قوعام • 13 جەلتوقسان، 2019

ۇلتتىق مۋزىكالىق اسپاپ جاساۋعا باۋليتىن وقۋ ورنى

74 رەت كورسەتىلدى

ساندىك-قولدانبالى ونەر مەن مۋزىكالىق اسپاپ جاساۋ ماماندىعىنا وقىتاتىن الماتى قۇرىلىس جانە حالىقتىق كاسىپشىلىك كوللەدجىنىڭ نەگىزى 1956 جىلى قالانسا، وقۋ ورنى قابىرعاسىنداعى حالىق اسپاپتارى ماماندىعى پروفەسسور بولات سارىباەۆ پەن بەيسەنعالي ورازبەك ۇلىنىڭ ەسىمىمەن تىكەلەي بايلانىستى. 2016 جىلدىڭ الماتى قۇرىلىس جانە حالىقتىق كاسىپشىلىك كوللەدجىندەگى قازاق حالىق مۋزىكالىق اسپاپ جاساۋ شەبەرحاناسىنا بولات سارىباەۆ پەن ورازعازى بەيسەنبەك ۇلىنىڭ اتى بەرىلگەن.

كوللەدج الماتى قالاسىنداعى جانە رەسپۋبليكاداعى قۇرىلىس ورىندارىنا، اۆتوكولىكتەرگە تەحنيكالىق قىزمەت كورسەتۋ ستانسالارىنا، اعاشتى وڭدەۋ مەن مۋزىكالىق اسپاپتار جاسايتىن كاسىپورىندارعا بىلىكتى كادرلار دايارلاۋدى جۇزەگە اسىراتىن زاماناۋي وقۋ ورنى.

وندىرىستىك وقىتۋ شەبەرى سالتانات قادىروۆا بۇگىندە حالىقتىق كاسىپشىلىك باعىتىنداعى ماماندار دايارلايتىن بىردەن-ءبىر كوللەدجدىڭ تۇلەكتەرى رەسپۋبليكادا جوعارى سۇرانىسقا يە ەكەندىگىن ايتادى. كەز كەلگەن كاسىپورىندا وندىرىستىك تاجىريبەدەن وتكەن ستۋدەنت ءوز قالاۋىنشا سول كاسىپورىندا ارى قاراي جۇمىسىن جالعاستىرا الادى.

«جۇمىسسىز قالعان ستۋدەنتىمىز جوق. وتكەن جىلى بىتىرگەن ستۋدەنتتەرىمىزدىڭ ءوزى شەبەرحانا اشىپ، جەكە كاسىپتەرىن باستاپ كەتتى. وقۋ ورنىندا ماقسۇت يبادۋللاەۆ، نازىم جۇكتىباەۆ، ت.ب. بىلىكتى شەبەرلەر ءدارىسى ستۋدەنتتەردىڭ ءوز كاسىبىن كەشەندى يگەرىپ كەتۋىنە مۇمكىندىك بەرەدى» دەيدى س.قادىروۆا.

قولىنان ونەرى تامعان ستۋدەنتتەر قولونەر شەبەرلەرى كونكۋرستارىنىڭ جەڭىمپازى. ال ءوندىرىس بارىسىندا جاسالعان مۋزىكالىق اسپاپتار كوللەدج وركەسترى، سونداي-اق كورمە زالىنىڭ كوركىنە اينالعان. تالاپتى دا، تالانتتى بالالار ءۇش كۋرستا ءۇش توپتا ءبىلىم الادى. ءبىر مەزگىل تاماقتارى دا تەگىن. ارنايى  تەحنولوگيالار ءپانىنىڭ مۇعالىمى، رەسپۋبليكاعا تانىمال شەبەر ۇستاز، «ۇكىلى دومبىرا» بايقاۋىنىڭ جەڭىمپازى، 1969 جىلى وسى ءبولىمدى اشقان بولات سارىبەۆ پەن ورازعازى بەيسەنبەك ۇلىنان ءتالىم العان ماقسۇت يبادۋللاەۆ اتا كاسىپتىڭ قىر-سىرىن ۇيرەتۋدى زاماناۋي وندىرىسپەن ۇشاتىستىرا جۇرگىزىپ كەلەدى. بىلىكتى مامان، شەبەر ۇستاز «اعاش وڭدەۋ – اتا كاسىپ. كيىز ءۇي ءوندىرىسى، ءۇي جيھازدارى، باتىرلاردىڭ قارۋ-جاراقتارى، ەر-تۇرمان، ت.ب. اتا كاسىپ وندىرىسىندە پايدا بولعان بۇيىمدارعا بۇگىندە دە سۇرانىس بر. ءبىرىنشى كۋرستان باستاپ ستۋدەنتتەر ۇستالىق كاسىپتىڭ قىر-قىرىن اتا-بابالارىمىز سالعان ىزگى ءداستۇرى نەگىزىندە تانيدى. ولاردى قول قۇرالدارى ارقىلى اعاش قاشاۋعا باۋليمىز. ارا، قاشاۋ، ت.ب. قۇرالدارىمەن قاراعاي، قايىڭ،  جاڭعاق، قىزىل اعاش، قاراعاش،  ت.ب. اعاش تۇرلەرىن پايدالانا وتىرىپ، اسپاپ جاساۋعا ۇيرەنەدى» دەيدى شەبەر ۇستاز. بۇگىندە كوللەدج ستۋدەنتتەرى ءۇشىن ديپلومدىق جۇمىسقا قىرىقتان استام تاقىرىپ قولجەتىمدى.

 

الماتى

سوڭعى جاڭالىقتار

ۇقساس جاڭالىقتار