رەسەيدىڭ ەڭبەك سىڭىرگەن دارىگەرى, پروفەسسور, مەديتسينا عىلىمدارىنىڭ دوكتورى ءادۋارد گاللياموۆتىڭ ايتۋىنشا, ناۋقاستىڭ دەنەسىندە بىرنەشە كىشكەنتاي تىلىك جاسالادى. سول ارقىلى قاجەتتى قۇرالدار مەن كامەرا وتكىزىلەدى. ءىس-ارەكەتتىڭ بارلىعى ەكران ارقىلى باقىلانادى.لاپاروسكوپيانىڭ تيىمدىلىگى سول – ادام وتادان كەيىن ۇزاق ۋاقىت بويى توسەك تارتىپ جاتپايدى. ياعني, ناۋقاس ءبىر-ەكى كۇننىڭ ىشىندە تۇرىپ كەتەدى.
«لاپاروسكوپيالىق وتالاردىڭ ءوزىندىڭ قيىندىقتارى بار. دەسەك تە, ودان تايساقتاۋعا بولمايدى. بۇگىندە مەديتسينا جوعارى تەحنولوگيالىق مۇمكىندىكتەرگە يە. ەڭ باستىسى, تاجىريبە مەن كاسىبي شەبەرلىكتى تالاپ ەتەدى. بۇل وزىق ءادىس قازاقستاندا 1991 جىلدان بەرى قولدانىلىپ كەلەدى. ءبىز جەرگىلىكتى دارىگەرلەر ءۇشىن شەبەرلىك ساعاتتارىن ۇيىمداستىرىپ, بىرنەشە وتا جاسايتىن بولامىز» دەيدى قازاقستان رەسپۋبليكاسىنىڭ ەڭبەك سىڭىرگەن قايراتكەرى, پروفەسسور, مەديتسينا عىلىمدارىنىڭ دوكتورى سەرىك توقپانوۆ.
وبلىستىق اۋرۋحانا باس دارىگەرىنىڭ ورىنباسارى رۋسلان ابەتوۆ مەكەمەنىڭ ماتەريالدىق-تەحنيكالىق بازاسى وپەراتسيانىڭ ءتۇر-ءتۇرىن جاساۋعا مۇمكىندىك بەرەتىنىن, بىلىكتى ماماندەرمەن قامتاماسىز ەتىلگەنىن جەتكىزدى. جالپى, بۇل – بيىل ۇيىمداستىرىلىپ جاتقان ەكىنشى شەبەرلىك ساعاتى. تەلەۆيزيالىق وپتيكالىق كامەرانىڭ كومەگىمەن سەگىز وتا جاسالىپتى. العاشقىسى شىلدە ايىندا ءوتىپ, اسقازاننىڭ شۋنتتىك وتاسى جاسالىپتى.
وتا اياقتالعاننان كەيىن دارىگەرلەر جەرگىلىكتى ارىپتەستەرىنە وتكىزىلگەن وپەراتسيالار بويىنشا دارىستەر وقىدى. ەندوسكوپيالىق حيرۋرگيانىڭ جاڭاشىل ءادىس-تاسىلدەرىمەن ءبولىستى.
