اۋدان اكىمدىگى قۇقىقتىق سالا ءبولىمى باسشىسىنىڭ مىندەتىن اتقارۋشى اياۋلىم قايداروۆانىڭ ايتۋىنشا, تۇرعىندارعا ەندى ء«بىر تەرەزە» قاعيداسى بويىنشا اۋداندىق جەر قاتىناستارى, ساۋلەت جانە قالا قۇرىلىسى, ءبىلىم بەرۋ, دەنساۋلىق ساقتاۋ, جۇمىسپەن قامتۋ جانە الەۋمەتتىك باعدارلامالار, تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى بولىمدەرىنىڭ ماماندارى قىزمەت كورسەتەدى.
وبلىس اكىمدىگىنىڭ تاپسىرماسىنا سايكەس Mainfo دەربەس قىزمەت كورسەتۋ الاڭىندا تۇرعىندارعا كەڭەس بەرىلەدى, ءتيىستى قۇجاتتار قابىلدانادى. مەملەكەتتىك قىزمەت كورسەتۋ ساپاسىنا ىشكى باقىلاۋ قىزمەتىنىڭ تيىمدىلىگىن ارتتىرۋ ءۇشىن قاجەت.
كەڭسە ەسىگى اشىلعان كۇنى-اق, اۋدان اكىمى مارات اقتاەۆ, مەملەكەتتىك قىزمەت ىستەرى اگەنتتىگىنىڭ وبلىس بويىنشا دەپارتامەنتىنىڭ باسشىسى – ادەپ جونىندەگى كەڭەس توراعاسى توقتامىس جۇماعۇلوۆ, سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ وبلىس بويىنشا دەپارتامەنتىنىڭ شتاب باستىعى سەرگەي لۋبەنچەنكو, اۋدان اكىمدىگىنىڭ دەربەس بولىمدەرىنىڭ باسشىلارى ازاماتتاردى قابىلدادى.
قابىلداۋعا ءبىرىنشى بولىپ سەرىكباي كەڭەسباەۆ, اينۇر كوكەشقىزى, مادينا كاليمۋللينا, جىبەك تۇرىسبەكقىزى, ايجان تاۋوۆا سياقتى اۋىل تۇرعىندارى كەلدى. تۇرعىندار اۋىلداردا, اۋدان ورتالىعىنداعى قاڭعىباس يتتەردەن قۇتىلۋ كەرەكتىگىن, مۇگەدەكتەرگە بەرىلەتىن كومەك تۋرالى, ورتا جانە شاعىن كاسىپكەرلىكتى قولداۋ, بالاباقشاعا كەزەككە تۇرۋ, ارنايى ورتا بىلىمىمەن مەملەكەتتىك قىزمەتكە ورنالاسۋ مۇمكىندىگى تۋرالى سۇراقتارىنا ناقتى جاۋاپ الدى.
– قازىرگى كۇنى دە كاسىپكەرلەر پالاتاسىنا, مەملەكەتتىك كورپوراتسيا وكىلدەرىنە كەڭەس سۇراپ اۋىل تۇرعىندارى كەلۋدە. كەڭسە اشىلعالى بەرى 7 كۇن ىشىندە 23 تۇرعىنعا كەڭەس بەرىلدى, – دەيدى اياۋلىم قايداروۆا.
دەربەس قىزمەت كورسەتۋ الاڭىنا كەلگەن ءاربىر تۇرعىنعا بارىنشا ىڭعايلى بولۋى ءۇشىن كۇتۋ ورىندارى بار, بالالارعا ارنالعان ويىن بۇرىشى جاسالعان. الاڭ اۋدان تۇرعىندارىنا ساعات 9.00-دەن 18.30-عا دەيىن مەملەكەتتىك قىزمەتتەر جۇيەسىندە كەڭەستەر جۇرگىزەدى.
دەپارتامەنت باسشىسى توقتامىس جۇماعۇلوۆ ءوز سوزىندە, كەڭسە الاڭىنىڭ حالىققا جاقىندىعى مەن اشىقتىعى كوزدەلگەندىگىن اتاپ ءوتتى.
سونداي-اق ازاماتتاردىڭ ءوتىنىش-تالاپتارىنا ساي ماسەلەلەرىن انىقتاپ, بيلىك پەن حالىق اراسىنداعى بايلانىستى ارتتىرۋ نەگىزگى ماقسات ەكەنىن جەتكىزدى.
ياعني, بۇل كەدەرگىسىز ورتا جاساۋعا, باسشىلاردىڭ جاۋاپكەرشىلىگىن كۇشەيتۋگە, اۋىل تۇرعىندارىنا جايلى جاعداي جاساۋعا جانە قوعامدىق باقىلاۋدى كۇشەيتۋگە مۇمكىندىك بەرەتىن جوبا دەگەن ءسوز.
پاۆلودار وبلىسى,
ماي اۋدانى
