«قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قويناۋىن پايدالانۋ, گاز جانە گازبەن جابدىقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى گاز جانە گازبەن جابدىقتاۋ سالاسىنداعى زاڭنامانى ودان ءارى جەتىلدىرۋ, قازاقستان رەسپۋبليكاسىنىڭ گازعا دەگەن ىشكى قاجەتتىلىكتەرىن تۇراقتى قامتاماسىز ەتۋ ءۇشىن جاعدايدى ىنتالاندىرۋ, گازدى وتىن رەتىندە قولداناتىن جاڭا ينۆەستيتسيالىق جوبالاردى تارتۋ جانە ىسكە اسىرۋ ماقساتىندا ازىرلەنگەن بولاتىن.
زاڭ جوباسىمەن بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزىلەدى.
زاڭ جوباسى ەل ەكونوميكاسىنا ينۆەستيتسيالار تارتۋعا جانە قوسىلعان قۇنى جوعارى ءارى ەلەۋلى مۋلتيپليكاتيۆتىك اسەرى بار مۇناي-حيميا ءوندىرىسىن دامىتۋعا باعىتتالعان. بۇل رەتتە, ىشكى نارىقتى گازبەن ۇزدىكسىز جابدىقتاۋ, سونداي-اق گاز باعاسىنىڭ تۇراقتى دەڭگەيىن قامتاماسىز ەتۋ ءۇشىن زاڭ جوباسى اياسىندا جاڭا ستراتەگيالىق ماڭىزدى ينۆەستيتسيالىق جوبالار ءۇشىن تاۋارلىق گازدىڭ شەكتى باعاسى گاز جەتكىزۋدىڭ وزىندىك قۇنى مەن گاز جانە گازبەن جابدىقتاۋ سالاسىنداعى ۇلتتىق وپەراتوردىڭ ەڭ تومەنگى تيىمدىلىك نورماسىنان قالىپتاساتىن بولادى.
سەناتور ماناپ كۋبەنوۆتىڭ ايتۋىنشا, ەلەكتر ەنەرگياسىن ءوندىرۋ ءۇشىن تاۋارلىق گازدى وتىن رەتىندە پايدالاناتىن ەلەكتر ستانتسيالارىنىڭ قۇرىلىسىنا ينۆەستيتسيا تارتۋ ماقساتىندا گازعا ۇزاق مەرزىمدى كەزەڭگە قولايلى باعا بەلگىلەۋ ۇسىنىلادى.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە تەمىرجول كولىگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەملەكەت باسشىسى ق.توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق شارالار جوسپارىنىڭ 30-تارماعىن ىسكە اسىرۋ ماقساتىندا ازىرلەنگەن بولاتىن.
بۇل زاڭ جوباسىمەن 7 زاڭنامالىق اكتىگە وزگەرىستەر مەن تولىقتىرۋلار ەنگىزىلەتىن بولدى.
سەناتور ەرىك سۇلتانوۆ زاڭ جوباسىمەن مەملەكەتتىك ورگانداردىڭ نورماتيۆتىك قۇقىقتىق اكتىلەردى ازىرلەۋ جانە بەكىتۋدەگى تاريف بەلگىلەۋدىڭ اشىقتىعىن جەتىلدىرۋ مەن ارتتىرۋ, كىرمە جولدار قىزمەتتەرىن پايدالانۋشىلاردى سۋبسيديالاۋ جانە قۇقىقتارىن قورعاۋ جونىندەگى وكىلەتتىكتەرى تولىقتىرىلاتىنىن اتاپ ءوتتى.
قۇجاتتا جول ءجۇرۋ قۇجاتتارىن قايتا ساتۋ جانە تەمىرجول كولىگىندەگى قوزعالىس قاۋىپسىزدىگىن قامتاماسىز ەتىلمەگەنى ءۇشىن اكىمشىلىك جاۋاپكەرشىلىكتى كۇشەيتۋ كوزدەلگەن.
