- جۇمىس توپتارىنىڭ وتىرىستارىندا جاسالعان ۇسىنىستاردىڭ كوپشىلىگى قولداۋ تاپتى دەۋگە بولادى. وسى ۋاقىتقا دەيىن مەملەكەتتىك ورگاندارمەن جانە پرەزيدەنت اكىمشىلىگىنىڭ باسشىلىعىمەن بىرنەشە كەزدەسۋ وتكەن بولاتىن. وندا الدىڭعى وتىرىستاردىڭ ۇسىنىستارى كەڭىنەن تالقىلانىپ وتىردى. ساياسي مودەرنيزاتسيالاۋ توبىنىڭ بىرنەشە ناتيجەسىن اتاپ وتۋگە بولادى. سونىڭ ءبىرى – ميتينگىلەر تۋرالى حابارلاۋ جۇيەسىنە كوشۋ. بۇل وتە ماڭىزدى قادام دەپ ەسەپتەيمىن. سونداي-اق ساياسي پارتيالاردىڭ مۇشەلەرىن تىركەۋ 40 مىڭنان 20 مىڭعا دەيىن قىسقارتىلاتىنى قۋانتادى. 20 مىڭ ادامدى 17 وبلىسقا بولگەندە ءار وبلىسقا 1176 ادام كەرەك دەگەن ءسوز. ءبىر وبلىسقا 1000 ادام كوپ ەمەس دەپ ويلايمىن. ءار اۋداننان 100 ادام جينالسا, پارتيا قۇرۋعا بولادى. ال ەندى ول حالىقتىق پارتيا بولۋ ءۇشىن شىنىندا دا ءار وبلىستا كەم دەگەندە 1000 ادام بولۋى كەرەك. بۇل باستاما ارقىلى ساياسي مادەنيەت قالىپتاسادى دەپ ويلايمىن, - دەدى تالعات قاليەۆ.
سونىمەن قاتار ول پارلامەنتتىك وپپوزيتسيا ينستيتۋتى جايىندا پىكىر ءبىلدىردى.
- وپپوزيتسيالىق پارتيالاردىڭ وكىلدەرى ماجىلىستەگى كوميتەتتەردى باسقارۋى – ۇلكەن جەتىستىك. ويتكەنى ماجىلىستەگى كوميتەتتىڭ باسشىسى لاۋازىمى قاراپايىم دەپۋتاتتىق مانداتتان گورى كەز كەلگەن پارتيا ءۇشىن ەداۋىر جول اشىپ تۇر. ءسوزسىز, مۇنداي جاعدايدا پارلامەنت پىكىرتالاسقا بەيىم ءارى باتىل بولۋى ءتيىس. ويتكەنى بۇل جاعدايدا پارتيالاردىڭ رەسۋرستارى كوبەيەدى, - دەدى ول.
سونداي-اق ت.قاليەۆ پرەزيدەنتتىڭ جالا جابۋ تۋرالى باپتى دەكريميناليزاتسيالاۋعا قاتىستى شەشىمىن ءسوز ەتتى.
- جالا جابۋ تۋرالى باپتىڭ دەكريميناليزاتسيالانۋى وتاندىق جۋرناليستەردى جىگەرلەندىرە تۇسەدى. قىلمىستىق كودەكستىڭ 130-بابىن دەكريميناليزاتسيالاۋ جانە ونى اكىمشىلىك كودەكسكە اۋىستىرۋ تۋرالى شەشىم قابىلداندى. بۇل قادام جۋرناليستەرگە ءسوز بوستاندىعىنا جول اشادى. اشىق جازۋعا جۇرەكسىنەتىن جۋرناليستەر ەندى ەركىن اقپارات بەرەتىن بولادى, - دەدى تالعات قاليەۆ باق وكىلدەرىنە بەرگەن سۇحباتىندا.
