وندا وبلىس اكىمى قۇمار اقساقالوۆ بايانداما جاساپ, ءوڭىردىڭ 28 جىلدا قول جەتكىزگەن جەتىستىكتەرىن سارالادى. بۇگىنگى قازاقستان الەم تانىعان بايىپتى, تۇراقتى مەملەكەت. ول ەكونوميكاسى تۇراقتى ەل عانا ەمەس, ونەردەن, مادەنيەتتەن, سپورتتان الەمنىڭ الدىنا شىققان سالاماتتى ەل. كەشە عانا ديماش قۇدايبەرگەن امەريكانى «باعىندىرسا», وسىنداي تابىستارعا سولتۇستىكقازاقستاندىقتار دا ءوزىنىڭ ۇلەسىن قوسىپ كەلەدى. ا.ۆينوكۋروۆ, ج.جاقيانوۆ سپورتتان الەمدىك تابىستارعا قول جەتكىزسە, سامال ەسلاموۆا كسرو-نىڭ بىردە-ءبىر ءارتىسى الا الماعان بيىكتى باعىندىرىپ, دۇنيەجۇزىلىك ەڭ بەدەلدى كانن كينوفەستيۆالىندە «ەڭ ۇزدىك ايەل ءرولى اتالىمىنا» يە بولدى.
سونىمەن قاتار باياندامادا سولتۇستىك قازاقستاننىڭ ەكونوميكانىڭ, حالىقتى الەۋمەتتىك قورعاۋدىڭ بارلىق سالالارى بويىنشا بيىك بەلەستەردى باعىندىرىپ كەلە جاتقانى ايتىلدى. «قازاقستاننىڭ 30 جىلداعى ەكونوميكالىق دامۋىن سارالاپ وتىرىپ, اۋقىمدى جۇمىستاردىڭ اتقارىلعانىن كورۋگە بولادى. وسىنى ساقتاپ, ەسەلەۋ بىزگە امانات. 1991 جىلدان بەرى استىق كولەمى 2 ەسەگە ۇلعايدى. تاۋەلسىزدىك جىلدارى وبلىستا 3 ميلليون شارشى مەتردەن استام باسپانا بەرىلدى. ءوڭىردى دامىتۋعا ارنالعان جوسپار دا ءوز جەمىسىن بەرۋدە», دەدى قۇمار اقساقالوۆ. بۇگىنگى تابىستاردىڭ قاتارىندا اكىم بيىل وبلىستىڭ بەس ميلليون توننادان ارتىق استىق جيناعانىن اۋىزعا الدى. سونىمەن قاتار وبلىستا دارىگەرلىك كەشەننىڭ سالىنۋى قولعا الىنعانىن, «قىزىلجار» ەركىن ەكونوميكالىق ايماعى اشىلعانىن اتاپ ءوتتى.
باياندامادان سوڭ اكىم ەلدىڭ ەكونوميكالىق جانە الەۋمەتتىك دامۋىنا بەلسەندىلىكپەن ۇلەس قوسقان ءبىر توپ ازاماتقا پرەزيدەنت ق.توقاەۆتىڭ جارلىعىمەن بەرىلگەن وردەن-مەدالداردى جانە قۇرمەتتى اتاقتاردى تابىس ەتتى.
