بۇل تۋرالى ەسەپتى جىلدى قورتىندىلاعان جيىندا سىبايلاس جەمقورلىققا قارسى كۇرەس اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى جاندوس جۇماباەۆ مالىمدەدى. اتاپ ايتقاندا, جىل باسىنان بەرى 81 پارا الۋ وقيعاسى اشكەرەلەنىپ, قىزمەت بابىن اسىرا پايدالانۋدىڭ 11 دەرەگى انىقتالعان. ناتيجەسىندە جەكەلەگەن تۇلعاعا قاتىستى 63 قىلمىستىق ءىس اشىلىپ, 43 ادام سوتتالعان. جاۋاپقا تارتىلعان قىزمەتكەرلەر اراسىندا 6 وبلىستىق دەڭگەيدەگى باسشى, 5 ورتا ساناتتاعى لاۋازىمدى تۇلعا بار. بۇگىنگە دەيىن 87 ءىس سوتقا جىبەرىلىپتى.
سونداي-اق شەنەۋنىكتەر تاراپىنان شاعىن جانە ورتا بيزنەس نىساندارىنا قىسىم جاساۋ ازايماي وتىرعان كورىنەدى. ءدال وسىنداي مازمۇنداعى 17 شاعىم قابىلدانىپ, 13 لاۋازىم يەسى جاۋاپكەرشىلىككە تارتىلعان. 35 كاسىپكەردىڭ قۇقى قورعالدى.
ال وبلىستاعى سىبايلاس جەمقورلىق دەرەكتەرى ءجيى بايقالاتىن قىزمەتتەردىڭ كوشىن اكىمدىك قىزمەتكەرلەرى باستاپ تۇر ەكەن. وتكەن 11 ايدا شەنەۋنىكتەردىڭ پارا الۋىنا قاتىستى 26 وقيعا انىقتالعان. جەر قاتىناستارى ءبولىمىنىڭ قىزمەتكەرلەرى دە اكىمدىك وكىلدەرىنەن قالىسپاپتى, 11 ايدا 12 دەرەك تىركەلگەن. ىشكى ىستەر ورگاندارى مەن قۇرىلىس سالاسىندا دا پارا الۋدىڭ ونداعان مىسالى بايقالسا, الەۋمەتتىك قورعاۋ قىزمەتىنىڭ 8 وكىلى جەمقورلىققا قاتىستى ايىپتالىپ وتىر.
