ەلباسى, Nur Otan پارتياسىنىڭ توراعاسى نۇرسۇلتان نازارباەۆ دۇنيەجۇزى قازاقتارىنىڭ كەزەكتى قۇرىلتايلارىنىڭ بىرىندە: «شەتەلدەگى قازاقتاردىڭ ەلگە ءجيى كەلىپ, تۋعان جەرىمەن بايلانىستارىن نىعايتىپ وتىرعانى دۇرىس. قاي ەلدە تۇرساڭىزدار دا, ءاردايىم قازاقستاندى جۇرەكتەرىڭىزدىڭ تورىندە ۇستاڭىزدار. قازاقتىڭ تاريحي وتانى بىرەۋ-اق. ول – قازاقستان», دەگەن ەدى.
وسى ورايدا, Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك شەت ەلدەردەگى جانە قازاقستانعا كەلگەن ەتنوستىق قازاقتاردى قولداۋعا باعىتتالعان ەلىمىزدىڭ ستراتەگيالىق جوسپارلارىن جۇزەگە اسىرۋ جۇمىستارىنا اتسالىسۋعا پارتيانىڭ ارقاشان ءازىر ەكەنىن جەتكىزدى. سونداي-اق ول ەلىمىز تاۋەلسىزدىك العالى بەرى ەلباسىنىڭ باستاماسىمەن تاريحي وتانىنا 1 ميلليوننان استام قازاق قايتىپ ورالعانىن, سونىڭ ارقاسىندا ۇلتىمىزدىڭ دەموگرافيالىق جاعدايى قانداستارىمىزدىڭ ۇلەسى ەسەبىنەن جاقسارعانى تۋرالى ايتتى.
ال «وتانداستار» قورىنىڭ پرەزيدەنتى نۇرتاي ابىقاەۆ قور قۇرىلعان كۇننەن باستاپ وسى كۇنگە دەيىن اتقارىلعان جۇمىستارعا جان-جاقتى توقتالىپ, بىرلەسكەن مەموراندۋمنىڭ ماڭىزدىلىعىن اتاپ كورسەتسە, دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ الداعى ۋاقىتتا ۇشجاقتى مەموراندۋمنىڭ نەگىزىندە جاستارمەن, مەديا جانە باسقا دا سالالاردا بىرلەسكەن جۇمىستار اتقارىلاتىنىن ءسوز ەتتى.
ايتا كەتەيىك, 1989 جىلعى مالىمەت بويىنشا, ەلىمىزدەگى قازاقتاردىڭ سانى 6,5 ميلليون ادام بولسا, ياعني جالپى قازاقستانداعى حالىق سانىنىڭ 39%-ىن قۇراسا, قازىر بۇل كورسەتكىش 70%-عا جەتتى. قازاق ءتىلىنىڭ قولدانۋ اياسى بۇرىنعىمەن سالىستىرعاندا ايتارلىقتاي كەڭەيدى.
