ايماقتار • 19 جەلتوقسان، 2019

سقو پوليتسياسىندا ءبىر كينولوگ قىز بار

27 رەت كورسەتىلدى

سولتۇستىك قازاقستان وبلىسى پوليتسيا دەپارتامەنتىنىڭ يتپەن ءىز كەسۋ (كينولوگ) قىزمەتىندە بۇرىن-سوڭدى قازاق قىزى قىزمەت ەتپەگەن ەكەن. ەندى سول ولقىلىقتىڭ ورنى تولدى. تاۋەلسىزدىك كۇنى قارساڭىندا رەسپۋبليكالىق كينولوگتىق ورتالىقتا ارنايى كۋرستى تامامداعان كۇلجاميلا قايىربەكوۆا وسى قىزمەتكە ورنالاستى.

جالپى، كۇلجاميلا وسى جۇمىسقا قىركۇيەك ايىنىنىڭ باسىندا ورنالاسىپ، يتتەرمەن جۇمىس ىستەۋدە ءوزىنىڭ ەپتى ەكەنىن تانىتقان. الدىمەن ول اۋرۋىنا بايلانىستى السىرەگەن ەكى ايلىق كۇشىكتى كۇتىپ، قاتارعا قوستى. ەندى، كۋرس ءبىتىرىپ، پوليتسيا سەرجانتى بولىپ كەلگەن ول باسقا قىزمەتتىك-ىزدەستىرۋ يتىمەن جۇمىس ىستەي باستادى. قازىر بەلگيالىق وۆچاركا چارلي ەكەۋى ءبىرى-بىرىنە ۇيرەنىسىپ كەتتى. الدا ولار ەسىرتكى زاتتارىن ىزدەۋ، ءىز كەسۋ بويىنشا بىرلەسە جۇمىس ىستەيتىن بولادى. «مەن يتتەردەن قورىقپايمىن، كىشكەنتايىمنان يتكە جاقىن بولدىم. مەن پەتەرفەلد سەلوسىندا تۇردىم. بىزدە الاباي، وۆچاركا تۇقىمدى ءار ءتۇرلى يتتەر بولدى. بالكىم، بۇگىنگى تاڭدا كينولوگيالىق ورتالىقتىڭ يتتەرىمەن جۇمىس ىستەۋدە سونىڭ كومەگى تيگەن شىعار»، دەيدى وسى بولىنىستە قىزمەتىن جالعاستىرعانىنا  قۋانىشىن بىلدىرگەن كۇلجاميلا قايىربەكوۆا.

ايتا كەتەتىن جايت، جىل باسىنان بەرى سقو پوليتسەيلەرى ءىزشىل يتتەردىڭ كومەگىمەن زاڭسىز اينالىمنان 80 كيلوگرامنان استام ەسىرتكى زاتىن الدى. كينولوگيالىق قىزمەت ورتالىعىندا 13 قىزمەتكەر جۇمىس ىستەيدى. وندا 25 قىزمەتتىك يت بار. «كۇلجاميلا قايىربەكوۆا وبلىستىق بولىنىستە كينولولوگ بولىپ قىزمەت ەتەتىن جالعىز قىزىمىز. تاعى ءبىر ايەل قىزمەتكەرىمىز ۆيكتوريا شاحنەۆيچ تيميريازەۆ اۋدانىندا جۇمىس ىستەيدى»، دەيدى سقو پد كقو باستىعى پوليتسيا مايورى سامات تولەباەۆ.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار