قايىڭى مەن قاراعايى كوك تىرەگەن, تاۋلى-تاستى كامەنكا سەلوسى قار تۇسىسىمەن تىپتەن كورىكتەنىپ كەتەدى. جاڭا جىل جاقىنداعان سايىن جەرگىلىكتى ورتا مەكتەپتىڭ وقۋشىلارى مەن اتا-انالارى, ۇستازدارى ادەمى كۇي كەشەدى. ولار مۇزدان قالاشىق جاساۋدىڭ قامىنا كىرىسەدى.
– مۇز قالاشىعىن سالۋ ءۇردىسى وسىدان 10 جىل بۇرىن جوسپارلى تۇردە قولعا الىنىپ ەدى. وعان وقۋشىلار, اتا-انالار, بارلىق ۇستازدار بەلسەنە قاتىسادى. اركىم مىڭ ويلانىپ, ءجۇز تولعانىپ, ەرتەگى كەيىپكەرلەرىنىڭ بەينەسىن سومدايدى. بۇل يگىلىكتى ىستەن ەشكىم شەت قالعان ەمەس. جاڭا جىلعا ساناۋلى كۇندەر قالدى. مۇز قالاشىعىن جاساۋعا قاتىسقان جانە جەڭىسكە جەتكەن وقۋشىلاردى جەرگىلىكتى سەرىكتەستىكتىڭ باسشىسى, ساندىقتاۋ اۋداندىق ءماسليحاتىنىڭ دەپۋتاتى الەكسەي دجەيرانوۆتىڭ سىيلىقتارى كۇتىپ تۇر,–دەيدى كامەنكا ورتا مەكتەبى ديرەكتورىنىڭ ورىنباسارى ليۋدميلا پوگورەلوۆا.
جاستار جىلىمەن قوش ايتىسار كۇن دە الىس ەمەس. ونىڭ شاپاعاتىن مەكتەپ وقۋشىلارى دا كورىپ, شىعارماشىلىق تابىستارعا كەنەلدى. سونىڭ ءبىرى – مۇز قالاشىعىن سالۋ كەزىندە ايقىن سەزىلدى.
– ءبىزدىڭ سىنىپ ورىستىڭ ەجەلگى اياز اتاسىنىڭ مۇز بەينەسىن سومدادى. ونى بوياۋ جۇمىستارى عانا قالدى. بۇگىن-ەرتەڭ بىتىرەمىز. سىنىبىمىزدىڭ ءار وقۋشىسى ءوز ويلارىمەن ءبولىسىپ, كەلىستى اياز اتا كەلبەتىن سومدادى. مەن بۇل شاراعا ءبىرىنشى سىنىپتان باستاپ قاتىسىپ كەلەمىن. شىتىمىر ايازدا ەرتەگى كەيىپكەرلەرىن سومداۋ قانداي عانيبەت,–دەيدى كامەنكا ورتا مەكتەبىنىڭ وقۋشىسى ۆيكتوريا وسيپوۆا.
31 جەلتوقسان كۇنى «كامەنكا جانە د» سەرىكتەستىگىنىڭ باس ديرەكتورى مۇز قالاشىعىنا بەلسەنە قاتىسقان وقۋشىلار مەن جەڭىمپازدارعا باعالى سىيلىقتار مەن تاتتىلەر تابىس ەتەدى.
