قازاقستان ۇوك باسشىسى الەمدەگى وليمپيادالىق قوزعالىستىڭ اسا ماڭىزدى ماسەلەلەرىن تالقىلاپ, شەشىم قابىلداعان حالىقارالىق وليمپيادالىق كوميتەتتىڭ (حوك) 135-ءشى سەسسياسىنا قاتىستى. وتىرىستا حوك پرەزيدەنتىنىڭ ەسەبى تىڭدالىپ, 2020 جىلعى توكيو وليمپياداسىن, 2020 جىلعى لوزانناداعى قىسقى جاسوسپىرىمدەر وليمپياداسىن جانە 2022 جىلعى داكارداعى جازعى جاسوسپىرىمدەر وليمپياداسىن ۇيىمداستىرۋ كوميتەتتەرى ەسەپ بەردى.
سەسسيا جۇمىسى بارىسىندا 2024 جىلعى قىسقى جاسوسپىرىمدەر وليمپياداسىن ازيا ايماعىندا – كاننىن مەن پحەنچحان قالاسىندا وتكىزۋ تۋرالى شەشىم قابىلداندى. بۇل ەكى قالا 2018 جىلعى قىسقى وليمپيادا ويىندارىن قابىلداعان بولاتىن. سول سەبەپتى, ولاردىڭ ۇسىنىسى 2020 جىلعى وليمپيادا كۇن ءتارتىبىنىڭ تالاپتارىنا تولىعىمەن ساي كەلدى.
ودان بولەك, تيمۋر ق ۇلىباەۆ حوك-تىڭ قوعاممەن بايلانىس جانە سپورت ارقىلى الەۋمەتتىك دامۋ كوميسسياسىنىڭ وتىرىسىنا قاتىستى. سونداي-اق سەسسيا كەزىندە حوك پرەزيدەنتى توماس باحپەن كەزدەستى. حوك جانە قازاقستان ۇوك باسشىلارى 2020 جىلعى توكيو وليمپياداسىنا دايىندىق بارىسىن تالقىلادى. قىزمەتتىك ءىسساپار اياسىندا ۇوك پرەزيدەنتى لوزانناداعى ءۇشىنشى جاسوسپىرىمدەر ويىندارىنىڭ وليمپيادالىق قالاشىعىنا ات باسىن تىرەپ, قازاقستاندىق سپورتشىلارمەن كەزدەستى.
بۇل كۇندەرى لوزاننادا 15-18 جاس ارالىعىنداعى سپورتشىلاردىڭ باسىن قوسقان جاسوسپىرىمدەر وليمپياداسى وتۋدە. ولاردىڭ قاتارىندا 26 قازاقستاندىق سپورتشى بار.
«ەڭ الدىمەن بارشاڭىزعا جاسوسپىرىمدەر وليمپياداسىنا قوش كەلدىڭىزدەر دەگىم كەلەدى. لوزانناداعى دودا سىزدەردىڭ تابىستى ءارى جارقىن بولاشاقتارىڭىزدىڭ باستاۋى بولادى دەپ سەنەمىن. جاسوسپىرىمدەر وليمپياداسى - ۇلكەن سپورتتىق مەرەكەنىڭ اتموسفەراسى مەن رۋحىن سەزىنۋگە بەرىلگەن تاپتىرماس مۇمكىندىك. مۇندا جيناعان تاجىريبەلەرىڭىز بولاشاقتا كادەگە جارايدى دەپ ەسەپتەيمىن. سىزدەر قازاقستان ۇلتتىق قۇراما كوماندالارىنىڭ رەزەرۆى سانالاسىزدار, ەلىمىزدىڭ بولاشاقتاعى ءىرى جەڭىستەرى سىزدەرمەن تىكەلەي بايلانىستى. سپورت دەگەنىمىز تەك قانا جۇلدەگە تالاسۋ ەمەس. ونىڭ اۋقىمى كەڭ. ەلدەر اراسىنداعى دوستىقتى نىعايتۋدا دا سپورتتىڭ ءرولى ەرەكشە. ال جاسوسپىرىمدەر وليمپياداسى حالىقتار دوستىعىنىڭ سيمۆولى سانالادى. مۇنىڭ جارقىن مىسالى – وسى وليمپياداداعى ءارتۇرلى ەل وكىلدەرىنەن جاساقتالعان كوماندالار اراسىنداعى حوككەي جارىسى. وليمپيادا ويىندارى ءوز الەۋەتتەرىڭىزدى انىقتاپ, مۇمكىندىكتەرىڭىزدى جۇزەگە اسىرۋعا ارنالعان الاڭ. سىزدەرگە تابىس, ءتوزىم جانە ءىرى جەڭىستەر تىلەيمىن», دەپ اتاپ ءوتتى تيمۋر ق ۇلىباەۆ.
ءىسساپار ۇلتتىق وليمپيادالىق كوميتەتتەر قاۋىمداسىعى اتقارۋشى كوميتەتتەرىنىڭ وتىرىسىمەن جالعاسادى. ايتا كەتەلىك, قازاقستان ۇوك پرەزيدەنتى تيمۋر ق ۇلىباەۆ 2018 جىلدىڭ قاراشا ايىنان بەرى اتالعان ۇيىمعا مۇشە 24 ادامنىڭ قاتارىنا ەندى.
