الدىمەن وبلىستىق ءبىلىم باسقارماسى باستىعىنىڭ ورىنباسارى ۆلاديمير تكاچەنكو بايانداما جاساپ, بىلتىر «يۆۋشكا», «اق بوتا» جانە «بالداۋرەن» بالاباقشالارىنىڭ سەنىمدى باسقارۋعا بەرىلگەندىگىن ايتتى. ولاردى «بال ارمان» جشس الىپتى. جارتى جىلعا جەتپەي «يۆۋشكا» بالاباقشاسىن العان سەرىكتەستىك اتا-انالاردىڭ تولەمىن 23 مىڭ تەڭگەگە دەيىن كوتەرگەن. ويتكەنى, ولار 21 ملن. تەڭگەنىڭ ينۆەستيتسياسىن سالدى دەدى شەشەن. سونىمەن بىرگە ون ءتورت ادامدىق قازاق توبىن جابۋ تۋرالى شەشىم قابىلداعان.
وسىدان ءبىراز بۇرىن «حابار 24» تەلەارناسىنىڭ ءتىلشىسى بالاباقشا باسشىلارى ءتورت ورىس توبىنا قازاق تىلىندە تاربيەلەنەتىن ون ءتورت بالالى توپتى بولەمىز, ءسويتىپ ءبارىن تەك ورىس تىلىندە تاربيەلەيتىن بولامىز, دەپ ايتقانىن جەتكىزگەن. ال قازاق توبىن الىپ قالامىز, ولاردىڭ ورىس توبىنىڭ ەسەبىنەن تولتىرۋعا تىرىسامىز دەگەندى سەنىمدى باسقارۋعا العان ورىس تىلدەستەر ويىنا دا المايتىن بولسا كەرەك. ورىس توپتارىن قازاق بالالارىمەن ءبىر توپقا قوسايىق دەسەك, ولاردىڭ اتا-انالارى شۋ شىعارادى جانە اتا-انالار جاڭا تولەماقىنى كوتەرە المايتىنىن بالاباقشانىڭ مەڭگەرۋشىسى زينايدا توكارەۆا ايتقان.
ال «حابار-24» ءتىلشىسىنىڭ ايتۋىنا قاراعاندا مەملەكەت ءاربىر بالا ءۇشىن سەنىمدى باسقارۋعا العاندارعا 30 مىڭ تەڭگەدەن تولەيدى ەكەن. قالعان شىعىندار كاسىپكەردىڭ موينىندا. شاعىن سيۋجەتتەن تۇسىنگەنىمىز – سەنىمدى باسقارۋعا العان كاسىپكەر قازاق توبىن جاۋىپ, تەك قانا ورىس توپتارىن قالدىرۋدى عانا الدىنا ماقسات تۇتقان. ءوزىنىڭ قاي مەملەكەتتە قىزمەت ىستەيتىنىن دە ەسكەرمەگەن.
ءماجىلىس دەپۋتاتى كارىباي مۇسىرمانمەن بولعان كەزدەسۋدە اتالمىش بالاباقشالاردىڭ ءبارى قالىپتى جۇمىس ىستەپ تۇرعان مەكەمەلەر ەكەندىگى بەلگىلى بولدى. ەندەشە ولاردى سەنىمدى باسقارۋعا بەرۋدىڭ دە ماجبۇرلىگى جوق. الايدا قالالىق ءبىلىم باسقارماسىنىڭ باستىعى سارا ميرونقىزى رامازانوۆا دەگەن حانىم بۇل بالاباقشالاردى جامانداۋعا تىرىستى. ورىس تىلدەس ايەل قازاقشا قويىلعان ساۋالدارعا دا جاۋاپ بەرە الماي, توسىلىپ, تۇرىپ الدى. سونىمەن بىرگە ونىڭ مامليۋت اۋدانىنان كەلگەندىگى, ال جاپ-جاقسى بالاباقشالاردى سەنىمدى باسقارۋعا العان كاسىپكەر دە سول اۋداندىكى ەكەنى بەلگىلى بولدى. جۋرناليستەردىڭ ءسىز ول كاسىپكەردى بىلەتىن بە ەدىڭىز دەگەن ساۋالىنا ميرونقىزى جاۋاپ بەرمەدى. كەزدەسۋگە قاتىسۋعا كەلگەن اماندىق جانتەمىروۆ دەگەن اقساقال وسى كاسىپكەردى بىلەتىنىن جانە ونىڭ از ۋاقىتتىڭ ىشىندە بالاباقشانى كوركەيتۋگە 21 ملن. تەڭگە ينۆەستيتسيا سالعانىنا ءشۇبالى ەكەنىن ايتىپ سالدى. «مەن ونىڭ ەشقانداي ارتىق اقشاسى جوق ەكەنىن جاقسى بىلەمىن» دەدى اقساقال.
ال وسى جولدار اۆتورىنىڭ وبلىستىق ءبىلىم باسقارماسى باستىعىنىڭ ورىنباسارى ۆ.تكاچەنكوعا: «سەنىمدى باسقارۋعا بەرىلگەن كەلىسىمشارتتا ايتىلعان بەيىندىلىكتى ساقتاۋ تۋرالى مىندەتتەمە» تالابىن ورىنداماعانى ءۇشىن سەنىمدى باسقارۋدان قايتادان الىپ قويۋعا بولمادى ما جانە وسى ءىستى قاداعالاماعان جاۋاپتى شەنەۋنىكتەر قالاي جازالانادى دەگەن ساۋالى دا جاۋاپسىز قالدى. مۇندايدى تكاچەنكو ومىرىندە ءبىرىنشى رەت ەستىگەندەي يىعىن قيقاڭداتۋدى ءبىلدى.
ۇزىن ءسوزدىڭ قىسقاسى, وبلىستىڭ دەمەسەك تە پەتروپاۆل قالاسى ءبىلىم باسقارۋ سالاسىندا مەملەكەتتىك مۇددەنى ساقتايتىن جانە ونىڭ بۇزىلماۋىنا جول بەرمەيتىن مەمپلەكەتتىك شەنەۋنىكتەر جوق پا دەپ قالدىق. سالانى باسقاراتىن س.ميرونقىزى دەگەن شەنەۋنىك ونى كەرەك قىلىپ تۇرماعانى دا كورىنىپ تۇر. ءتيىستى ورگاندار بۇل ماسەلەگە نازار اۋدارار دەگەن ۇمىتتەمىز.
