىزىندە جاۋىنگەرلىك قابىلەتتى ارميا قالىپتاستىرۋ بولىپ تابىلاتىنىن ايتتى.
شەكارا قىزمەتىنىڭ بولاشاق وفيتسەرلەرىنە ارناعان سوزىندە سەناتور: «مەملەكەت باسشىسى ءوز جولداۋىندا كاسىبي دايارلىعى مول, وتانعا ادال وفيتسەر كادرلارمەن جانە اسكەري قىزمەتشىلەردەن جاساقتالعان ءبىزدىڭ اسكەرىمىز جاڭا گەوساياسي احۋالدا ەل قاۋىپسىزدىگىنە تونەتىن قاۋىپ-قاتەردى تويتارۋعا دايىن بولۋى ءتيىس ەكەنىن اتاپ ءوتتى. جوعارى جاۋىنگەرلىك دايىندىق پەن ۇرىسقا قابىلەتتى بولۋدى جوعارى كاسىبي اسكەري كادرلار عانا قامتاماسىز ەتە الاتىنى اقيقات. مەملەكەت باسشىسىنىڭ جولداۋىنداعى اسا ماڭىزدى شاقىرۋ ەڭ الدىمەن, ەلىمىزدىڭ جەتەكشى اسكەري وقۋ ورىندارىنىڭ وكىلدەرىنە ارنالعان. ءبىزدىڭ اسكەري بولىمشەلەردى, ونىڭ ىشىندە مەملەكەتتىك شەكاراداعى بولىمشەلەردى جوعارى كاسىبي كادرلارمەن سىزدەر قامتاماسىز ەتەسىزدەر» دەدى.
دەپۋتات كەزدەسۋ بارىسىندا شەكارا اكادەمياسىنىڭ وقىتۋ ادىستەمەسىمەن جانە وقۋ-ماتەريالدىق بازاسىمەن تانىستى, وقۋ سىنىپتارىن, سپورت زالىن جانە جاتاقحانانى ارالاپ كوردى.
