قاتتى جەل مەن بوراننىڭ سالدارىنان كولىك قوزعالىسى قيىنداپ, ءتىپتى رەسپۋبليكالىق ماڭىزى بار الماتى-تاشكەنت اۆتوكولىك تاسجولىنىڭ جۋالى اۋدانىنىڭ اۋماعى مەن جامبىل اۋدانى ايشا ءبيبى اۋىلىنان تۇركىستان وبلىسىنا دەيىنگى ارالىعى جابىلدى. بىرقاتار كولىكتەر قارلى بوراننىڭ كەپتەلىسىنە تاپ بولىپ, ىشىندەگى جولاۋشىلار جولدا قالدى.
الماتى-تاشكەنت تاسجولىنىڭ 565-593 شاقىرىمىندا, ياعني جۋالى جانە جامبىل اۋداندارىنىڭ اۋماعىندا جولاۋشىلاردى قۇتقارۋ ماقساتىندا جامبىل وبلىستىق توتەنشە جاعدايلار دەپارتامەنتىنىڭ تاراپىنان 23 ادام جانە 6 تەحنيكا جۇمىلدىرىلىپ, اتالعان دەپارتامەنت باسشىسىنىڭ ورىنباسارى, ازاماتتىق قورعاۋ پولكوۆنيگى تالعات سابيروۆ باستاعان ازاماتتار تەحنيكا كۇشىمەن بوران ىشىنەن جولدىڭ اشىلعان اۋماعىنا 26 اۆتوكولىكتى سۇيرەپ شىعاردى. سونىمەن قاتار, جولدىڭ جابىلۋىنا بايلانىستى 29 كولىك توقتاپ قالىپ, ونىڭ ىشىندەگى 140 ەرەسەك ادام, 8 بالا جۋالى اۋدانى, باۋىرجان مومىش ۇلى اۋىلىنا جانە 75 ادام سول اۋىلداعى ا.گەرتسەن اتىنداعى ورتا مەكتەپكە كوشىرىلدى. اۋدان اكىمى نارباي ەرگەبەكوۆ جولاۋشىلار ورنالاسقان جىلىتۋ پۋنكتتەرىندە بولىپ, ولارمەن كەزدەستى. بارلىق ازاماتتار ىستىق تاماقپەن جانە باسقا دا قاجەتتى زاتتارمەن قامتىلدى. سونداي-اق, تالاس اۋدانى, قاراتاۋ قالاسى مەن سارىسۋ اۋدانى, جاڭاتاس قالاسىنىڭ اراسىنداعى كۇيىك-قاراباستاۋ-قاراتاۋ-جاڭاتاس-ساۋداكەنت ارالىعىنداعى وبلىستىق ماڭىزى بار جولدار دا جابىلعان.
ءبىر قۋانارلىعى, توتەنشە جاعداي سالدارىنان زارداپ شەككەن جولاۋشىلار جوق. جولدا قالعاندارعا مۇمكىندىگىنشە بارلىق جاعداي جاسالعان. بۇل ماسەلە جامبىل وبلىسىنىڭ اكىمى اسقار مىرزاحمەتوۆتىڭ تىكەلەي باقىلاۋىندا ەكەن.
«الماتى-تاشكەنت جول ۋچاسكەسىنىڭ جۋالى اۋدانىنداعى اۋا-رايىنىڭ قولايسىزدىعىنا بايلانىستى ورىن العان توتەنشە جاعداي وبلىس اكىمىنىڭ تىكەلەي باقىلاۋىندا. قازىرگى تاڭدا وعان توتەنشە جاعدايلار دەپارتامەنتىنىڭ 30-عا جۋىق قىزمەتكەرى جانە 6 بىرلىك تەحنيكا جۇمىلدىرىلعان. اۆاريالىق-قۇتقارۋ جۇمىستارى جۇرگىزىلدى. بۇگىندە 3 جىلىتۋ پۋنكتى جۇمىس اتقارۋدا. وندا ىستىق تاماق پەن مەديتسينالىق كومەك ۇيىمداستىرىلعان. زارداپ شەككەندەر جوق. مەديتسينالىق كومەككە جۇگىنگەندەر بولمادى. شالعاي اۋىلداردىڭ بارىمەن دە بايلانىس ورناتىلعان. جولعا قۇم توسەۋ, باقىلاۋ بويىنشا وبلىستىق توتەنشە جاعدايلار دەپارتامەنتى, «قازاۆتوجول» مەكەمەسىنىڭ وبلىستىق فيليالى جانە جول پاترۋلدىك پوليتسيا قىزمەتكەرلەرى تاۋلىك بويى جۇمىستار اتقارۋدا. قازىرگى تاڭدا اتالعان باعىت بويىنشا «ارنايى جەلى» اشىلىپ, جەدەل شتاب جۇمىسى ۇيىمداستىرىلدى. ازىرگە جۇرگىزۋشىلەر مەن تۇرعىنداردى الىس جولعا شىقپاۋعا شاقىرامىز», دەيدى وبلىس اكىمىنىڭ كەڭەسشىسى جاسۇلان ابدىحالىق.
«ساقتانساڭ – ساقتايدى» دەيدى حالىق دانالىعى. جامبىل وبلىستىق پوليتسيا دەپارتامەنتى دە تۇرعىنداردى ازىرگە الىس جولعا شىقپاۋعا شاقىرىپ وتىر. ال, كۇيىك اسۋىندا جولدا قالعان جولاۋشىلاردى جەتەر جەرلەرىنە تەمىرجول تاسىمالى ارقىلى جەتكىزۋ جۇمىستارى ۇيىمداستىرىلدى. ازىرگە وڭىردە جاعداي تۇراقتى بولعانىمەن, تابيعاتتىڭ توسىن مىنەزى الداعى ۋاقىتتاردا دا قايتالانۋى مۇمكىن دەگەن بولجامدار بار.
جامبىل وبلىسى
