"رۋحاني جاڭعىرۋ" باعدارلاماسى اياسىندا تۋعان جەرىندە ءىرى الەۋمەتتىك جوبالاردى ىسكە اسىرعانى ءۇشىن از قامتىلعان, كوپ بالالى وتباسىلارعا, اتا-انانىڭ قاراۋىنسىز قالعان جەتىم بالالارعا, مۇگەدەكتەرگە قايتارىمسىز كومەك كورسەتكەنى ءۇشىن ءبىر توپ جومارت جاندار ماراپاتتالدى.
اتىراۋلىق تابىلديەۆ ەرلان حيسمەت ۇلى "جىل مەتسەناتى" اتالىمىندا لاۋرەات اتانسا, "جۇرەكتەن جۇرەككە" قوعامدىق قورى "جىلدىڭ ۇزدىك ۇيىمى" اتالىمىندا جەڭىمپاز بولىپ تانىلدى.
ەرلان تابىلديەۆ – "GazStroyMontazhKz" جشس قۇرىلتايشىسى, 2019 جىلى اتىراۋ قالاسىنداعى «مۇنايشى» ستاديونىنىڭ الاڭىن تولىقتاي جاڭارتىپ جانە جاستار ءۇشىن سكەيت ساياباعىن سالىپ بەردى. سونىمەن قاتار الەۋمەتتىك جاعدايى تومەن وتباسىنان شىققان ەكى ستۋدەنتكە ح.دوسمۋحامەدوۆ اتىنداعى اتىراۋ مەملەكەتتىك ۋنيۆەرسيتەتىندە تەگىن ءبىلىم الۋعا مۇمكىندىك جاساپ وتىر.
ودان بولەك اتىراۋ وبلىسى جاۋىنگەرلىك ونەر اسسوتسياتسياسىن باسقارا وتىرىپ, سپورتشىلارعا ۇنەمى قولداۋ كورسەتىپ كەلەدى.
"جۇرەكتەن جۇرەككە" قوعامدىق قورى 2013 جىلى ەرىكتى جاستاردىڭ باستاماسىمەن قۇرىلدى. وسى ۋاقىت ارالىعىندا قور 20-عا جۋىق قايىرىمدىلىق اكتسياسىن, 50-گە جۋىق قايىرىمدىلىق جارمەڭكەسىن ۇيىمداستىرىپ, كوپبالالى انالارعا, دەرتكە شالدىققان سابيلەرگە, بالالار ءۇيى مەن قارتتار ۇيىنە كومەكتەسىپ كەلەدى.
بۇدان بولەك, "جۇرەكتەن جۇرەككە" بەس ءىرى الەۋمەتتىك ماڭىزى بار جوبانى جۇزەگە اسىردى. سولاردىڭ ءبىرى - "Billim For All" جوباسى. جوبا اياسىندا كوپبالالى جانە مۇمكىندىگى شەكتەۋلى بالا تاربيەلەپ وتىرعان انالاردى, الەۋمەتتىك وسال توپقا جاتاتىن وتباسى مۇشەلەرىن كاسىپكە باۋلىپ, 700-گە جۋىق مامان دايىنداپ, كەيبىرەۋىنىڭ ءوز كاسىبىن اشۋىنا, جۇمىسقا ورنالاسۋىنا سەبەپكەر بولدى.
قازىرگى ۋاقىتتا سەنىمگەرلىك باسقارۋ بويىنشا 424,4 شارشى مەتر عيماراتتى كۇردەلى جوندەۋدەن وتكىزىپ, "ۆەنەرا" ينكليۋزيۆتى دامىتۋ ورتالىعىن ىسكە قوستى. ورتالىقتا 3-15 جاس ارالىعىنداعى مۇمكىندىگى شەكتەۋلى بالالاردى ينكليۋزيۆتى باعىتتا قولجەتىمدى باعادا دامىتۋ جۇمىستارى جۇرگىزىلەدى. سونداي-اق «مارس» قولونەر شىعارماشىلىق شەبەرحاناسىن اشتى. وندا 16 جاستان اسقان مۇمكىندىگى شەكتەۋلى جانداردى كاسىپكە باۋلىپ, ەڭبەككە ارالاستىرىپ, قوعامعا قوسۋعا جۇمىستانىپ كەلەدى.
اتىراۋ
