ازاماتتىق قوعامدى دامىتاتىن ينستيتۋتتاردىڭ قاتارىندا ۇكىمەتتىك ەمەس ۇيىمنىڭ اتقاراتىن ءرولى زور. دامىعان شەت ەلدەردە ۇەۇ بيلىك قابىلدايتىن بارلىق شەشىمدەردىڭ نەگىزگى بولىگىنە ىقپال ەتە الادى. تولىپ جاتقان پاتريوتتىق, جاستار, الەۋمەت, دەنساۋلىق ساقتاۋ, قۇقىق جۇمىستارى ۇەۇ ارالاسۋىمەن عانا شەشىلەدى. ال بىزدەگى ۇەۇ كوبى وكىمەتتىڭ قابىلداعان باعدارلامالارىن ىسكە اسىرۋعا قوسالقى كومەككە قانا جارايتىن سياقتى. وزدىگىنەن جاڭا جۇمىستار ۇسىنىپ جاتقان ۇەۇ كوزگە تۇسە قويمادى. ماسەلەن, ءبىرىنشى بولىپ تالقىلانعان ايىرتاۋ اۋدانىندا 24 ۇەۇ بار ەكەن, ولاردىڭ ءبارىنىڭ «ىسقىرىعى جەر جارعانمەن ايداعانى بەس ەشكى». جەتىم بالالار مەن ولاردى قولداۋ, گەندەرلىك ساياساتتى جۇزەگە اسىرۋ, قۇقىق قورعاۋ سياقتى سالالاردا لوتتاردى ۇتقان ولار ەكى جوبانى عانا ىسكە اسىرىپتى. اۋدان ەكونوميكاسىنىڭ باسىمدى باعىتتارىنىڭ ءبىرى دەپ تانىلعان ءتۋريزمدى دامىتۋ بويىنشكا ۇەۇ قانداي ۇسىنىستار مەن پىكىرلەر جاسادى, بۇل سالاعا لوتتار بەرىلدى مە دەگەن سۇراقتارعا جاۋاپ تابىلمادى.
ءۋاليحانوۆ اۋدانىندا دا ون ەكى ۇەۇ بار ەكەن, بىراق بۇلاردىڭ ىسكە اسىرعانى دا ەكى جوبا. ونىڭ ءوزى وكىمەتتىك ورگاندار جاساپ جاتقان «مەرەيلى وتباسى» مەن جاستار ساياساتىن ىسكە اسىرۋعا باعىتتالعان شارالارعا كومەك. «جاستار فورۋمى», «جاستار سلەتى» دەگەن سياقتى وكىمەتتىك ورگانداردىڭ وتكىزگەن شارالارىنا ات قوسىپ, سونىمەن ۇكىمەتتىك ەمەس ۇيىمنىڭ جۇمىسىن تياناقتاعان ەكەن.
تالقىلانعان اۋداندار اراسىندا تايىنشالىقتاردىڭ جۇمىسىندا عانا ءبىر بەلسەندىلىك نىشاندارى بار سياقتى. ولار الدىمىزداعى جىلى اتالاتىن مەرەيتويلىق شارالارعا بولىنەتىن لوتتارىن انىقتاپ قويىپتى. سونداي-اق «جاس سارباز», «انتيتەررورلىق شارالار» دەگەن سياقتى جۇمىستاردى دا بەلگىلەگەن ەكەن.
وتىرىستى قورىتىندىلاعان ر.الىشەۆ اۋداندارداعى ۇەۇ جۇمىسىن جانداندىرۋعا ءتيىستى اكىمدەردىڭ ورىنباسارلارىنا پروبلەمالىق ماسەلەلەردىڭ كارتالارىن جاساپ, ناق سولاردى ىسكە اسىرۋعا لوتتار بەرىپ, ۇەۇ كۇشىن باعىتتاۋ كەرەك ەكەندىگىن ايتتى.
سونداي-اق وتىرىستا رەسپۋبليكالىق «سەرپىن» باعدارلاماسىمەن پەتروپاۆل قالاسىنا وقۋعا كەلىپ, مەملەكەتتىك گرانتپەن وقىپ, الايدا ماماندىق العاننان كەيىن كەتىپ قوياتىن جاستاردى جەرگىلىكتى ەلمەن, جەرمەن تانىستىرىپ, تاريحتى بىلگىزىپ, اعا ۇرپاق وكىلدەرىمەن, جەرگىلىكتى ونەرپازدارمەن, جاستارمەن كەزدەستىرىپ, قويان-قولتىق ارالاستىرىپ, كيەلى جەرلەرگە ساياحاتتار جاساتىپ, سونداي-اق اۋداندارداعى شارۋا قوجالىقتارىن, كاسىپكەرلەردى كورسەتىپ جەرسىندىرۋدى ماقسات ەتىپ قۇرىلعان «تامىر جايۋ» ۇەۇ تۇساۋى كەسىلدى. «مۇنداي ۇسىنىس بۇرىن بىزگە تۇسپەگەن ەدى, بۇل جوبانى ءبىز قولدايمىز», دەدى رۋسلان الىشەۆ.
