كيەۆكە باعىت العان PS752 ۇشاعى تەگەرانداعى يمام حومەيني اۋەجايىنان كوتەرىلە بەرە قۇلاعان. يرانداعى ۋكراينا ەلشىلىگىنىڭ مالىمەتىنە سۇيەنسەك, الدىن الا بولجام بويىنشا ۇشاقتىڭ قۇلاۋىنا قوزعالتقىشتىڭ ىستەن شىعۋى سەبەپ بولعان.
«العاشقى اقپاراتقا ساي, تەحنيكالىق سەبەپتەرگە بايلانىستى قوزعالتقىشتىڭ ىستەن شىعۋىنان ۇشاق قۇلادى. قازىرگى تاڭدا وقيعاعا تەرروريستىك شابۋىلدىڭ قاتىسى انىقتالىپ جاتىر», دەلىنگەن ۋكراينا سىرتقى ىستەر مينيسترلىگىنىڭ سايتىندا.
اپاتتان قازا تاپقانداردىڭ باسىم بولىگى – يران ازاماتتارى (82 ادام). سونداي-اق كانادانىڭ – 63, ۋكراينانىڭ – 11, شۆەتسيانىڭ – 10, اۋعانستاننىڭ – 4, ۇلىبريتانيانىڭ – 3 جانە گەرمانيانىڭ 3 ازاماتى قايتىس بولعان.
قازاقستان سىرتقى ىستەر مينيسترلىگىنىڭ حابارلاۋىنشا, قازا تاپقاندار اراسىندا قازاقستان ازاماتى جوق. «يران سىرتقى ىستەر مينيسترلىگىنىڭ قازاقستاننىڭ تەگەرانداعى ەلشىلىگىنە بەرگەن الدىن الا اقپاراتى بويىنشا, ۋكراينا اۋە كومپانياسىنىڭ قۇلاعان ۇشاعىنىڭ جولاۋشىلارى اراسىندا قازاقستاندىقتار جوق. سونىمەن قاتار ەلشىلىك كونسۋلدىق ەسەپتە تۇرعان قازاقستان رەسپۋبليكاسىنىڭ بارلىق ازاماتتارىمەن بايلانىسىپ جاتىر», دەدى سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆ. قازىرگى تاڭدا يراندا قازاقستاننىڭ 174 ازاماتى تىركەلگەن.
ۇشاقتىڭ اپاتقا ۇشىراۋىنا بايلانىستى ۋكراينا پرەزيدەنتى ۆولوديمير زەلەنسكي ومانعا ساپارىن توقتاتىپ, كيەۆكە قايتا ورالدى. سونداي-اق رەسمي مالىمەتتەن بۇرىن تەكسەرىلمەگەن اقپاراتتى تاراتپاۋدى سۇرادى. «بارلىق جولاۋشىلار مەن ەكيپاج مۇشەلەرىنىڭ تۋىستارىنا جانە دوستارىنا قايعىرىپ كوڭىل ايتامىن», دەدى ۆ.زەلەنسكي.
وسى وقيعادان كەيىن ۋكراينا حالىقارالىق اۋەجولدارى (UIA) تەگەران باعىتىنداعى بۇكىل رەيستى توقتاتتى. يران بۇقارالىق اقپارات قۇرالدارىنىڭ حابارلاۋىنشا, قۇتقارۋشىلار ۇشاقتىڭ «قارا جاشىگىن» تاپقان. ۆ.زەلەنسكيدىڭ سوزىنە قاراعاندا, ۋكراينا قازا تاپقانداردىڭ دەنەسىن ەلگە جەتكىزۋ ءۇشىن ارنايى ۇشاق ازىرلەگەن. قازىرگى تاڭدا يران تاراپىنىڭ ماقۇلداۋىن كۇتىپ وتىر.
اپاتقا ۇشىراعان ۇشاقتىڭ قىزمەت كورسەتە باستاعانىنا كوپ بولماعان. بوينگ 737-800 NG اۋە كەمەسى 2016 جىلى جاسالىپ, قولدانىسقا بەرىلگەن. سودان بەرى ۇشاق UIA كومپانياسىنا مۇلتىكسىز قىزمەت ەتىپ كەلگەن ەكەن. ونىڭ ۇستىنە, يران اۋە اپاتى ءجيى بولاتىن ەلگە جاتادى. كەيىنگى ءۇش جىلدا وسى ەلدە
3 مارتە ۇشاق قۇلاپ وتىر.
بوينگ كومپانياسى اۋە كەمەسىنىڭ قۇلاۋىن تەكسەرۋدى ءجىتى باقىلايتىنىن مالىمدەدى. «يرانداعى اپات تۋرالى حاباردارمىز. قازىرگى تاڭدا اقپارات جيناپ جاتىرمىز», دەگەن بوينگتىڭ ءباسپاسوز حاتشىسى CNN ارناسىنا بەرگەن سۇحباتىندا. ايتا كەتۋ كەرەك, كەيىنگى بىرنەشە جىلدا بوينگتىڭ جاڭا ۇشاقتارى ءجيى قۇلاپ ءجۇر. ماسەلەن, 2018 جىلى Lion Air كومپانياسىنىڭ Boeing 737 Max ۇشاعى جانە 2019 جىلى Ethiopian Airlines كومپانياسىنىڭ Boeing 737 Max ۇشاعى قۇلاپ, جالپى سانى 346 ادام قازا تاپقان-تۇعىن. سودان بەرى كومپانيا Boeing 737 Max سەرياسىنداعى بۇكىل اۋە كەمەسىن قايتارعان-دى.
ءدال وسى Boeing 737-800 اۋە كەمەسى دە ءجيى قۇلايدى. 2016 جىلى FlyDubai كومپانياسىنىڭ وسىنداي ماركالى ۇشاعى رەسەيدىڭ روستوۆ قالاسىنا قونۋ كەزىندە اپاتقا ۇشىراپ, 62 ادامنىڭ ءومىرىن جالماعان ەدى. 2010 جىلى Air India Express كومپانياسىنىڭ ۇشاعى ءۇندىستاندا قۇلاپ, 150-دەن استام ادام قازا تاپقان-دى.
ادەتتە بوينگ كومپانياسى وسىنداي اپاتتاردى تەكسەرۋ جۇمىسىنا كومەگىن اياعان ەمەس. بىراق بۇل جولى كومپانيانىڭ قولى بايلاۋلى بولىپ تۇر. اقش-تىڭ يرانعا سالعان سانكتسياسىنا بايلانىستى امەريكالىق كومپانيا اپات سالدارىن انىقتاۋعا تولىققاندى كومەكتەسە الماۋى ىقتيمال.
قازىرگى تاڭدا اپاتتىڭ سەبەبى انىقتالىپ جاتىر. ۋكراينا سىرتقى ىستەر مينيسترلىگىنىڭ حابارلاۋىنشا, قورىتىندى شىعارۋعا ءالى ەرتە.
