كەلەر جىلدىڭ 3-ءشى قاڭتارىنا دەيىن اقمولا وبلىسىندا «پيروتەحنيكا» اتتى رەسپۋبليكالىق جەدەل الدىن الۋ شارالارى جۇرگىزىلمەك. جەلتوقسان ايىنىڭ 17-سىندە باستالعان شاراعا ۇزىن سانى 700 قىزمەتكەر قاتىسادى. قازىردىڭ وزىندە قاۋىپتى زاتتار تاركىلەنۋدە.
– بۇل – الدىن-الۋ شارالارى. سونداي-اق سەرتيفيكاتتالماعان پيروتەحنيكالىق بۇيىمداردىڭ قايدان اكەلەتىندىگىن انىقتاۋ. 6 كۇن ىشىندە اتقارىلعان جۇمىستار بويىنشا پيروتەحنيكالىق ونىمدەردى زاڭسىز ساتۋعا بايلانىستى 196 باپقا سايكەس وبلىستىڭ 15 ازاماتى جاۋاپكەرشىلىككە تارتىلدى. سەرتيفيكاتتالماعان 417 پيروتەحنيكالىق ءونىم تاركىلەندى. ناتيجەسىندە 953 مىڭ تەڭگە كولەمىندە ايىپپۇل سالىندى. مۇنداي ونىمدەردى ساتىپ الماس بۇرىن ازاماتتار تاۋاردىڭ نورماعا ساي ەكەندىگىن راستايتىن سەرتيفيكات, ليتسەنزياسىن سۇراۋعا قۇقىلى. سايكەسىنشە ساتۋشى دا ساتىپ الۋشىنىڭ تالابىنا ساي ءتيىستى قۇجاتتاردى كورسەتۋگە مىندەتتى, – دەيدى ازاماتتىق جانە قىزمەتتىك قارۋ اينالىمىن باقىلاۋ توبىنىڭ ينسپەكتورى, پوليتسيا كاپيتانى تالعات نۇرعاليەۆ.
پيروتەحنيكالىق ونىمدەردى ارنايى دۇكەندەردە عانا ساتۋعا رۇقسات ەتىلگەن. الايدا كوشەدەگى اشىق سورەلەردە ساتىلىپ تا جاتقان جايلار كەزدەسەدى.
– توتەنشە جاعدايلار جونىندەگى باسقارماسىنىڭ ماماندارى مەن جەرگىلىكتى پوليتسيا قىزمەتكەرلەرى تۇراقتى تۇردە جاڭا جىل قارساڭىندا «پيروتەحنيكا» اتتى الدىن-الۋ شارالارىن ۇيىمداستىرادى. بيىل, مىنە, ايتۋلى شارانى باستاپ, العاشقى قۇقىق بۇزۋشىلىقتاردى انىقتادىق. پيروتەحنيكالىق بۇيىمدار دالادا ساتىلسا, ولار دۇرىس جۇمىس ىستەمەي, ادام دەنساۋلىعىنا زيان كەلتىرەدى, – دەيدى كوكشەتاۋ قالالىق توتەنشە جاعدايلار جونىندەگى باسقارماسىنىڭ باس مامانى ابىلايحان ءشارىپوۆ.
دەنساۋلىق ساقتاۋ باسقارماسىنىڭ ءباسپاسوز حاتشىلىعى ازىرگە پيروتەحنيكالىق ونىمدەردەن زارداپ شەككەندەردىڭ جوق ەكەندىگىن ايتادى. دەسە دە, كامەلەت جاسىنا تولماعاندار جاراقات الماس ءۇشىن يۋۆەنالدى پوليتسيا ينسپەكتورلارى وقۋ ورىندارىندا وسى تاقىرىپ اياسىندا وقۋشىلارمەن كەزدەسۋلەر ۇيىمداستىرۋدا.
