بيىكتىگى 20, ەنى 2,4 مەتر بولاتىن تۇعىر تۇتاستاي ساپالى بەتوننان قۇيىلعان. ونىڭ ءبىر جاق قىرىندا رەسپۋبليكا گيمنىنىڭ ءماتىنى, ەكىنشى جاق بەتىندە گيمننىڭ نوتاعا تۇسىرىلگەن مۋزىكالىق نۇسقاسى, ال ءۇشىنشى جاق قىرىندا مەملەكەتتىك رامىزدەردىڭ اۆتورلارى تۋرالى مالىمەتتەر ناقىشتالىپ بەرىلگەن. ءتورتىنشى قىرىندا اقتوبە دەگەن ءسوز جازىلىپ, وسى قالانىڭ نىشاندىق بەلگىسى –قىزعالدىق كورىنىس تاپقان. تاۋەلسىزدىك تۇعىرىنىڭ ۇشار باسىندا ورنالاسقان ەلتاڭبا ەكى جاققا بىردەي كورىنەدى. ونىڭ سالماعى 250 كگ بولسا, ديامەترى 215 سم.
- ءبىرتۇتاس كومپازيتسيالىق جۇيە قۇرايتىن ەسكەرتكىشتىڭ جوعارى بولىگىندە ەندى اشىلىپ كەلە جاتقان قىزعالداق بەينەلەنگەن. بۇل جىلدان-جىلعا دامىپ, ءوسىپ-وركەندەۋ جولىنداعى مەملەكەتىمىزدىڭ نىشانى. تۇعىردىڭ سەگىز قىرلى بولىپ كورىنىس تابۋى قازاقستاننىڭ الەمنىڭ قاي ەلىمەن بولسا دا اشىقتىعىمەن جاقسى قارىم-قاتىناسىنىڭ كورىنىسى. سونداي-اق ءتورت بۇرىشتا بەينەلەنگەن تۇركى الەمىنىڭ ستيلىندەگى بەينە كورىنىستەر قازاقستاننىڭ 200-دەن استام الەم مەملەكەتتەرىنىڭ اراسىنداعى ءوز ورنى بار مىعىم مەملەكەت ەكەنىن ايشىقتاۋدى ماقسات ەتتىك دە ءيدى جوبا اۆتورى, بەلگىلى كاسىپكەر ارىنعازى بەركىنباەۆ. ول مۇندا تاعى ءبىر مەملەكەتتىك ءرامىز تۋدىڭ بەينەلەنبەۋىن – تۇڭعىش پرەزيدەنت اتىنداعى ساياباقتاعى بۇعان دەيىن ونىڭ كورىنىس تابۋىمەن ءتۇسىندىردى.
سونداي-اق مۇندا زوومورفتىق جانە گەومەتريالىق ەلەمەنتتەر مەن وسىمدىك سيپاتىنداعى ويۋ-ورنەكتەر بەينەلەنگەن. ال تۇستاستاي ساۋلەت ونەرى تۋىندىسىنىڭ ءتۇسى ۇلى دالامىزدىڭ سيپاتىنا جاقىندايدى. تۇتاستاي العاندا جاڭا تۇعىر مەملەكەتىمىزدىڭ باستى نىشاندارى – مەملەكەتتىك رامىزدەردى ۇلىقتاۋعا ارنالعان. ا.بەركىنباەۆتىڭ ايتۋىنشا وعان بەتون, تەمىر, پلاستيك جانە بوياۋ تۇرلەرى سەكىلدى جەرگىلىكتى قۇرىلىس ماتەريالدارى پايدالانىلعان. تاۋەلسىزدىك تۇعىرى ورناتىلعان اۋماقتا تابيعات جاناشىرلارى قاراعاي مەن وزگە دە ءساندى اعاش كوشەتتەرىن وتىرعىزعانى دا جاراسىمىن تاپقان ءىستىڭ جالعاسىنداي كورىنەدى.
مىنە, وسىلايشا تاريح قويناۋىنا كەتىپ بارا جاتقان 2019 جىلى اقتوبەدە تاۋەلسىزدىككە ارنالعان ەسكەرتكىشتىڭ اشىلۋى حالقىمىزدىڭ ءورشىل دە, ەركىن رۋحىن پاش ەتىپ تۇرعانداي اسەر قالدىرادى.
