ءبىر وتباسىنىڭ قۋانىشى بۇكىل ەلدىڭ قۋانىشى ەمەس پە؟ ەلىمىزدىڭ وڭتۇستىك اۋماعىنان كەلىپ, ۋچاسكەلىك پوليتسيا ينسپەكتورى بولىپ قىزمەت ەتىپ جاتقان پوليتسيا لەيتەنانتى ازاتبەك تەمىرحان ۇلىنا وسى اۋدانداعى ءوزى تۇراتىن ترۋدوۆوە اۋىلىندا 75 شارشى مەتر ءۇيدىڭ كىلتى تابىس ەتىلدى. ونى «سانتا-ماريا» جاۋاپكەرشىلىگى شەكتەۋلى سەرىكتەستىگىنىڭ جەتەكشىسى پاۆەل لەونوۆ تۇرعىزىپ بەردى. ءۇيدىڭ كىلتىن تابىس ەتۋ شاراسىنا سقو پد باستىعىنىڭ ءبىرىنشى ورىنباسارى, پوليتسيا پولكوۆنيگى دۋمان تاەۆ قاتىسىپ, ۇيگە قول جەتكىزگەن كىشى وفيتسەردى العاشقى بولىپ قۇتتىقتادى. ءسويتىپ, تۇڭعىش پەرزەنتتەرىن ەندى كورگەلى وتىرعان جاس وتباسى قۋانىشقا كەنەلدى. «ىشكى ىستەر مينيسترلىگى, پوليتسيا دەپارتامەنتى, جەرگىلىكتى اتقارۋشى ورگاندار تاراپىنان كورسەتىلىپ وتىرعان قولداۋ قىزمەتتە سەرپىلىس بەرەدى, ءوزىم جۇمىس ىستەيتىن ۋچاسكەدە تۇرعىندارعا ءمىنسىز قىزمەت اتقارۋعا يتەرمەلەيدى» دەيدى جاس لەيتەنانت.
وبلىستا ۋچاسكەلىك ينسپەكتورلاردى الەۋمەتتىك تۇرعىدان قولداۋ جالعاسىپ كەلەدى. جاقىندا تايىنشا اۋدانىنداعى قاراعاش اۋىلىندا دا «استىق-STEM» جشس سالىپ بەرگەن قىزمەتتىك ۇيگە اۋداندىق پوليتسيا ءبولىمىنىڭ ۋچاسكەلىك پوليتسيا ينسپەكتورى رۋسلان بەكبولاتوۆ قونىستاندى. پوليتسيا دەپارتامەنتىندەگى جەدەل كەڭەستە وبلىستىق پوليتسيا ۆەدومستۆوسىنىڭ باستىعى, پوليتسيا پولكوۆنيگى مارات تولەباەۆ بارلىق اۋداندىق بولىنىستەردىڭ باسشىلارىنا ۋچاسكەلىك پوليتسيا ينسپەكتورلارىنا جان-جاقتى قولداۋ كورسەتۋدى تاپسىردى. قازىر پوليتسيا دەپارتامەنت بارلىق ۋچاسكەلىك پوليتسيا ينسپەكتورلاردىڭ باسپانالىق-تۇرمىستىق جاعدايىنا مونيتورينگ جۇرگىزۋدى جوسپارلاپ وتىر. «قۇقىقتىق ءتارتىپ پەن اۋماقتارداعى پروفيلاكتيكالىق جاعداي ءتارتىپ ساقشىلارىنىڭ جۇمىس ساپاسىنا بايلانىستى, ال ولاردىڭ جۇمىس تيىمدىلىگى الەۋمەتتىك جاعدايى دۇرىس بولعاندا عانا ارتارى ءسوزسىز» دەيدى پوليتسيا باستىعى.
