پارلامەنت ءماجىلىسى توراعاسىنىڭ ورىنباسارى ۆلاديمير بوجكو, ءماجىلىس دەپۋتاتتارى سەرىك قۇسايىنوۆ, شايماردان نۇرىموۆ, يۋري تيموششەنكو, ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى-شەكارا قىزمەتىنىڭ ديرەكتورى, گەنەرال-مايور دارحان ءدىلمانوۆ, يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ توراعاسى سايرانبەك بارماقوۆ, قارجى مينيسترلىگى مەملەكەتتىك كىرىستەر كوميتەتىنىڭ وكىلدەرى قورداي اۋدانىندا بولىپ, بىرقاتار ماڭىزدى كەزدەسۋگە قاتىستى. ولار اۋەلى جامبىل وبلىسى اكىمىنىڭ ورىنباسارى نۇرجان كالەندەروۆ پەن قورداي اۋدانىنىڭ اكىمى بولاتبەك بايتولەمەن بىرگە «سورتوبە» بەكەتىندە بولدى. مۇندا شەكاراشىلار كەلۋشىلەرگە پۋنكتتىڭ قازىرگى الەۋەتى مەن جۇمىسى جايىندا مالىمەت بەردى. بۇل رەتتە اۋدان اكىمى بولاتبەك بايتولە «قورداي» وتكىزۋ بەكەتىنىڭ كۇردەلى جوندەۋگە جابىلۋىنا بايلانىستى وزگە بەكەتتەرگە قوسىمشا كۇش تۇسەتىنىن ەسكەرىپ, اۋدان اكىمدىگى تاراپىنان بىرقاتار جاعدايدىڭ جاسالعانىن ايتتى. سونىمەن قاتار ادامداردى وزگە پۋنكتتەرگە تاسىمالداۋ ماقساتىندا ارنايى كولىكتەر ۇيىمداستىرىلعانىن دا مالىمدەدى. بۇدان كەيىن لاۋازىمدى تۇلعالار اۋداننىڭ «اۋقاتتى» جانە «قاراسۋ» وتكىزۋ پۋنكتتەرىنە بارىپ, سودان سوڭ «قورداي» وتكىزۋ بەكەتىندە قىرعىز رەسپۋبليكاسى پارلامەنتى جوگوركۋ كەنەشىنىڭ دەپۋتاتتارىمەن كەزدەستى. كەزدەسۋگە كورشى مەملەكەت تاراپىنان قىرعىز رەسپۋبليكاسى پارلامەنتى جوگوركۋ كەنەشى توراعاسىنىڭ ورىنباسارى ميرلان باكيروۆ, جوگوركۋ كەنەش دەپۋتاتتارى المازبەك ەرگەشوۆ, گۇلشات اسىلباەۆا, ابدىۆاحاپ نۋرباەۆ, قىرعىز رەسپۋبليكاسى مەملەكەتتىك شەكارا قىزمەتى توراعاسىنىڭ ءبىرىنشى ورىنباسارى ابدىكەريم اليمباەۆ, قىرعىز رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى نۋران نيازاليەۆ جانە قىرعىز رەسپۋبليكاسى ەكونوميكا ءمينيسترىنىڭ ورىنباسارى اۆتانديل الىباەۆ كەلدى.
ەكىجاقتى كەزدەسۋ بارىسىندا دەپۋتاتتار «قورداي» وتكىزۋ پۋنكتى جوندەۋ جۇمىسىنا جابىلعانعا دەيىن كورشى قىرعىز ەلىمەن اراداعى نەگىزگى شەكارالىق باقىلاۋ-وتكىزۋ بەكەتتەرىن جونگە كەلتىرۋ جايىن اڭگىمەلەدى. سونىمەن قاتار ەكى ەل دەپۋتاتتارىنىڭ اراسىندا «سورتوبە» جانە «اۋقاتتى» اۆتوموبيل وتكىزۋ پۋنكتتەرىن كوپجاقتى حالىقارالىققا اۋىستىرۋ تۋرالى ماسەلە كوتەرىلىپ, الداعى ۋاقىتتا بارلىق ترانزيتتىك جول كولىكتەرى اتالعان ەكى بەكەت ارقىلى وتەتىندىگى جونىندە ايتىلدى. كەزدەسۋدە سونداي-اق, «قاراسۋ», «سورتوبە» جانە «اۋقاتتى» باقىلاۋ بەكەتتەرىندەگى شەكارا ارقىلى وتۋشىلەرگە ارنالعان باقىلاۋ كابينالارىن كوبەيتۋ, قازاق پەن قىرعىز اراسىنداعى شەكارا سىزىعىندا ورنالاسقان كوپىردى قايتا جوندەۋدەن وتكىزۋ, ونى كەڭەيتۋ سياقتى وزەكتى ماسەلەلەر دە كوتەرىلدى. ءوز سوزىندە ۆلاديمير بوجكو ەكىجاقتى كەزدەسۋدىڭ اسا ماڭىزدى ەكەنىن اتاپ ءوتىپ, قازاقستان بويىنشا ەڭ ءىرى شەكارالىق وتكىزۋ پۋنكتىنىڭ بىرىنەن سانالاتىن «قورداي» باقىلاۋ بەكەتىنىڭ كۇردەلى جوندەۋگە جابىلۋى ەڭ اۋەلى ەكى ەل حالقىنىڭ ىڭعايلىلىعى ءۇشىن جاسالىپ وتىرعان قادام ەكەنىن ايتتى. ال دارحان ءدىلمانوۆ بۇگىنگى تاڭداعى دايىندىق جۇمىستارى تۋرالى ايتا كەلە, قورداي اۋدانىندا ورنالاسقان وزگە دە وتكىزۋ پۋنكتتەرىنىڭ حالىق پەن كولىك نوپىرىنە توتەپ بەرۋى ءۇشىن قولعا الىنۋى ءتيىس بىرقاتار ۇسىنىستارىن جەتكىزدى. بۇل رەتتە قىرعىزستاندىق تاراپ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قىرعىز رەسپۋبليكاسىنا جۇمىس ساپارى بارىسىندا بىرقاتار وزەكتى ماسەلەلەردىڭ شەشىلگەنىن ايتىپ, بۇگىندە شەكارالىق ماسەلەلەر بويىنشا ەكى ەلدىڭ جاساعان كەلىسىمدەرى اياسىندا جەمىستى ەڭبەك ەتىپ كەلە جاتقاندارىنا توقتالدى. سونىمەن قاتار قىرعىز رەسپۋبليكاسىنىڭ وكىلدەرى وزدەرىنىڭ دە بىرقاتار ۇسىنىستارىن جەتكىزىپ, ورتاق ماسەلەلەردى بىرلەسىپ شەشۋگە دايىن ەكەندىكتەرىن ءبىلدىردى. جيىن بارىسىندا ەكى ەل دەپۋتاتتارىنىڭ ۇسىنىستارى حاتتاماعا ەنگىزىلىپ, ۇكىمەتكە جولداناتىن بولدى.
جامبىل وبلىسى
