«جاقىندا رەسپۋبليكالىق بيۋدجەت ەسەبىنەن تاعى 22 جاڭا كولىك كەلەدى», - دەدى ەلجان ءبىرتانوۆ.
بۇل دەنساۋلىق ساقتاۋ مينيسترلىگىنىڭ جەرگىلىكتى اتقارۋشى ورگاندارمەن بىرلەسكەن 103 قىزمەتىن ۇلتتىق ستاندارتتار مەن حالىقارالىق تالاپتارعا سايكەس جابدىقتاۋعا ارنالعان اۋقىمدى باعدارلاماسىنىڭ باستاۋى.
بارلىق اۆتوموبيلدە زاماناۋي جابدىقتار, سونىڭ ىشىندە دەفيبريللياتورلار, ەلەكتروكارديوگراف, وكپەنى جاساندى جەلدەتۋ اپپاراتتارى, وتتەگى باللوندار بار.
باعدارلاما اياسىندا 2020 جىلدىڭ العاشقى ايلارىندا وڭىرلەرگە 800-دەن استام سانيتارلىق كولىك جەتكىزىلەدى.
شاراعا دەنساۋلىق ساقتاۋ ءمينيسترى جانە شۇعىل مەديتسينانىڭ ۇلتتىق ۇيلەستىرۋ ورتالىعىنىڭ جانە استانالىق اكىمدىكتىڭ وكىلدەرى قاتىستى.
جاڭا اۆتوموبيلدەر نۇر-سۇلتان قالاسىنىڭ جەدەل مەديتسينالىق كومەك قىزمەتىنىڭ اۆتوپاركىن 100 پايىز تولىقتىرۋعا, 103 قىزمەتى جۇمىسىنىڭ جەدەلدىگىن ارتتىرۋعا مۇمكىندىك بەرەدى.
سونداي-اق مينيستر «نۇر-سۇلتان» جەدەل جاردەم ستانساسىنىڭ ۇجىمىمەن كەزدەسىپ, دارىگەرلەردىڭ جالاقىسى 2020 جىلدىڭ 1 قاڭتارىنان باستاپ 30 پايىزعا, مەدبيكەلەر جالاقىسى 20 پايىزعا كوتەرىلەتىنىن حابارلادى.
